Aiseya 63
63
Marita Nɔlɛ Wara-Koe Sibolenu Kuma
1 #
Aiseya 34.5-7; Yɛrɛmaya 49.7-22; Isikiyɛli 25.12-14; 35.1-15; Emɔsi 1.11-12; Hɔbadaya 1-14; Malakayi 1.2-5 Yon bi nala kɛ la ka bɔ Idɔm nyamanɛ rɔ?
A bɔra Idɔm so-kunyɛ le la min tɔgɛ Bɔsira.
A makirinɛ kura-wulen-hakikɛ la.
A ye tagamana a sɛbɛ-kuna-wɛ la.
A ye a fɔla ko Mari le ale la min bi tonyɛ gbonkanna.
A ko wo lakisi-sɛnbɛ ye ale le bolo.
2Nfenna, ila kurɛnu wulennɛ?
A manɛ iko i ye nɔnbɔ-gbɔ-wulennɛnu tatɛntɛnna alako i ni a yi sɔrɔn.
3 #
Lankɛnimayɛ 14.20; 19.13, 15 Mari ko ale le kelen pe ya sibole wonu tatɛn iko nɔnbɔ-gbɔɛ.
A ko sibolo-wo-sibolo ma a dɛnbɛ anu tatɛntɛnna.
Ata fondo-bɔ-belebele le ya a ma, a ya anu nunku a tontɛ la.
A ko ala duruki ara wulen mɔgɔ kɛnu yele-kuran la.
4A ko ala mɔgɛnu tayili-sara-wati ara ke.
Anu yogenu-tɔrɔ-wati ara ke.
5 #
Aiseya 59.16
A ko a ya a kolan lakalan kɔnɔ a ma a dɛnbɛna fenfen yen.
A ara tɛrɛna, a ma mɔgɔ-den-kelen yen min si a dɛnbɛ.
Woletɔ a ko a nyɛrɛta fondo-bɔɛ ya a sɛnbɛ don.
A ko a nyɛrɛ kɔɛn le ya a ma, a ya nɔlɛ kɛ.
6A ko a diminya-belebele kera wati min, a ya sibolenu tatɛntɛn.
A ya anu yele-kuran-kuran rawuya dugi ma.
Marita Nyimayɛ Wara-Koe Isirɛla Mɔgɛnu Ye
7A di n ye, n ni Marita keninteya-dan-natɛgɛbɛlɛ wara-koe fɔ.
N si a tanto ka a tɛgɛ a ara min bɛɛ kɛ ma ye.
A ara fen-nyima-siyaman di ma ma.
A ara Isirɛla mɔgɛnu bira a kin na!
Mari ara ata kinikinɛ yira ma la.
A nyimayanɛ ma ma dɔgɔma-ma-de!
8Mari ko ata mɔgɛ le Isirɛla mɔgɛ kɛnu na.
A ko anu ti foninyɛ fɔ a ye ka a yanfa.
Woletɔ a ya anu kisi.
9A ko ala mɔgɛnu ba tɔrɔyɛ sɔrɔn, ale fanan bara tɔrɔ.
A ara a nyɛrɛta melika sɔ anu kisi tinɛ.
Mari le ya anu kisi ka a tɛgɛ ata nyimayɛ anubɛ ata keninteyɛ ma.
A ko kebi fɔlɔ a ya anu banba.
10Kɔnɔ anu kan-kɔ-sɔɛ Mari la,
anu ya a ma, ata Ni-Sɛnimɛ yisi tinyanta.
Woletɔ Mari mara anu yoge la,
ado ka a tɛgɛ wo ma, a ya anu kɛlɛ.
11Wo kɔma, ala mɔgɛnu hɛnkili na ara to bilala ko-tenbini-kɔrɛnu ko.
Anu hɛnkili tugura Musa la.
Anu ko, “Mari min ya mabɛ mala kun-tiginu natɛgɛ kɔgɔ-yi la, wo ye mintɔ?
Min ya ata Ni-Sɛnimɛ layigi mala mɔgɔ-banu kuma, wo ye mintɔ?”
12 #
Bɔ-Koe-Iyipiti 14.21
Mari min ya ata fanka mayira Musa rɔ
ka kɔgɔ-yi fara fila la ha ala mɔgɛnu banta tenbila,
wo ye mintɔ?
Nba Mari ara a nyɛrɛ tɔgɔ lawanka kabana-koe wo fɛ.
13Mari nyɛrɛ ya ala mɔgɛnu natɛgɛ dugu-gbalanɛ ma yi tɛma.
Anu tenbira iko bintɔ-soee min ti a kian latugu ka bui wula-da-rakolɔn rɔ.
14Marita Ni-Sɛnima sɔra anu yarɔ ka ta anu na anu sulen tinɛ
iko ninkinu tenbi kɔnkɛ yigila ka ta bin nɔrɔnnɛ magbenna.
Mari, i sɔra ila mɔgɛnu yarɔ wo nya na le.
Ko-sufa kɛnu denu ya a ma, i mankan tara wuu!
Kinikini-Madiyalɛ Wara-Koe
15Mari, i kolan layigi ma ma dugi ma.
I tenbi ita sɛninya-tina-makawanɛ rɔ, i miri ma ma.
Ita keninteya-belebele-wɛ ye mintɔ?
Nfenna i ye ita keninteyɛ anubɛ ita kinikinɛ dogonna ma ma?
16Ma fa le ile la.
Iburayima ma a lɔn ni ala dan le male la.
Yakoba fanan ma ma lɔn.
Kɔnɔ ma fa le ile Mari nyɛrɛ la.
Kebi hun, i tɔgɛ le, “Ma Kunkalɛ.”
17Mari, nfenna i ye a mala, ma ye yilan-yilanna ka bɔ i fɛ?
Nfenna i ye a mala, ma tole ye gbɛlɛyala, ma sa i gbiliyala?
I yandi, sɛgi ma ma.
I halalɛ le male la minnu bi wɔlila i ye buda!
18Ila Bato-Bɔn taranta ma bolo wati-kundu-ni kɔrɔ.
Kɔnɔ ma yogenu bara anu kian sɔ kan-tina-sɛnimɛ wo rɔ.
19Mɔgɛ donu bi nyɔ, i ma minnu mara wɛ tele-kelen-bɛrɛni!
I tɔgɔ ma sa wonu kuma lun-kelen lun-tala,
ado male ara ma le gbɛ iko mɔgɛ wonu.
Kuranko Common Language Bible © The Bible Society in Sierra Leone, 2006.