Ɛsita 9
9
Yahudiyanu Yogenu Nɔ-Koe
1San wo karɛ tan-ni-filɛ min tɔgɛ Adari, wo tele tan-ni-sawa nyɔgɛ kera. A bɛnta, Yahudiyanu na ni to tele kɛ le ma iko mansɛta tɔn ya a fɔ nya min. Wo tele nyɛrɛ rɔ nun, Yahudiyanu yogenu miri ko anu si anu nato tele wo le ma kɔnɔ tunbi sara a tɛrɛna anu bolo bawo Yahudiyanu ya anu nɔ. 2Yahudiyanu ya anu tabɛn Mansa Sakasila nyamani-soe wonu tɔ anu yogenu kan ma, minnu bi bagala anu ma, kɔni. Sibolo-gbɛrɛkɛ ma sisi anu na tun bawo anu bara kilan anu na. 3Nyamanɛ wo mɔgɔ-ba-malɔnnɛnu wo, anubɛ mɔgɔ-ba-toenu wo, wonu damasi ya Yahudiyanu dɛnbɛ bawo anu kilannɛ Mɔdekɛyai la. 4Ale Mɔdekɛyai, mɔgɔ-ba le ale la mansɛla bolɔn la, ado a sɛnbɛ ma ye tala kofula. A mankan ye tala nyamanɛ wo tonko nanɛ bɛɛ rɔ. 5Yahudiyanu ya anu yoge bɛɛ nɔ ka anu kasara iko a di anu ye nya min.
6Hali anuna so-karantan Susa, Yahudiyanu ya anu yoge mɔgɔ kɛmɛ loli faga nyɔ. 7-10Hamidetala den Heman, wola den-kei mɔgɔ tan wonu bi mɔgɔ kɛmɛ lolɛ kɛnu tɔ. Wonu tɔgɛ le kɛnu na, Parasandɛta, Dalafoni, Asipeta, Pɔrɛta, Adelaya, Arideta, Parimasata, Arisayi, Aridayi anubɛ Fayisata. Kɔnɔ Yahudiyanu ya min faga, anu ma anu bolo-fan fenfen bi.
11Anu ya mɔgɛ min nyɔgɔn faga Susa soe burɔ, anu ya wo fɔ mansɛ ye tele wo nyɛrɛ rɔ. 12Wo kɔma, mansɛ ya a fɔ Ɛsita ye ko, “Susa soe kɛ burɔ, Yahudiyanu bara mɔgɔ kɛmɛ loli faga. Hemanna dan mɔgɔ tan bi anu tɛma. Kama, kuma le nyamani-tonke doinu ma wo rɔ?” Mansɛ ya Ɛsita manyinika ko, “I ye nyinina nfen ma n bolo gbɛ? A fɔ n ye. I si a sɔrɔn.”
13Ɛsita ko, “N tigi, ni i si sɔn, Yahudiyanu bara min nyɔgɔn ma bi Susa soe burɔ, anu ni wo nyɔgɔn ma sina fanan. A ma, anu ni Hemanna dan mɔgɔ tan wonu dun kan tinɛ wo la a ya min nadan.”
14Mansɛ ya a fɔ ala mɔgɛnu ye ko anu ni a ma iko Ɛsita ya a fɔ nya min. Anu ya a mayon Susa soe burɔ. Wo kɔma, anu ya mɔgɔ tan wonu furi dun, mɔgɛ bɛɛ si anu tagbɛ kan min. 15Karɛ wo tele tan-ni-nanɛ ma Yahudiyanu ya anu kundɛn ka mɔgɔ kɛmɛ sawa faga Susa soe burɔ wulɔn-tele rɔ. Kɔnɔ Yahudiyanu ya a ma iko anu ya a fɔlɔtɛ ma nya min. Anu ma anu bolo-fan fenfen bi.
16-17Yahudiya minnu basannɛ anuna nyamanɛ wo la, wonu tora anu yogenu fagala alako anu ni anu nyɛrɛ niyi kumafunfan. Karɛ wo tele tan-ni-sawɛ ma, anu ya anu yoge mɔgɔ waga bi-wɔrɔnfila ani mɔgɔ waga loli (75,000) faga kɔnɔ anu ma anu bolo-fan fenfen bi. A tele tan-ni-nani nyɔgɛ ma, anu ya anu sulen ka wo ma anu nyɛrɛta ladiya-tele la. 18Kɔnɔ Yahudiya minnu bi Susa soe burɔ, wonu ya anu sulen a tele tan-ni-loli nyɔgɛ ma ka wo ma anu nyɛrɛta ladiya-tele la bawo anu ya anu yogenu faga a tele tan-ni-sawa nyɔgɛ anubɛ a tele tan-ni-nani nyɔgɛ le ma. 19Kɔnɔ Yahudiya minnu siginɛ nyamanɛ wo so-mɛsɛnɛnu tɔ, wonu bi ladiyɛ kɛla a tele tan-ni-nani nyɔgɛ le ma. Wulɔn-tele tora mala anuna tolon-tele la ka to anu nyɔgɔn kɔla.
