Ɛsita 5
5
Mansɛ anubɛ Heman Kele-Koe Ladiyɛ rɔ Ɛsita Bolo
1Anuna sun-don-tele sawɛ da-fara lunyɛ min, Ɛsita ya a layɛlɛ ala musu-mansaya-mirannu tɔ. A tara a sɔ kata burɔ bolon-don-dɛ la mansɛ si a ragbɛ kan min. Wo ya a taran, ala kei Mansa Sakasi siginɛ ala mansaya-waganɛ rɔ bolɔn burɔ. A yɛ lamununnɛ bolon-don-dɛ wo la. 2Mansɛla musi Ɛsita yen Mansa Sakasi bolo, a wara-koe diyara a ye. A ya ala sɛnɛ-kɔlɔma telen a la alako ka a yira ko a ma ko tinya. Ɛsita fanan tara a bole tugu sɛnɛ-kɔlɔma wo sungban la.
3Mansɛ ya a manyinika ko, “Ɛsita, nfen mara? Ni i ye nyinina min ma n bolo, wo fɔ n ye. Hali nna nyamani-talɛ, n si a di i ma.”
4Ɛsita ya a fɔ a ye ko, “N tigi, ni i si sɔn, wobɛ Heman ni ta fen dɔn tinɛ n barɛ, n bara min tabɛn wo ye.”
5Mansa Sakasi ya Heman kele tiriya! Anu tara fen dɔn tinɛ Ɛsita warɛ. 6Anu ban fen dɔn la, anu bi fen minyɛ kun na gbɛ, mansɛ ya Ɛsita manyinika tun. A ko, “Ni i ye nyinina min ma n bolo, wo fɔ n ye. I ye nyinina fenfen ma, n si wo di i ma. Hali nna nyamani-talɛ, n si a di i ma.”
7Nba, Ɛsita ya a fɔ a ye ko, 8“N tigi, ni n bara-koe ya i hɛnɛ, ado n di i ye, n bi dɔn-fan min tabɛnna, wobɛ Heman ni na wo dɔn yan tɔ sina. N bi nyinina min ma, n ni na to wo fɔla i ye.”
Yanfɛ Don-Koe Heman Bolo Mɔdekɛyai Faga-Koe Rɔ
9Heman bɔmatoe Ɛsita warɛ fen dɔn tinɛ, a nyagalennɛ a yisi rɔ bɛrɛkɛ! Kɔnɔ a ya Mɔdekɛyai taran bolon-don-dɛ la min kɛ, wo ma a lasɔ ka a gbiliya, wo ya a ma, Heman yisi bɔra dɔgɔma-ma-de! 10Kɔnɔ a ya a bira a rɔ. A tara bɔn la. A ya a diyana-mɔgɛnu kele a warɛ bɔn la. A ya ala musi Sirɛsi fanan kele. 11A ya a nyɛrɛ matɔgɔ wonu ya la. Nɔnfuli min nyɔgɔn yirika ye a bolo wo, den-kei min nyɔgɔn ye a bolo wo, mansɛ ara ala sɔ tinɛ mayɛlɛ nya min wo, a tenbira mansɛla mɔgɔ-ba doinu na nya min wo, a ya a yonkan kɛ damasi la.
12Ale Heman ya a fɔ tun ko, “Min tenbira kɛ dama la, mansɛla musi Ɛsita ya dɔn-fen-belebele rabɛn mabɛ ala kei dɔrɔn ye, ado sina fanan, ma ye tala fen dɔn tinɛ nyɔ le tun. 13Kɔnɔ fananta n yɛ ye Mɔdekɛyai Yahudiya wo la mansɛla bolon-don-dɛ la, wo fenfen ti n yisi sa.”
14Ala musi anubɛ a diyana-mɔgɛnu ya a fɔ ko, “Nfenna i ti mɔgɔ dun tinɛ ladan, Mɔdekɛyai kɛ si dun kan min? Wola yanyɛ ni ma nunkan-nya bi-sawa ani nunkan-nya wɔrɔ la. Sina sɔgɔma, i ni ta a fɔ mansɛ ye alako a ni Mɔdekɛyai dun wo la. Wo wa ka a la, i sewanɛ si ta mansɛ fɛ musi wo warɛ fen dɔn tinɛ.” Heman mirinɛ ko anu bara kuma-telennɛ le fɔ a ye wo la. A ya mɔgɔ dun tinɛ wo ladan.
Kuranko Common Language Bible © The Bible Society in Sierra Leone, 2006.