Saraka-Masɔlɛnuta Tɔnnu 19

Ko-Ladan-Nya-Bɛrɛ si Alla Hɛnɛ Nya-Min

1-2 # Saraka-Masɔlɛnuta Tɔnnu 11.44-45; 1 Pita 1.16 Mari ya a fɔ Musa ye ko, “Wo ni ma mɔgɔ-sɛnimɛnu na bawo nde, Mari Alla sɛnima. 3#Bɔ-Koe-Iyipiti 20.8, 12; Tɔn-Fɔɛ-Fila-Nyɔgɛ 5.12, 16 Wo ni wo fanu anubɛ wo nanu gbiliya iko n ya a fɔ nya min wati tenbinɛ rɔ. Wo ni Sulen-Tele ma tele-latankanɛ la fanan. Nde, wota Mari Alla ya kɛ le fɔ wo ye.

4 # Saraka-Masɔlɛnuta Tɔnnu 26.1; Bɔ-Koe-Iyipiti 20.23; 34.17; Tɔn-Fɔɛ-Fila-Nyɔgɛ 27.15 “Wo kana nde, Mari Alla boloka ka bɛsɛnu kɔ. Wo tigi le nde, Mari Alla la, woletɔ wo kana nɛgɛ-fenfen ma bɛsɛ la wo nyɛrɛ ye ka a kɔ.

5“Wo tenbi yisi-kima-sarakɛ bɔla, wo si a tɔnnu bira iko n ya a fɔ wo ye nya min nun. Ni wo ya a bɔ a kilɛ fɛ, n si sarakɛ wo bira. 6Ni wo ya yisi-kima-sarakɛ kɛ bɔ tele min nyɛrɛ rɔ, wo ni a dɔn wo wulɔn kɔnɔ ni a toe tora, wo si a dɔn tele wo banda kɛ ma. Ni do tora fanan ha a tele sawa nyɔgɛ ma, fɔ ni wo ya wo mintan gburr, 7bawo a sɛninyani ma tun. Ni mɔgɔ-wo-mɔgɔ ya soge wo dɔn a tele sawɛ ma, nde, Mari ti sɔn wo sarakɛ la tun. 8Ni min ya wo dɔn, wo tigi si nanparan sɔrɔn nde, Mari bolo bawo fan min dantɛgɛnɛ nde ma, a ara wo bi iko saraka-sogo ma. Wo kana wo miri mɔgɔ sufa kɛ ma tun ko nde, Maritɛ le ale la.

9 # Saraka-Masɔlɛnuta Tɔnnu 23.22; Tɔn-Fɔɛ-Fila-Nyɔgɛ 24.19-22 “Wo tenbi wola fui-fannu tɛgɛla sɛnɛ rɔ, wo kana a tonke-tonkerɔtɛnu wo, a konko-dafɛtɛnu wo, anubɛ a mabunsannu tɛgɛ. 10Wo foora ki-fan minnu na wo, min buira kilɛ la wo, wo si wonu to fugarɛnu anubɛ sundannu ye. Nde, wota Mari Alla ya kɛ le fɔ wo ye.

11 # Bɔ-Koe-Iyipiti 20.15, 16; Tɔn-Fɔɛ-Fila-Nyɔgɛ 5.19, 20 “Wo kana foninyɛ fɔ. Wo kana kankanyɛ anubɛ kensunyɛ kɛ. 12#Bɔ-Koe-Iyipiti 20.7; Tɔn-Fɔɛ-Fila-Nyɔgɛ 5.11; Matiyu 5.23 Wo kana wo gboro n tɔgɔ rɔ foninyɛ kuma bawo minnu bi wo mala, wonu si n tɔgɔ lafɛya. Nde, wota Mari Alla ya kɛ le fɔ wo ye.

13 # Tɔn-Fɔɛ-Fila-Nyɔgɛ 24.14-15 “Wo kana tɔnɔ-wɛ labɔ wo ta-nyɔgɛnu kuma. Ni wo ya wɔli-kɛlɛ bi ka ta wola wɔli-kɛ-tinɛ, yanni i ni a boloka, wo ni a sarɛ don a bolo. Wo kana a sarɛ bira ha wo banda kɛ sɔgɔma. 14#Tɔn-Fɔɛ-Fila-Nyɔgɛ 27.18 Mɔgɔ kana tolo-gbere lafɛya wa ka fen sa fiyɔn yarɔ min si a ma, a ni bui. Wo ni nde, wota Alla gbiliya. Nde, wota Mari Alla ya kɛ le fɔ wo ye.

15 # Bɔ-Koe-Iyipiti 23.6-8; Tɔn-Fɔɛ-Fila-Nyɔgɛ 16.19 “Wo ni ma mɔgɔ-telennɛnu na kiti tɛgɛ tinɛ ka kitinu tɛgɛ a kilɛ fɛ. Wo kana lafisalayɛ kɛ kiti tɛgɛ tinɛ ka bolo-kolɔnnu yoe ma anu yiliki la. Wo kana fen-tiginu fanan yoe ma anu yiliki la bawo fen bi anu bolo. 16Wo kana belenna wo nyɔgɔn tɔgɔ tinyana foninyɛ kuma. Ni mɔgɛ do ye a niyi kumafunfanna mɔgɔ-banu barɛ, ni mɔgɛ do ya a lɔn ko ala sereya-bɔɛ si a ta-nyɔgɛ wo bɔ le nanparan wo rɔ, a ni ta ala sereyɛ bɔ a ye worɔ. Nde, wota Mari Alla ya kɛ le fɔ wo ye.

