Saraka-Masɔlɛnuta Tɔnnu 14

Fɛrɛma-Kirayatoenu Sɛninya-Koe

1-2 # Matiyu 8.4; Maraka 1.44; Luka 5.14; 17.14 Mari ya tɔn kɛnu di Musa ma alako fɛrɛma-kirayato-kɔrɛnu si sɛninya iko tɔn ya a fɔ nya min ko, “Anu bi a fɔla saraka-masɔlɛ ye tele min nyɛrɛ rɔ ko fɛrɛma-kirayatoe ara kɛndɛya, 3saraka-masɔlɛ si ta a taran dagɛ kɔma ka a mafɛlɛn a kilɛ fɛ. Ni a ya a taran, mɔgɛ wo ara kɛndɛya, 4saraka-masɔlɛ si a fɔ a ye worɔ ko a ni na kona fila la min sɛninyanɛ iko tɔn ya a fɔ nya min anubɛ kɔlɔma-bolɔn do min tɔgɛ sida, anubɛ yili-kolo-wulan anubɛ kɔlɔma do bolɔn min tɔgɛ hisɔpu. 5Anu si kona filɛ kɛ kelen bira. Saraka-masɔlɛ si a fɔ mɔgɛ do ye worɔ ko a ni tenke-yi-kurɛ kɛ bɔnku-dagɛ rɔ ka kona wo faga bɔnku-dagɛ kuma alako a yele ni tinti tenke-yi-kurɛ wo rɔ min bi bɔnku-dagɛ rɔ. 6A si sɔgɔ-kundunɛ wo bi anubɛ yili-kolo-wulan anubɛ kɔlɔma do bolɔn ka wonu nayigi yele anubɛ yi wo rɔ. Kona doi min kɛndɛ tora, a si wo bi. A si wo layigi yele anubɛ yi wo rɔ. 7A si yele wo do bi min basannɛ yi wo la ka a pusen kirayato-kɔrɛ wo ma iko wɔrɔnfila. Saraka-masɔlɛ si a fɔ worɔ ko a sɛninyanɛ de kɔnɔ a toe tonɛ a la. Wo kɔma, saraka-masɔlɛ ya kona min sa yele anubɛ yi wo rɔ, a si wo bi ka wo kɛndɛ boloka. Wo si ta a ye pon! 8Kirayato-kɔrɛ wo si ala kurɛnu ku, wo kɔma, a si a fɛrɛ mumɛ masii. Wo kɔma fanan, a si a fɛrɛ-bɔnkɛ fanan ku. Hali wo, a sɛninyanɛ kɔnɔ a toe tonɛ a la. A si ta dagɛ rɔ kɔnɔ a kana don ala fani-bɔn la tele wɔrɔnfila kɔrɔ. 9A tele wɔrɔnfila nyɔgɛ wo ma, a si a kunyɛ sii anubɛ a da-buyɛ anubɛ a ya-gbungbɔn-kuma-sii anubɛ a fɛrɛ-bɔnkɛ damasi masii. A ara sɛninya kɔnɔ a toe tonɛ a la tun.

10“A tele segin nyɔgɛ ma, a si na saga-yigi-den fila la anubɛ san-kelen-saga-yɛrɛ kelen na a bolo, fɛɛ sa minnu na. A si na dɛgɛ pani-kunbɛ-nya sawa la min tamaganɛ tuli la. A si na wonubɛ tuli kilasi-bu-tɛmɛ la. Kɛnu si ma a yiliki-sarakɛ la. 11Saraka-masɔlɛ si kei wonubɛ ala sarakɛnu bi ka ta anu na Marita Fani-Bɔn tenbi-bolɔn dafɛ. 12Saraka-masɔlɛ si san-kelen-saga-yigi kelen bi anubɛ tuli ka anu di Mari ma kirayato-kɔrɛ wo yiliki-sarakɛla ko la. Kɔ-fan le kɛnu na Mari ya min di saraka-masɔlɛnu ma iko a ya a fɔ Musa ye nya min. 13A si saga-dan wo bi ka a faga kan-tina-sɛnimɛ wo rɔ, anu si saraka-mintantɛnu anubɛ hakɛ-sarakɛnu faga kan min. A ye yiliki-sarakɛ kɛ fagala nyɔ le bawo a sɛninyanɛ de iko hakɛ-sarakɛ fanan. Kɛnu si to saraka-masɔlɛ ye.

14“Saraka-masɔlɛ si saga-dan wo yele do bi ka a don kirayato-kɔrɛ wo bolo-nyimama-tolo-lafɛlafɛ ma anubɛ a bolo-nyimama-gbungburu-wɛ anubɛ a bolo-nyimama-kin-gbungburu-wɛ ma. 15Saraka-masɔlɛ si tuli wo do bi ka a kɛ a nyɛrɛ bolo-maran rɔ. 16A si a bolo-nɔlɔnɛ bi ka a sɔ tuli wo rɔ min bi a bolo tɔ ka a pusen a ma Mari yala iko wɔrɔnfila. 17Wo kɔma, a si tuli do sosa a kan-tinɛnu ma iko a ya saga-dan-yele sosa a ma nya min ka a sosa a bolo-nyimama-tolo-lafɛlafɛ ma anubɛ a bolo-nyimama-gbungburu-wɛ anubɛ a bolo-nyimama-kin-gbungburu-wɛ ma. 18A si tuli wo toe bi min bi a bolo tɔ ka a sosa kei wo kun-gbana ma. A si sɛninya ka le.

