Saraka-Masɔlɛnuta Tɔnnu 15

Kei anubɛ Musi Sɛninya Koe

1Mari ya tɔn kɛnu di Musa anubɛ Aruna ma 2Isirɛla mɔgɛnuna ko la. Mari ko, “Ni kei dola kirayɛ bɔra a yatelenmɛ ma, kiraya-yi wo sɛninyani ma iko tɔn ya a fɔ nya min. 3Ni a tora bɔla le tuma-wo-tuma, ka, ni a latogonta le, kirayatoe wo ma sɛninya.

4“Ni kirayatoe kɛ ya a sigi fenfen tɔ, ka, ni a ya a sa fenfen min tɔ, fan wo sɛninyani ma. 5-6Ni mɔgɔ-wo-mɔgɔ ya a sigi kirayatoe wola sofa wo rɔ, hali ka a sosa a la, a si ala kurɛ anubɛ a fɛrɛ-bɔnkɛ ku. Hali a wa ban wo mala, a sɛninyabɛlɛ le Mari yala ha wurɛ la. 7Ni mɔgɛ do ya a tugu kirayatoe wo la, wo tigi sɛninyani ma. Mɔgɛ min tugura kirayatoe wo la, a si ala kurɛ anubɛ a fɛrɛ-bɔnkɛ ku. Hali wo, a sɛninyabɛlɛ si to ha wurɛ la.

8“Ni kirayatoe wo da-yi kera mɔgɔ-sɛninyanɛ do ma, fɔ mɔgɛ wo ni ala kurɛ anubɛ a fɛrɛ-bɔnkɛ ku. Hali a wa ban wo mala, a sɛninyabɛlɛ si to ha wurɛ la. 9Ni kirayatoe sigira fenfen tɔ hali min bi buri-kɛ-fannu kɔ tɛma, a sigira fan wo min kuma, wo sɛninyani ma. 10Ni mɔgɔ-wo-mɔgɔ tugura fan wo la gbɛ, ni wo ma, ka a bi, wo tigi sɛninyani ma fanan. Fɔ ni a ya ala kurɛ anubɛ a fɛrɛ-bɔnkɛ ku. Hali a wa ban wo mala, a sɛninyabɛlɛ si to ha wurɛ la. 11Ni a taranta, kirayatoe wo ya a bolo lakubɛlɛ tugu mɔgɔ-sɛninyanɛ do la, wo fanan sɛninyani ma. Fɔ ni a ya ala kurɛ anubɛ a fɛrɛ-bɔnkɛ ku. Hali a wa ban wo mala, a sɛninyabɛlɛ si to ha wurɛ la. 12Ni kirayatoe ya a bole tugu bɔnku-dagɛ min na, wo si wo ratii. Ni a ya a bole tugu miran do la min nadannɛ kɔlɔma la, fɔ anu ni miran wo raku.

13“Ni kirayatoe kɛ ya a yen ko a ara kɛndɛya, a si a makɔni ha tele wɔrɔ ni tenbi. A tele wɔrɔnfila nyɔgɛ wo ma, a si ala kurɛnu anubɛ a fɛrɛ-bɔnkɛ ku tenke-yi la. A si sɛninya wo nya le. 14A tele segin nyɔgɛ ma, a si purulen fila bi, ni wo ma, kangbo fila. A si koni filɛ wo don saraka-masɔlɛ bolo Marita Fani-Bɔn tenbi-bolɔn dafɛ. 15Saraka-masɔlɛ si kelan ma hakɛ-sarakɛ la. A si kelan doi wo ma saraka-mintantɛ la. Saraka filɛ kɛnu si ma kirayato-kɔrɛ wo hakɛ-yamatogon-fan la.

16“Ni kei do keiya-yi bɔra a yatelenmɛ rɔ, a si a fɛrɛ-bɔnkɛ mumɛ bɛɛsi ku. A sɛninyani ma ha wurɛ la. 17Ni keiya-yi kɛra ala kurɛ ma, a mara gbolo-kolonɛ la wo, a mara kasa-kurɛ la wo, wonu ma sɛninya. Fɔ a ni a ku kɔnɔ hali wo, wonu sɛninyabɛlɛ si to ha wurɛ la.

