Aiseya 43
43
Mɔgɛnu Nakanan-Koe Yili-Madiyɛ Alla Bolo
1Isirɛla mɔgɛnuna Mari ko
ma kana kilan bawo a ye nala ma lakananna.
A ko a ara a sereka-tɔgɛ sa ma kuma.
A halalɛ le male la.
2A ko ma tenbi dumɛ tɛma, a ye ma fɛ nyɔ rɔ.
Ma kunyɛ ti to tɔrɔyɛ wo rɔ.
Hali ma tenbi tɛ tɛma, a ko ma ti mintan.
Ma kunyɛ ti to gbɛlɛyɛ wo rɔ.
3A ye wo nya na le yɔ, bawo mata Mari Alla le ale la.
Wo le, Isirɛlata Mari-sɛnimɛ le ye ma kisila.
A ko a ya Iyipiti kɛnu ma ma kunkɛ la.
Sudan nyamanɛ anubɛ Seba kɛnu fanan mara ma kunkɛ la.
4A ko a si nyamanɛ donu ma ma kunkɛ la
bawo ma wara-koe di a ye.
Ma di a ye, ado a ye ma gbiliyala.
5Ma kana kilan bawo a ye ma fɛ.
A ko a si na mala mɔgɛnu na
ka bɔ tele-bɔɛ anubɛ tele-yigi pon!
6A si a fɔ kantɔ-nyamanɛnu ye ko anu ni mala mɔgɛnu boloka.
A si a fɔ dugula-mɔgɛnu fanan ye ko mala mɔgɛnu kana na to birɛ rɔ anu bolo.
A ko mala mɔgɛnu ni sɛgi ka bɔ nyamani-yannu tɔ duninya-tonko-nanɛ bɛɛ rɔ.
7A halalɛ le male la,
ado a ya ma dan a gbiliya-koe le la.
Isirɛla Mɔgɛnu Ma-Koe Sere la Mari Bolo
8Alla ko
ata mɔgɛ bɛɛ ni kundɛn kan-tina-kelen.
Anu yɛ makanɛ kɔnɔ anu ti fen yen.
Tole ye anu bolo kɔnɔ anu ti ko lamɔɛn.
9A ko ma ni sibole bɛɛ kundɛn.
Anuna bɛsi-nyamintan si ke sinan-koe fɔla?
Ma ye koe min kun na kaka, anuna bɛsi-nyamintan ya wo rakaran nun?
Bɛsɛnu fanan ni na anu serenu na
alako ma ni a lɔn ko anu yo.
Anu ni a fɔ ko anu bara tonyɛ fɔ.
10Alla ko a sere le male Isirɛla mɔgɛnu na.
A ko a ya ma yabɔ ka ma ma ata wɔli-kɛlɛnu na.
Woletɔ ma si a lɔn ka la a la.
Wo si a lɔn wo rɔ ko ale le kelen pe le Alla la.
Alla-gbɛrɛ fenfen sa ale kɔma.
Dogbɛrɛ sa nyɔ nun, ado dogbɛrɛ sa nala mala a la.
11A ko a kelen pe le nyɔ Mariyɛ la,
ado a kelen pe si ke ma lakisila.
12Koe min bi nala mala yarɔ, ale le ya wo fɔ ma ye.
Wo kɔma, a nara ma dɛnbɛn-tinɛ koe wonu tɔ.
Sibolo-wo-sibolola bɛsɛ ma ke wɛ kɛnu mala.
A sere le male la.
13A ko Habadan-Alla le ale la.
Mɔgɔ-wo-mɔgɔ ti ke a burila ata sɛnbɛ kɔrɔ.
Mɔgɔ-wo-mɔgɔ ti ke ala ko-ladannɛ bɔla a gbɛ rɔ.
Bɔ-Koe Babilɔn Nyamanɛ Rɔ
14Isirɛlata Alla-sɛnimɛ min bi ma kisila, wo ko
a si kɛlɛ-den-siyamɛnu natugu Babilɔn kɛnu kan ma alako anu ni ma kunyɛ bɔ gbaran rɔ.
A ko a si nyɔ tarɛ dɛnu keri.
A ko nyɔ-mɔgɛnuna tolon si yɛlɛma anu bolo diyi la.
15A ko mata Mari Alla-sɛnimɛ le ale la.
A ko ale le ya male Isirɛla mɔgɛnu dan ka ma mala mansɛ la.
16Bi ko ma, Mari ya kilɛ laka kɔgɔ-yi rɔ.
A ya kinna-kilɛ sa yi-makawanɛ tɛma.
17A ya a ma, kɛlɛ-den-makawanɛnu kunyɛ tora-a-rɔ nyɔ,
ado kirindi anubɛ soenu siya anu tɔ.
Wonu buira, ado anu ma ke anu nasɔla tun.
Anu wara-koe kara-a-la iko lɛnpu wa dufen dɔfɛ!
18Kɔnɔ Mari ko
ma kana ma dun ko-tenbinɛnu na.
Ma yili kana to ko-tenbini-kɔrɛnu dɔrɔn ko.
19A ye nala ko-kurɛ minnu kɛla, a ko ma ni ma yɛ bɛn wonu ma,
ado a ara ban anu dabirala. Ma ni ma yɛ laka, ma si anu yen.
A ko a si kila-gbonkan-bɛ sa wulɛ rɔ
ka yinu natugu a rɔ nyɔ.
20A ko yi-wa sa nyɔ kuma male ata mɔgɛnu ye,
hali bintɔ-sogenu si a gbiliya.
Sulukinu anubɛ selekonanu si a gbiliya.
21Ata mɔgɔ-dannɛ le male Isirɛla mɔgɛnu na,
ado ma ni to a matɔgɔ-siginu sala.
Isirɛla Mɔgɛnu Hakɛ Wara-Koe
22Mari ko
male Isirɛla mɔgɛnu sa a batola tun
bawo ma sa ma muinna a kɔrɔ.
23A ko ma ara ma ban nala saraka-sagɛnu na minnu bi mintanna a ye.
Ma ma sɔn a gbiliyala sarakɛnu na tun.
A ko ale ma dunu sa ma kuma ka to ma manyinikala sɔli-fannuna ko ma.
A ma to ma fɔrɔsɛla isɛnti mintan ko ma ka ma labandan wola ko la,
24woletɔ ma sa isɛnti sanna a ye tun.
Ma sa a wasa-koenu kɛla ka to sogo-kɛɛn dila a ma.
Kɔnɔ ma ara to ma hakɛ-dunɛnu sala a kuma.
A ko ma ara to ko-yogomɛnu sigila a kuma min kɛ, wo ara a labandan.
25Kɔnɔ hali wo, a ko ma hakɛ-makotolɛ le ale Mari la.
A ko a ye wo mala le ka a tɛgɛ a nyɛrɛla ko ma.
A ko a ti ma bira ma hakɛ-yili la.
26Mari ko ma dama ni ta kiti-bɔn la ka a maburi nyɔ rɔ.
Ma ni mala kiti layɛlɛ ka a yira ko yoe ye ma bolo.
27Ma benba-fɔlɔfɔlɛnu ya hakɛ kɛ.
A ko mala kun-tiginu murutiyara a ma fanan.
28Mala mɔgɔ-banu ya a bato tinɛ latinya.
Ka a tɛgɛ koe wonu ma, a ya kasarɛ lana male Isirɛla mɔgɛnu kuma.
A ya a ma, male ala mɔgɛnu tora yarabiyi rɔ.
Kuranko Common Language Bible © The Bible Society in Sierra Leone, 2006.