Yasowa 13
13
Nyamani-Bibɛlɛnu Wara-Koe
1Yasowa kɔrɔyara tumɛ min, Mari ya a fɔ a ye ko, “I wara kɔrɔya kɔnɔ hali wo, nyamanɛ donu bi nyɔ wo si minnu kɛlɛ tun. 2-3Wo ma Filisiti kɛnuna nyamanɛ bi wɛ anu bolo. Anuna so loli wo le kɛnu na, Kesa, Asadadi, Asikalɔn, Kati, anubɛ Ɛkirɔn. Fɔ wo wa Kesa kɛnuna nyamanɛ bi min bi Iyipiti tele-bɔɛ anubɛ Afim kɛnuna nyamanɛ min bi dugu la. Nyamanɛ min ya a dabira Sihɔ bɛ ma Iyipiti dan la ka dan Ɛkirɔn soe ma, wo ma wo fanan bi wɛ. 4Wo ma Kenan mɔgɛnuna nyamanɛ bi wɛ min ya a dabira Meyara soe ma Sadon da kɔrɔ. Kenan mɔgɛnu dan le Afɛki soe la, Amora kɛnuna nyamanɛ-dabirɛ, kɔni. 5Wo ma Kiba mɔgɛnuna nyamanɛ bi wɛ. Wo ma Lɛbanan mɔgɛnuna nyamanɛ bi wɛ min dabirɛ Beyali-Kadi soe ma Hɛrɔman kɔnkɛ kɔrɔ ha ka ke Hamati kɔnkɔ-gbɛran ma, 6#Yilan-Yilan Koe 33.54 katarala Sadon kɛnu ma min bi kɔnkɔ-nyamanɛ rɔ Misirofa-Maim soe anubɛ Lɛbanan kɔnkɛnu tɛma. 7I ni nyamanɛ kɛ ratala#13.7 Nyamanɛ ratala-koe: Hali anu ma nyamanɛ wo bɛɛ sɔrɔn bɛ, Mari ya a fɔ anu ye ko anu ni a ratala. Isirɛla bɔnsɔn kɔnɔntɔ anubɛ a talɛ tɛma iko n ya a fɔ i ye nya min fɔlɔ nun.”
Nyamanɛ Ratala-Koe Yorodan Bɛ kɔma Tele-Bɔɛ Wara La
8 #
Yilan-Yilan Koe 32.33; Tɔn-Fɔɛ-Fila-Nyɔgɛ 3.12 Rubɛn bɔnsɔn anubɛ Kadi bɔnsɔn anubɛ Manasa bɔnsɔn-talɛ ya anuta nyamanɛ sɔrɔn nun, Marita wɔli-kɛlɛ, Nɛbi Musa ya min di anu ma nun Yorodan bɛ kɔma tele-bɔɛ wara la.
9Anuna nyamanɛ tara ha Arɔra soe min bi Anɔn lɛɛ anubɛ nyamanɛ min bɛɛ ye Dibon dugu la ha ka ke Midaba soe ma. 10Anuna nyamanɛ danta Amon nyamanɛ la tele-bɔɛ wara la. Nyamanɛ wo soe bɛɛ taranta Mansa Saihɔn bolo nun ka a dabira Hɛsibɔn soe ma a siginɛ kan min. 11Hɛrɔman kɔnkɛ bɛɛ, anubɛ Basan nyamanɛ bɛɛ taranta anuna nyamanɛ rɔ ha ka ke Salaka soe ma anubɛ Kaliyadi nyamanɛ bɛɛ ha ka ke Kesa nyamanɛ anubɛ Meyaka nyamanɛ bɛɛsi rɔ. 12Mansa Ɔku min taranta sigini Asitɔra anubɛ Ɛdiriya soenu tɔ fɔlɔ nun, wota nyamanɛ fanan bi nyamanɛ wo rɔ. Musa ya nyamanɛ kɛ nɔ Isirɛla mɔgɛnu ye fɔlɔn. 13Hali wo bɛɛ rɔ, Isirɛla mɔgɛnu ma Kesa anubɛ Meyaka mɔgɛnu gben. Wonu siginɛ tora anu tɛma ha kaka.#13.13 Ha kaka: Wonu siginɛ anu tɛma kɛ sɛbɛra Hiburu-kan rɔ wati min. Bi, ma ma wo lɔn.
Lifayi Bɔnsɔn-Mɔgɛnuta Dugu Sɔrɔn-Koe
14 #
Tɔn-Fɔɛ-Fila-Nyɔgɛ 18.1
Musa ma nyamanɛ di Lifayi bɔnsɔn ma bawo Isirɛlata Mari Alla ara a fɔ nun ko, “Isirɛla mɔgɛnu bi sarakɛ minnu bɔla n ye, wo do si di Lifayi bɔnsɔn ma.”