18“Ni kei anubɛ ala musi ya anu sa, anu ni forɔn gbesi, anu mɔgɔ filɛ si anu ku worɔ. Anu sɛninyabɛlɛ le Mari yala ha wurɛ la. 24Ni kei do ya a tui ka a sa ala musi fɛ min bara ala karɛ yen, kei wo fanan sɛninyani ma tele wɔrɔnfila kɔrɔ. A ya a sa a fɛ sofa min tɔ, wo fanan sɛninyani ma.

19“Ni musi do ya ala karɛ yen, a sɛninyabɛlɛ le Mari yala ha tele wɔrɔnfila kɔrɔ. Ni mɔgɛ do ya a bole tugu musi wo la wati wo rɔ, mɔgɛ wo fanan sɛninyabɛlɛ si to ha wurɛ la. 20Ni musi ya a sigi fenfen kuma wati wo rɔ, ka, ni a ya a sa fan min tɔ, wonu sɛninyani ma. 21-23Ni mɔgɛ min nara a bole tugu fan wo la a ya a sigi min kuma, ka, ni a ya a sa fan min kuma, mɔgɛ wo fanan sɛninyani ma. Fɔ a ni ala kurɛ anubɛ a fɛrɛ-bɔnkɛ ku. Hali a wa ban wo mala, a sɛninyabɛlɛ si to ha wurɛ la.#15.23 Fasi 24 tugunnɛ fasi 18 la.

25“Ni musi tora ala wati yenna tuma-wo-tuma, fananta a ye a yenna, a sɛninyani ma worɔ. 26Ni a ya a sa sofa min tɔ, sofa wo sɛninyani ma. Ni a ya a sigi waganɛ min kuma, wo fanan sɛninyani ma wo wati kɔrɔ. 27Ni mɔgɛ ya a tugu sofa wo la anubɛ waganɛ wo la, mɔgɛ wo sɛninyani ma, fɔ a ni ala kurɛ anubɛ a fɛrɛ-bɔnkɛ ku. Hali a wa ban wo mala, a sɛninyabɛlɛ le Mari yala ha wurɛ la. 28A ye ala wati min yenna, ni wo ratora tumɛ min, a si a makɔni ha tele wɔrɔnfila kɔrɔ, a si sɛninya worɔ. 29A tele segin nyɔgɛ ma, a si purulen fila bi, ni wo ma, kangbo fila. A si koni filɛ wo don saraka-masɔlɛ bolo Marita Fani-Bɔn tenbi-bolɔn dafɛ. 30Saraka-masɔlɛ si kelan ma hakɛ-sarakɛ la. A si kelan doi wo ma saraka-mintantɛ la. Saraka filɛ kɛnu si ma kirayato-kɔrɛ hakɛ-yamatogon-fan la.”

31Mari ya kɛ le fɔ Musa ye ko a ni Isirɛla mɔgɛnu makawandi ka a gbɛlɛya gben mɔgɛnuta sɛninyabɛlitayɛla ko la. Mari ko ni min ya ata tɔn kɛnu tinya, wo ara bila a la anubɛ ata Fani-Bɔn min bi dagɛ tɛma. Ni min bilara a la yati, wo si faga serr!

32Wo tɔn le kɛnu na keinu kuma ka a tɛgɛ kirayɛ bɔ-koe ma a yatelenmɛ rɔ anubɛ a keiya-yi bɔ-koe. 33Tɔn kɛnu tɛgɛnɛ musinuta wati yen-koe ma anubɛ kei minnu bi anu sala anuna musinu fɛ wo tumɛ anuna musinu bi anuna wati rɔ.

Currently Selected:

Saraka-Masɔlɛnuta Tɔnnu 15: KCLB

Highlight

Copy

Compare