19-20“Saraka-masɔlɛ si san-kelen-saga-yɛrɛ wo bi ka a ma kirayato-kɔrɛ hakɛ-yamatogon-fan la. Wo kɔma fanan, a si san-kelen-saga-yigi-toe wo bi ka wo ma saraka-mintantɛ la anubɛ dɛgɛ ka wonu sa tɛ rɔ saraka-mintantɛ kuma. Saraka-masɔlɛ banta sarakɛ kɛnu dila Mari ma tumɛ min, wo ya tɛlɛto-kɔrɛ wo hakɛ yamatogon ka a sɛninya a kila-bɛrɛbɛrɛ fɛ.

21“Ni kirayato-kɔrɛ ti ke nala sarakɛnu na minnuna ko fɔnɛ kɛnu na bawo a bolo-kolɔn le, a si saga-yigi-dan kelen nyini ka a ma a yiliki-sarakɛ la. Kɔ-fan le kɛnu na Mari ya min di saraka-masɔlɛnu ma. Saraka-bɔlɛ si na dɛgɛ-munke pani-kunbɛ-nya kelen na min tamaganɛ tuli la anubɛ tuli kilasi bu tɛmɛ la. 22A si na purulen fila la a bolo, ni wo ma, kangbo fila. Kelan saraka-mintantɛ, a to kelan, a hakɛ-sarakɛ. 23Ala sɛninyɛ tele segin nyɔgɛ ma, a si na sarakɛnu na Marita Fani-Bɔn tenbi-bolɔn dafɛ. 24Saraka-masɔlɛ si saga-yigi anubɛ tuli kilasi bu tɛmɛ wonu bi ka wonu di Mari ma. Kɔ-fan le kɛnu na Mari ya min di saraka-masɔlɛnu ma. 25A si saga-dan wo bi ka a faga ka a yele do bi ka a don kirayato-kɔrɛ wo bolo-nyimama-tolo-lafɛlafɛ ma anubɛ a bolo-nyimama-gbungburu-wɛ anubɛ a bolo-nyimama-kin-gbungburu-wɛ ma. 26Saraka-masɔlɛ si tuli wo do bi ka a kɛ a nyɛrɛ bolo-maran rɔ. 27A si a bolo-nɔlɔnɛ bi ka a sɔ tuli wo rɔ min bi a bolo tɔ ka a pusen a ma Mari yala iko wɔrɔnfila. 28Wo kɔma, a si tuli do sosa a kan tinɛnu ma iko a ya saga-dan-yele sosa a ma nya min ka a sosa a bolo-nyimama-tolo-lafɛlafɛ ma anubɛ a bolo-nyimama-gbungburu-wɛ anubɛ a bolo-nyimama-kin-gbungburu-wɛ. 29Tulu-toe min bi a bolo tɔ, a si wo bi ka a sosa kei wo kun-gbana ma. A si sɛninya ka le. 30Wo kɔma, saraka-masɔlɛ si kona wo kelen bi 31ka a ma kirayato-kɔrɛ wo hakɛ-sarakɛ la. A si kona doi wo bi anubɛ dɛgɛ-munke ka wonu ma saraka-mintantɛ la. Saraka-masɔlɛ banta sarakɛ kɛnu dila Mari ma tumɛ min, wo ya kirayato-kɔrɛ wo sɛninya ka a hakɛ yamatogon.

32“Fɛrɛma-kirayatoe bolo-kolɔnnuta saraka-bɔ-nya tɔn le kɛnu na min si anu sɛninya Mari yala.”

Bɔnnu Fundan Bɔ-Koe

33Mari ya tɔn kɛnu di Musa anubɛ Aruna ma 34fundannu bɔ-koe bɔnnu ma. (Kɔnɔ tɔn kɛnu sa Isirɛla mɔgɛnuna ko la anu bi kan min kaka.#14.34 Anuna bɔnnu: Anu bi fani-bɔnnu na nyɔ, bulɔku-bɔn ma. Kɔnɔ anu ba ta Kenan nyamanɛ rɔ tumɛ min, anu si tɔn kɛnu bira.)

