Aiseya 34
34
Alla Yogenu Tɔrɔ-Koe
1Wole sibolo-gbɛrɛnu, wo dama ni na ka wo tole masɔ. Mɔgɛ min bɛɛ ye dugu-kole kuma, wo ni na ka wo tole masɔ. 2Mari ara diminya sibole bɛɛ ma anubɛ anuna kɛlɛ-dannu. A ara anu dama kasara-koe latɛgɛ. 3Anu togonna fenfen ti taran. Anu tulinɛ si to sani fɔ anu sumɛ min bi bɔla. Kɔnkɛnu si wulen anu yele bolo. 4#Matiyu 24.29; Maraka 13.25; Luka 21.26; Lankɛnimayɛ 6.13-14 San-kole si tunu yen, iko gbolo-kolonɛ la wa mini. Tele wo, karɛ wo, lolenu wo, wo bɛɛ si bunden. Lolenu si to yalanna iko toro-gbɔɛ anubɛ a yanbɛ si a ma nya min.
5Mari ara ala faan sagan a lɛɛ rɔ san-kole rɔ. A ye nala Idɔm kundu bɔla, ado a ara kasarɛ wara-koe fɔ mɔgɛ kɛnu ye nun. 6Anu kɛɛn anubɛ anu yele si don faan wo ma iko saraka-masɔlɛta saraka-boso-muri. Mari si sarakɛ kɛ bɔ Bɔsira soe burɔ, ado kɛ si ma kan-natɛgɛ-ba la Idɔm nyamanɛ rɔ. 7Mɔgɛnu si to buila iko ninki-feremɛ anubɛ tura-bulan si bui nya min bosoli-kɛlɛnu bolo. Anu yele si dugi wo wulen. Anu kɛɛn si nyɔ yamatogon. 8Mari si ata kɔnkɔ-sɛnimɛ lakanan wati kɛ le tɔ ka ala mɔgɛnuna yili sara anu yogenu na.
9Idɔm bɛnu si ma nagatikali, iko kolota.#34.9 Kolota: Tubabu-kan le wo la. Anu si fen-finmɛ wo sa kila-wɛ ma dugula. Nyɔ-dugi si yɛlɛma munku-gbɛ la. Nyamanɛ wo mumɛ si mintan iko ta-yi le rawuyanɛ a ma. 10#Lankɛnimayɛ 14.11; 19.3 Tɛ si to sigini a la dɔnkɔnyɔ, su-ni-tele. A sisi si to yɛlɛla kulakula! Nyamanɛ tinyanɛ si to burubukai! Mɔgɔ-wo-mɔgɔ ti tagama nyamanɛ wo rɔ tun! 11Nyamanɛ wo si ma gbingbinnyagan anubɛ mansa-wala-konanu nyagan sa tinɛ la. Duduyi-gbansan si to nyɔ. Mari si a ma wula-da-rakolɔn la. 12Mansa ti taran Idɔm nyamanɛ wo rɔ, ado a kun-tigi bɛɛ ara ta bɛɛ ta tinɛ. 13Wɔnɔ-sufa bɛɛ si fɛrɛn kun-tiginuna bɔn la anubɛ tarɛ mininɛ soe minnu ma. Fɔ sulukinu anubɛ gbingbinnyagan denu dɔrɔn si taran nyɔ. 14Sogo-feremɛnu si to yilan-yilanna nyɔ. Nyinɛnu si to anu nyɔgɔn takelela nyɔ. Nyina-musu-kɔrɛ si to tala a sulenna nyɔ. 15Gbingbinnyagannu si anu nyagan sa nyɔ ka anu kili sa ka anu natii. Anuna dannu si koloya nyɔ. Nyɔ si ma dogɛnu bara la.
16Wo ni Marita dali-fannuta buku bi ka a karan. Nima-fan kɛ su bɛɛ si taran nyɔ. Nima-fan bɛɛnubɛ ala musi si taran nyɔ. Mari nyɛrɛ ara ban a latɛgɛla wo nya na le. Ale nyɛrɛ-nyɛrɛ le si anu kele nyɔ. 17#Aiseya 63.1-6; Yɛrɛmaya 49.7-22; Isikiyɛli 25.12-14; 35.1-15; Emɔsi 1.11-12; Hɔbadaya 1-14; Malakayi 1.2-5 Mari si nyamanɛ wo ratala nima-fan wonu na. Bɛɛ si ata sɔrɔn. Nyɔ si ma anu halalɛ la. Anu si to sigini nyɔ tolon!
Kuranko Common Language Bible © The Bible Society in Sierra Leone, 2006.