Koron-Nakɛ-Tele-Ladiyɛ Wara-Koe
20Mɔdekɛyai ya a ma, anu ya koe kɛ damasi sɛbɛ. Wo kɔma, a ya kɛdi-gbɛrɛkɛ sɛbɛ ka wo ranyɛnsɛn Yahudiya wonu na minnu bɛɛ basannɛ Mansa Sakasila nyamanɛ wo la. 21Min sanɛ kɛdi wo rɔ, a ko, san wo karɛ tan-ni-fila nyɔgɛ min tɔgɛ Adari wo tele tan-ni-nanɛ anubɛ a tele tan-ni-lolɛ ma, Yahudiya bɛɛ ni wo ma anuna ladiya-tele la san-bo-san 22bawo anu ya lafɛrɛ sɔrɔn anu yogenu bolo tele filɛ wo le ma. Anuna kɔndɔfili anubɛ anuna yakɔrɔ-mamɔɛ mara anu bolo kun-nadiyɛ la karɛ wo le la. A sɛbɛnɛ a rɔ fanan ko anu ni ladiyɛ anubɛ tolɔn kɛ wulɔn ka to anu nyɔgɔn kɔla katarala bolo-kolɔnnu ma. 23Yahudiyanu ya a ma iko Mɔdekɛyai ya a fɔ nya min. San-bo-san, anu si ladiyɛ wo kɛ.
24 #
Ɛsita 3.7
Yahudiyanu gboyanɛ Heman min ye nun, wo le ya korɔn lakɛ#9.24 Korɔn lakɛ: Ni i ya a lamɔɛn Hiburu-kan rɔ ko, “Purim,” koron-nakɛ le wo la. wo san la alako a ni a lɔn anu si Yahudiyanu nato tele min ma. 25Wo kɔma, Ɛsita tara mansɛ taran. A ya sereya do sɛbɛ. Heman ya gbɛrɛ min nasigi Yahudiyanu ye, anubɛ ala dannu birara wo le la ka anu dun mɔgɔ dun tinɛ wo la, a nyɛrɛ ya min nadan ala bɔn dafɛ. 26Woletɔ anu ya Sulen-Tele wonu kele ko koron-nakɛ-telenu. Ka a tɛgɛ Mɔdekɛyaila kɛdi wonu ma anubɛ min bɛɛsi mara Yahudiyanu na, 27wo le ya a ma, Yahudiyanu ya tele filɛ wonu ma anuta Sulen-Telenu na san-bo-san. Anu denu si wo bira, anu kegeyɛnu si wo bira, min fanan ba yɛlɛma Yahudiya la, wonu si Mɔdekɛyaita tɔn wo bira ka a ma anuna namunyɛ la. 28Anu dama sɔnta ko Yahudiya bɔnsɔn-mɔgɛ bɛɛ ni namunyɛ kɛ bira hali minnu ma sɔrɔn bɛ. Anu ni tɔn kɛnu bira anu siginɛ kan-bo-kan. Anu ni to anu sulenna tele filɛ wonu ma ha duninya si ban alako anu kana nyina.
29Abihelila dunmusu, mansɛla musi Ɛsita kɛ, wonu denubɛ Mɔdekɛyai ya kɛdi-gbɛrɛkɛ sɛbɛ. Ale fanan ya ala musu-mansaya-fanka sa-a-rɔ ka a tɛgɛ anuta koron-nakɛ-tele wo ma, Mɔdekɛyai ya minna ko sɛbɛ nun. 30A ya kɛdi wonu nata Yahudiyanu ma nyamani-kun kɛmɛ ani nyamani-kun mogan-ni-wɔrɔnfilɛ bɛɛ (127) rɔ. Min sanɛ kɛdi wonu tɔ ko alamɛ wonu ya latankɛ anubɛ yisi-kimɛ sɔrɔn. 31Ale nyɛrɛ ya a fɔ kɛdi wo rɔ ko anu denubɛ anu kegeyɛnu si tele-fila-tɔn kɛ ma anuna namunyɛ la iko anu si sun-don-telenu anubɛ diyi-kɛ-telenu bira nya min. Ɛsita anubɛ Mɔdekɛyai kan bɛnta ko kelen ma. 32Ɛsitala kɛdi kɛ ya Sulen-Tele kɛnu ko banban ka anu sɛnbɛ don. Anu ya kɛdi wo bi ka a kofu nyamanita kɛdi wonu ma.
Kuranko Common Language Bible © The Bible Society in Sierra Leone, 2006.