35Musa ya Mari kuman-kan latenbi Isirɛla mɔgɛnu ma tun ko, “Wo wa ke Kenan nyamanɛ rɔ wati min, ni min ya a yen worɔ ko ala bon-fundan ara bɔ, a si a fɔ saraka-masɔlɛ ye. 36Saraka-masɔlɛ si a fɔ a ye ko, ‘Samani n ni ta bɔn mafɛlɛn, i ni ila mirannu nabɔ bɔn la n yarɔ.’ Kɔnɔ ni a ma mirannu nabɔ bɔn la iko a ya a fɔ a ye nya min, saraka-masɔlɛ si a fɔ bonna-miran mumɛ bɛɛ ma ko anu sɛninyani ma. Wo kɔma, a si ta bɔn la 37ka bon-fundan mafɛlɛn. Ni saraka-masɔlɛ ya a yen ko fundan wo min bi bɔn ma a wulennɛ, ni wo ma, a pɔrɔkɔsɛ le, ado a rayiginɛ dandan ma, 38saraka-masɔlɛ si bɔn wo latogon tele wɔrɔnfila kɔrɔ. 46Ni mɔgɛ min donta bon-natogonnɛ wo la, wo tigi ti sɛninya ha wurɛ la. 47Ni mɔgɛ do tara kinɔgɔ nyɔ, ni wo ma, ka ta fen dɔn bɔn wo la, mɔgɛ wo si ala kurɛnu ku. 39A tele wɔrɔnfila nyɔgɛ wo ma, saraka-masɔlɛ si na tun ka bɔn mafɛlɛn. Ni a ya a yen fundan wo ara siyaya bɔn ma, 40fundan wo ye kuri minnu ma, a si a fɔ mɔgɛnu ye ko, ‘Wo ni kuri kɛnu bɔ bɔn rɔ.’ Anu si kuri wonu bi ka ta anu nafili kan-tina-sɛninyabɛlɛ rɔ anuna soe kɔma. 41Wo kɔma, a si a fɔ anu ye tun ko, ‘Wo ni dandan-burɛ mawɔrɔ.’ Anu bi dandan wo min mawɔrɔla, anu si wo gbangban madɛn ka ta a lafili kan-tina-sɛninyabɛlɛ rɔ soe kɔma. 42Wo kɔma, anu si kuru-gbɛrɛkɛ nyini anu ya kan-tinɛ minnu tinya wo la, anu si wo nyɔgɔn sɛgi kuri wo la. Anu si borongbɛ bi wo rɔ ka bɔn wo manɔri wo la.

43“Anu ba ban kɛ ladanna a gbɛ rɔ tumɛ min, saraka-masɔlɛ si na a mafɛlɛn tun.#14.43 Fasi 44 anubɛ 45 si taran fasi 53 kɔma. 48Ni a nara a mafɛlɛn a ni a taran, bon-fundan ma bɔ tun mumɛ, a si a fɔ worɔ ko bon-sɛninyanɛ le iko Mari ya a fɔ nya min nun bawo bon-fundan ma bɔ tun.

49“Min si bɔn wo sɛninya Mari yala worɔ, bon-tigi si na kona fila la anubɛ sɔgɔ-kundunɛ do min tɔgɛ sida anubɛ yili-kolo-wulan anubɛ kɔlɔma do bolɔn min tɔgɛ hisɔpu. 50Anu si kona filɛ kɛ kelen bira ka a faga bɔnku-dagɛ kuma alako a yele ni tinti tenke-yi-kurɛ wo rɔ min bi bɔnku-dagɛ wo rɔ. 51A si sɔgɔ-kundunɛ wo bi anubɛ yili-kolo-wulan anubɛ kɔlɔma wo bolɔn ka wonu nayigi yele anubɛ yi wo rɔ. Kona doi min kɛndɛ tora, a si wo bi ka a layigi yele anubɛ yi wo rɔ. A si yele wo do bi min basannɛ yi la ka a pusen bɔn wo ma iko wɔrɔnfila. 52-53Wo kɔma, saraka-masɔlɛ ya kona min layigi yele anubɛ yi wo rɔ, a si kona wo bi ka kona wo kɛndɛ boloka soe kɔma kilɛ la. Kona wo si ta a ye pon! Saraka-masɔlɛ wa ban kɛ mumɛ bɛɛ mala tumɛ min, wo si bɔn wo sɛninya a kila bɛrɛbɛrɛ fɛ. 44Kɔnɔ ni saraka-masɔlɛ ya a taran a fundan bɔnɛ tun, a si a fɔ worɔ ko bon-sɛninyani ma. 45Anu si bɔn kɛ keri worɔ ka a kurinu anubɛ a borongbɛ anubɛ a kɔlɔmanu bi ka ta anu nakɛ-a-rɔ soe kɔma kan-tina-sɛninyabɛlɛ rɔ.#14.45 Fasi 46 anubɛ 47 si taran fasi 38 kɔma.

54-56“Tɔn le kɛnu na fɛrɛma-kiraya-yogomɛnu wo, tɛlɛ anubɛ sumunɛnu wo, anubɛ kurɛnu findiki-koe wo anubɛ bonnu fundan bɔ-koenuna ko la. 57Tɔn le kɛnu na min si fen-sɛninyanɛ anubɛ fen-sɛninyabɛlɛ dan-nafarɛ yira mɔgɛnu na.”

Currently Selected:

Saraka-Masɔlɛnuta Tɔnnu 14: KCLB

Highlight

Copy

Compare