Rubɛn Bɔnsɔn-Mɔgɛnuta Dugu Sɔrɔn-Koe
15Musa ya nyamanɛ wo fara Rubɛn bɔnsɔn-mɔgɛnu na iko anu siya nya min. 16Anuna nyamanɛ ya a dabira Yorodan bɛ ma tele-yigi wara la ka ke Anɔn bɛ ma ha kɔnkɛ min tasiginɛ ye Midaba soela foolɛ rɔ. 17Wo le tara ha Hɛsibɔn soe anubɛ ala foolɛ rɔ. Soe minnu bi nyɔ, wonu tɔgɛ le kɛnu na, Dibon, Bemoti-Beyali, Bɛti-Beyali-Meyɔn, 18Yehasi, Kidɛmoti, Mɛfeyati, 19Kiriyateyim, Sibima, Sirɛti-Sehari min bi lɛɛ tɛma kɔnkɛ la, 20Bɛti-Piyɔri, Bɛti-Yɛsimoti, anubɛ Pisiga kɔnkɔ-kerikerinya, anubɛ Mansa Saihɔn ye mansayɛ la kan tinɛ min bɛɛ kun na nun fɔlɔ. 21Musa ya Mansa Saihɔn faga tumɛ min, a ya Ɛfi wo, Rɛkɛm wo, Suri wo, Huri wo, anubɛ Reba fanan faga minnu bi mɔgɔ-bayɛ la Midiyan nyamanɛ rɔ. Wonu bi Mansa Saihɔn kɔrɔ nun. 22-23Isirɛla mɔgɛnu ya Beyorila dan Belam faga min bi duriyɛ kɛla nun. Yorodan bɛ mara Rubɛn nyamani-dan la tele-yigi wara la.
Kadi Bɔnsɔn-Mɔgɛnuta Dugu Sɔrɔn-Koe
24Musa ya nyamanɛ kɛ di Kadi bɔnsɔn-mɔgɛnu ma iko anuta kebilɛ siya nya min ka a dabira Rubɛnta nyamani-dan ma kantɔ-wara la. 25Yasa soe anubɛ soe min bɛɛsi ye Kaliyadi nyamanɛ rɔ, wo mara anutɛ la anubɛ Amon nyamani-talɛ ha ka ke Arɔra soe ma, Raba soe tele-bɔɛ wara la. Mansa Saihɔnta nyamani-toe wo bɛɛ sara Kadita nyamanɛ kuma, 26ka a dabira Hɛsibɔn soe ma ha Ramati-Misipa anubɛ Bɛtonim fanan ma, ha ka ke Mehaneyim anubɛ Diba min bi Kalili dalɛ dafɛ. 27-28Bɛti-Haram wo, Bɛti-Nimira wo, Sukɔti wo, Sefon minnu bi Yorodan bɛ dafɛ wo, soe wo bɛɛsi mara anutɛ la. Yorodan bɛ mara Kadita nyamani-dan la tele-yigi wara la ha ka ke Kalili dalɛ ma.
Manasa Bɔnsɔn-Talɛta Dugu Sɔrɔn-Koe
29Musa ya nyamanɛ kan tinɛ min di Manasa bɔnsɔn-tala-mɔgɛnu ma, wo le kɛ la. 30Basan nyamanɛ bɛɛ mara anutɛ la anubɛ a so bi-wɔrɔ min bi a rɔ ka a dabira Mehaneyim soe ma. So bi-wɔrɛ wo bɛɛ ye Manasala den Yeya bolo. Mansa Ɔku ara kan tinɛ kɛ bɛɛ mara nun. 31Musa ya Kaliyadi nyamanɛ talɛ di Manasala den Makiri ma, Asitɔra anubɛ Ɛdiriya soenu bi kan tinɛ min tɔ, kɔni.
32Nyamanɛ min bi Yorodan bɛ kɔma tele-bɔɛ wara la, Musa ya wo fara ka le a ye Mohabu nyamanɛ rɔ tumɛ min. 33#Yilan-Yilan Koe 18.20; Tɔn-Fɔɛ-Fila-Nyɔgɛ 18.2 Kɔnɔ Musa ma nyamani-fenfen di Lifayi bɔnsɔn-mɔgɛnu ma bawo Isirɛla mɔgɛnu bi kɔ-fan min dila anuta Mari Alla ma, anu denu bi anutɛ sɔrɔnna wo le tɔ.
Kuranko Common Language Bible © The Bible Society in Sierra Leone, 2006.