17 # Matiyu 18.15 “Mɔgɔ ta-nyɔgɛla koe kana to siginɛ i burɔ, fɔ i ni fɛrɛ nyini ka bɛnsɛnkɔninyɛ bɔ wo tɛma alako i kana yiliki sɔrɔn nde, Mari bolo i ta-nyɔgɔn wola ko la. 18#Matiyu 5.43; 19.19; 22.39; Maraka 12.31; Luka 10.27; Romu 13.9; Kalesiya 5.14; Yemesi 2.8 Ni mɔgɛ do ya ko-yogomɛ ma i la, i kana i tayili sara a la. I kana ala ko sigi i burɔ. Kɔnɔ yanni mɔgɛ ni wo sufa ma, a ni a ta-nyɔgɛ keni iko a nyɛrɛ. Nde, wota Mari Alla ya kɛ le fɔ wo ye.

19 # Tɔn-Fɔɛ-Fila-Nyɔgɛ 22.9-11 “Wo ni nta tɔnnu bira. Wo kana kolo-fen subolo filɛ lamara kan tinɛ kelen. Anu kana anu nyɔgɔn yɛlɛ. Wo kana fen subolo filɛ ki sɛnɛ kelan rɔ. Wo kana kurɛ don wo kan na min nadannɛ yesekari subolo fila la.#19.19 Fasi 20-22 si taran Sura 20.13 kɔma.

23“Kɔnɔ ni wo kera Kenan nyamanɛ rɔ tumɛ min, wo ye ki-fan minnu kila, wonu ba gbɔɛ dabira, wo kana anu gbɔɛ dɔn san sawa kɔrɔ. 24A san nani nyɔgɛ ma, wo ni anu gbɔɛ dantɛgɛ nde, Mari ma. 25A san loli nyɔgɛ ma, a gbɔ siyaman si taran a la wo si min dɔn. Nde, wota Mari Alla ya kɛ le fɔ wo ye.

26 # Ko-Dabirɛnu 9.4; Saraka-Masɔlɛnuta Tɔnnu 7.26-27; 17.10-14; Tɔn-Fɔɛ-Fila-Nyɔgɛ 12.16, 23; 15.23; 18.10 “Wo kana sogo-suyi anubɛ a yele dɔn.

“Wo kana wo nyɛrɛ don duruya-koenu tɔ.

27 # Saraka-Masɔlɛnuta Tɔnnu 2.5; Tɔn-Fɔɛ-Fila-Nyɔgɛ 14.1 “Wo ye tala kan min, wo kana mɔgɛ wonuna di-kɛ-nya bi bawo mɔgɛ wonu bi anu kunyɛ da lasiila anubɛ ka anu buyɛ matɛgɛ. 28Anu bi anu fɛrɛ masɛbɛla ka anu fɛrɛ matɛgɛtɛgɛ di-kɛ-tinɛ. Nde, wota Mari Alla ya kɛ le fɔ wo ye.

29 # Tɔn-Fɔɛ-Fila-Nyɔgɛ 23.17 “Wo kana sɔn, wola dunmusinu ni ta bɛsi-bɔn la yɛlɛnya-kɛ-tinɛ. Ni min ya wo ma, wo si nde, Alla boloka ka don bɛsi-kɔ-koe rɔ. Wo si a ma, ko sufa wonu si wara nyamanɛ wo rɔ.

30 # Saraka-Masɔlɛnuta Tɔnnu 26.2 “Wo ni Sulen-Tele gbiliya. Wo ni n bato tinɛ fanan gbiliya. Nde, wota Mari Alla ya kɛ le fɔ wo ye.

31 # Tɔn-Fɔɛ-Fila-Nyɔgɛ 18.11; 1 Samuwɛli 28.3; 2 Mansɛnu 23.4; Aiseya 8.19 “Ni a sɔgɛ ye mɔgɛ do la ka a nyɛrɛ fɛ-koe lɔn, a kana ta ke yi-kɔrɔ-fɛlɛnnɛnu ma wa bolo-tafɛlɛnnɛnu. Ni min ya wo ma, wo tigi-sɛninyabɛlɛ si to. Nde, wota Mari Alla ya kɛ le fɔ wo ye.

32“Wo ni wola kinanu gbiliya ka wo famayigi anu ye. Wo ni kilan nde la bawo nde, wota Mari Alla ya kɛ le fɔ wo ye.

33 # Bɔ-Koe-Iyipiti 22.21; Tɔn-Fɔɛ-Fila-Nyɔgɛ 24.17-18; 27.19 “Wo kana sundannu kɔndɔfili minnu basannɛ wo la bawo fanka ye wole la ka tenbi anu na. 34Wo ni anu bira iko wo ye wo nyɔgɔn birala nya min. Wo ni anu keni iko wo nyɛrɛ. Wo ni a lɔn yati, ko wole fanan bi sundanyɛ la Iyipiti nyamanɛ rɔ nun. Nde, wota Mari Alla ya kɛ le fɔ wo ye.

35-36 # Tɔn-Fɔɛ-Fila-Nyɔgɛ 25.13-16; Hɛnkilimaya-Kumɛnu 20.10; Isikiyɛli 45.10 “Mɔgɔ kana a ta-nyɔgɛ kensunya fen suman tinɛ, fen dan tinɛ rɔ wo, ala yanyɛ rɔ wo, anubɛ ala gbiliyɛ rɔ.

“Nde le wota Mari Alla la min ya wo labɔ Iyipiti nyamanɛ rɔ woletɔ 37wo ni n kuman-kan anubɛ nna tɔnnu bira gben, bawo wo tigi le nde la.”

Currently Selected:

Saraka-Masɔlɛnuta Tɔnnu 19: KCLB

Highlight

Copy

Compare