Aiseya 44
44
Mari Alla Kelan Wara-Koe
1Mari ko
“Wole Isirɛla mɔgɛnu, nta wɔli-kɛlɛnu, kɔni, wo ni wo tole masɔ.
Nta mɔgɔ-yabɔnɛ le wole Yakoba kebilɛnu na.”
2A ko ale le ya ma dan kebi ma ye ma na burɔ.
Ale le ye ma dɛnbɛna tolon!
A ko ma kana kilan bawo ata wɔli-kɛlɛ le male la.
Ata mɔgɔ-yabɔnɛ le male la. Ma di a ye kosɛbɛ!
3A ko nyamanɛ min kan lagbalanɛ, a si yi di nyɔ ma.
A si a ma, yi ni siyaya mala nyamanɛ rɔ.
A ko a si ata Sɛnbɛ di mala dannu ma duk!
A si duwɛ di mala kebilɛnu ma.
4Anu si to sabatila iko yi tenbi binyɛ kɔrɔ
anubɛ kɔlɔma min kinɛ yi dɛ la.
5A ko mɔgɛnu si to a fɔla kelen-kelenyɛ ma ko Marita mɔgɛ le anu denu na.
Anu si kofu male Isirɛla mɔgɛnu ma.
Anu kelen-kelennamɛ-bɛɛ si Mari tɔgɛ sɛbɛ anu bole ma
ka anu nyɛrɛ kele ko Allata mɔgɛ donu.
6 #
Aiseya 48.12; Lankɛnimayɛ 1.17; 22.13 Mari min bi maralɛ kɛla ka male Isirɛla mɔgɛnu kumafunfan,
Mari Sɛnbɛ-Bɛɛ-Tigi, kɔni, wo ko,
Alla fɔlɔtɛ anubɛ a laban le ale la.
Alla-wo-alla sa nyɔ ale kɔma.
7Ale ye ko sufa min mala, mɔgɛ yon si ke wo sufanu mala?
Yon si ke ko-natoenu fɔla iko ale ka a dabira a fɔlɔtɛ ma ha wati-laban?
8A ko ma kana kilan! Ma kana hɔn!
Min bi nala mala ma la, a ye wonu fɔla ma ye tolon!
A sere le male la kɛnuna ko la.
Alla-gbɛrɛ ye nyɔ, wa?
Alla-makawani-gbɛrɛ do ye nyɔ, a ma min wara-koe lamɔɛn bɛ?
Bɛsi-Mayɛlɛn-Koe
9Mɔgɔ-fuyi le bɛsi-ladannɛnu na. Hali bɛsɛ di mɔgɛnu ye, fufafuyi le bɛsɛ wonu na. Minnu bi bɛsɛ wonu kɔla, fiyɔn anubɛ kun-takolɔn le wonu na. Anuna kun-takolonyɛ si a laban anu bolo yarabiyi ma. 10Ka nɛgɛ ma kɔli-fan la, wo tɔnɔ sa a la. 11Ni min ya anu kɔ, wo tigi si miliya. Minnu bi bɛsɛ ladanna, mɔgɔni-gbuyi le wonu dɔrɔn na. Anu ni na kiti-bɔn la. Anu kun ma si kɔ ka yarabiyi sɔrɔn kudai!
12Siyaki wo si nɛgɛ-kundi do bi ka a ladon tɛ rɔ. A si kundu-wɛ bi ka a ratugu a sɛnbɛ la alako a ra ni bɛn yɔnyɔn! A tenbi wɔlɛ wo kun na, kan-nagbalɛ anubɛ kɔnkɛ anubɛ bandan ye ale forongbanna.
13Kɔlɔma-lɛsɛlɛ wo si kɔlɔma suma. A si bɛsɛ wo ladan-bole suma kɔlɔma wo ma ka a lɛsɛ dabira. A si a ladan a kin na iko hadama-dan. A wa ban a ladanna, a si ta a sigi a kɔ tinɛ rɔ. 14Tumado a si lɛnkɛ tɛgɛ gbɔngbɔn rɔ, ni wo ma, a ni gbɛni-mele tɛgɛ burɔn kɔrɔ. Ni wo ma, a ni denkerenafan#44.14 Denkerenafan: Kɔlɔma le wo la min ta ma gbɛlɛ ki ka a makɔni ha wo ni koloya. 15Kɔlɔma wo do si ma sɔgɛ la. A kundu kelan, a si wo ma a gbala-fan la, a kundi doi, a si wo ma biredi-mintan-fan la. A toe si ma bɛsɛ wo la a si to min kɔla. 16A si a kundi do ma sogo-mintan-fan la. A wa wo dɔn, wo si mɛyɛ bɔ a la. A si to a gbalala tɛ wo la ka a fɔ ko, “Tɛ kɛ, a di de!” 17Kɔnɔ a si kɔlɔma wo toe ma bɛsɛ la. A si a nyɛnkin wo kɔrɔ ka a kɔ. A si a fɔ wo ye ko, “Nta alla le ile la, i yandi, n nakisi.”
