Emɔsi 3
3
1“Woletɔ wole Isirɛla mɔgɛnu, a ya wole min nana ka bɔ Iyipiti, kɔni, Mari ye nala kumɛ min fɔla wo kan ma, wo ni wo tole masɔ wo la. 2Mari ko wole Isirɛla mɔgɛnu di ale ye ka tenbi sibole bɛɛsi la duninya rɔ. Mari ya wole le dɔrɔn yabɔ ka wo fɛ-bira. Wo le ya a ma, wola hakɛ ara yogoya a ya la dɔgɔma-ma-de! Woletɔ a ko a fɛrɛ sa fɔ a wa wo tɔrɔ.”
Nɛbiya-Kumɛnu
3Nɛbi Emɔsi ko tun
ni mɔgɔ fila ma anu tabɛn tagamanta ta-koe rɔ, anu si ke tala anu nyɔgɔn fɛ, wa?
4Yarɛ si wɔrɔndɔ wo nya na ni a ma kɛ fen ma?
Yarɛ si wɔrɔndɔ-wɔrɔndