Aiseya 64
64
1E, Mari, i ni san-kole rafara ka yigi ma tɛma.
Kɔnkɛnu ba i yen, anu si yɛrɛyɛrɛn kumakɔɛ bolo.
2Anu si ma iko yi min bi gbonsanna tɛ kuma.
I ni ma iko tɛ wa sigi yerima-gbalɛ la.
Ni i ya wo ma, i yogenu si i lɔn.
Anu ba i yen, anu si to yɛrɛyɛrɛnna kumakɔɛ bolo.
3Ma ara tɛrɛna koe donu na ile Mari bolo, ma miri sa minnu ma.
I yigira tumɛ min, kɔnkɛnu yɛrɛyɛrɛnta kumakɔɛ bolo.
4 #
1 Kɔrɛnti 2.9
Kebi fɔlɔ, mɔgɔ ma Alla wara-koe lamɔɛn min makawara iko ile,
ado mɔgɛ yɛ la ma tii Alla-gbɛrɛ ma ile kɔma.
Minnu lanɛ ile la, i ye wonu dɛnbɛna.
5Mɔgɛ min sewanɛ ko-telenni-kɛ la, i ye wonu dɛnbɛna.
Minnu bi anu mirila ko anu ni ma iko i miriya ye anu ma nya min, i ye wonu fanan denkunna.
Kɔnɔ i yisi kɔrɔtɔra ma ma bawo ma tora hakɛ kɛla nun,
ado ita tɔn-tinyɛ ara ma ma kɛ-nya le la.
Ma si kisi kama gbɛ?
6Ma dama latinyanɛ hakɛ bolo.
Ma ya ko-telennɛ min bɛɛ kɛ, wonu manɛ i ya la iko kura-koro-nɔgɔnɛ.
Ma dama mani de iko yanba-kun-gbalɛ.
Ma hakɛ ara ta ma la fulufele, iko fɔnyɔ ye tala yanba-kun-gbalɛ wonu na nya min.
7Mɔgɔ-wo-mɔgɔ sa min bi i batola.
Hali ka ma dɛnbɛ, mɔgɔ-wo-mɔgɔ sa min si i manyinika.
Ni i ya a yen, wo dama ye mala ma la bawo i wara i kan-kɔ sɔ ma la.
Ma dama ara kasara ka a tɛgɛ ma hakɛnu ma.
8Kɔnɔ Mari, ma fa le ile la.
Male manɛ iko dugu-namɛ. Daga-sɔlɛ le ile la.
I kɔɛn-nyɛrɛ-nyɛrɛ le ya ma dan.
9E, Mari, i kana diminya-belebele kɛ ma ma,
ado i yili kana to ma hakɛnu ko mumɛ!
I yandi, i kolan lasɛgi ma ma
bawo i halalɛ le male la.
10Ila so-sɛnimɛnu ta ara kolonya iko wula-da-rakolɔn ye nya min.
Yerusalɛm ra ara kolonya filili, ka ma tonbɔn la.
11Ma benbanu taranta i batola ita bon-sɛnimɛ la
kɔnɔ nyɔ ara mintan tɛ la gburr!
Mala fen-kolomɛnu bara halaki pɔ!
12Mari, ni ile nyɛrɛ ya kɛnu yen i kolan la
i si ke a birala i rɔ?
I radenɛ si to ka tɔrɔya-dunɛ sigi ma kuma, ma ti ke min na?
Kuranko Common Language Bible © The Bible Society in Sierra Leone, 2006.