18Kun-takolɔn le mɔgɔ-sufa wonu na. Anu ma a lɔn anu bi min kun na. Fan do burunnɛ anu yɛ la. Anu sɔn-kunyɛ-dɛ latogonnɛ alako anu kana na tonyɛ lɔn. 19Kun-takolɔn wo min ya bɛsɛ ladan, wo ti a fɔ ko, “N bara n gbala do la ka biredi mintan do la ka soge mintan do la. N ya a kɔlɔma-toe ma kisimiriya-fan la. N bi n nyɛnkinna kɔlɔma le dɔrɔn ye.”
20Hɛnkilimaya-sufa kɛ mani de iko mɔgɛ tenbi ta-gbangban muganna. Ala kun-takolon-miriya wo mani de iko mɔgɛ tenbi donna gbofɛ la. Dɛnbɛni-wo-dɛnbɛni sa a bolo tun. A ti ke a fɔla ko bɛsɛ min bi a bolo kɛ la, Alla ma.
Dali-Mari Wara-Koe
21Mari ko
male Isirɛla mɔgɛnu, ma yili ni to kɛ ko.
A ko ala wɔli-kɛlɛ le male la.
A ya ma dan de ka ma ma ata wɔli-kɛlɛnu na,
ado a ti nyina ma ko muk!
22A ya ma hakɛnu firan ma ma iko fɔnyɔ wa sigi banda-finyɛ kɔrɔ.
A ye a fɔla ma ye ko ma ni sɛgi a ma.
Ma lakanannɛ le ale la.
23Wole san-kolenu, wo ni wo dɛ sa-a-rɔ sewɛ bolo!
Denka-rayan-bɛnu ni anu dɛ sa-a-rɔ!
Wole kɔnkɛnu, wole gbɔngbɔn-makilannɛ, wo ni wo dɛ sa-a-rɔ sewɛ bolo!
Mari ya male ata Isirɛla mɔgɛnu kisi tumɛ min,
a ya ata kabana-koe mayira.
24Mari ko ma kisilɛ le ale la.
A ko ale le ya ma dan kebi ma ye ma na burɔ,
ado a ko ale le ya fan bɛɛ dan.
A kelen pe le ya san-kole rafulen.
A ye dugu-kole danna tumɛ min, mɔgɔ ma a madɛnbɛ.
25 #
1 Kɔrɛnti 1.20
A ko a ara yi-kɔrɔ-fɛlɛnnɛnu ma kun-takolɔnnu na.
Lole-lakɔrɔsilɛnu bi ko-natoe minnu fɔla, a ara wonu ma ko fuyi la.
A ko minnu bi anu hɛnkili mayirala, a ara wonu sɔsɔ feu,
woletɔ anu si a lɔn ko ko-fuyi le anuna hɛnkilimayɛ la.
26Kɔnɔ a ko ale nyɛrɛta wɔli-kɛlɛ wa wɔlɔyiya-kumɛ fɔ wo,
ata kilayɛ wa na ata ko-rabɛnnɛ lankɛnimaya wo,
a ko a si a ma, wo dama ni bɔ-a-la tɛrr!
A wa a fɔ ko Yerusalɛm na si fa mɔgɛnu na tun, wo si ma le.
A wa a fɔ ko Yuda nyamanita-soenu si sɔ a kurɛ la tun,
a kan wo si bɔ-a-la. Soe wonu bɔtoe le tonbonyɛ la.
27A ko a wa a karɛ laka ka a fɔ ko a ni gbala kɔgɔ-yi ma, wo si gbala todo!
28 #
2 Ko-Kɔrɔta-Karan 36.23; Ɛsira 1.2 A ko a si a fɔ Babilɔn Mansa Sairasi ye ko a ni ma mansɛ la ale ye,
wo ni a sako bɛɛ kɛ.
A ko Yerusalɛm soe ni sɔ a kurɛ la tun.
A ko fanan, Bato-Bɔn kuru ni kɛ tun.
Kuranko Common Language Bible © The Bible Society in Sierra Leone, 2006.