Ɛsita 4
4
Ɛsita Manyinika-Koe Yahudiyanu Dɛnbɛn-Koe La
1Kuma sufa wo lamɔɛn Mɔdekɛyai bolo, a ya ala duruki rafara yisi-tinya bolo. A ya kasa-kurɛ kɛ a ma. A ya ta-gbangban kɛ a kunyɛ rɔ. A ya soe bira diyi-kɛ anubɛ woronde la a bolo. 2A nara worondola ha mansɛla tenbi-bolɔn la. A ma don bolɔn burɔ bawo ni kasa-kurɛ ye mɔgɛ min ma, wo ti don nyɔ. 3Mansɛla kɛdi wo ara ke nyamanɛ wo tonke min bɛɛ rɔ, Yahudiyanu worondora kan tinɛ wo bɛɛ rɔ. Anu dira ka sunyɛ don. Anu siyaman ya kasa-kurɛ kɛ anu ma ka anu sa ta-gbangban rɔ.
4Kei anubɛ musi minnu bi wɔlila Ɛsita ye, wonu tara a fɔ ale Ɛsita ye ko kasa-kurɛ donnɛ Mɔdekɛyai kan na. Wo ya a yisi tinya. A ya kurɛ donu nata Mɔdekɛyai ye alako a ni kasa-kurɛ wo bɔ a kan na kɔnɔ Mɔdekɛyai ma sɔn kurɛ wonu na. 5Mansɛ ya wɔli-kɛlɛ min don a bolo, Ɛsita ya wo do kele. Wo tɔgɛ le Hetaki. A ya a fɔ wo ye ko a ni ta Mɔdekɛyai manyinika ni min bara ma. 6Hetaki wo tara Mɔdekɛyai taran barɛ tɛma bolon-don-dɛ telen tɔ. 7Min bara ma, Mɔdekɛyai ya wo bɛɛ rakaran a ye. Heman ya mansɛ yili-madiya wodi min nyɔgɔn yirika la, ni anu ya Yahudiyanu faga, a ya wo fanan takaran a ye. 8Yahudiyanu faga-koe min sɛbɛnɛ Susa soe burɔ, Mɔdekɛyai ya wo do don a bolo ko a ni ta a to Ɛsita ma. A ya a fɔ wo ye ko a ni ta a fɔ Ɛsita ye ko Ɛsita ni ta ala kei Mansa Sakasi madiya alako a ni kinikini ale Ɛsitata mɔgɛnu ma. 9Hetaki tara a dantɛgɛ Ɛsita ye. 10Ɛsita fanan ya a sara Hetaki la Mɔdekɛyai wara tun. A ko, 11“Kei wo, musu wo, ni min tara a labɔ mansɛ ma, a ma min kele, anu si wo tigi faga. Ka a bi mansa-makawandilɛnu ma ha ka yigi, bɛɛ ya sereya wo lɔn. Kɔnɔ ko kelen de ye sereya kɛ ma, ni mansɛ ya ala sɛnɛ-kɔlɔma telen min na, mɔgɛ wo ara kanan. Kɔnɔ a ara karɛ kelen bɔ, mansɛ ma n kele.”
12Ɛsitala kilayɛ wo lamɔɛn Mɔdekɛyai bolo, 13Mɔdekɛyai fanan ya a sara ka a fɔ a ye ko, “I kana i hɛnkili latɛgɛ bawo i ye mansɛla bolɔn la, ni Yahudiya le i la, fɔ anu ba ile fanan faga. 14Kɔnɔ ni a siginɛ tora a la i bolo kaka, dɛnbɛnɛ si bɔ Alla bolo kan tinɛ do rɔ ka Yahudiyanu kunyɛ bɔ a rɔ kɔnɔ wolebɛ i kebila-kunyɛ si to-a-rɔ dogbe! Tumado, i mara mansɛla musi la kɛ lela ko la. Mɔgɔ ma a lɔn.”
15Kumɛ kɛ lamɔɛn Ɛsita bolo, Ɛsita fanan ya a sara Mɔdekɛyai wara tun, a ko, 16“Yahudiya min bɛɛ ye Susa soe kɛ burɔ, i ni wonu kundɛn kan-tina-kelen. Wo ni sunyɛ don ka Alla matara n ye tele sawa su sawa kɔrɔ. Malebɛ nna bonna-wɔli-kɛla-musinu si sunyɛ don ka matarali kɛ fanan. Wo kɔma, n si ta mansɛ taran hali n ya tɔn tinya. Ni n kunyɛ tora-a-rɔ, ale le wo la.”
17Mɔdekɛyai tara a ma iko Ɛsita ya a fɔ a ye nya min.
Kuranko Common Language Bible © The Bible Society in Sierra Leone, 2006.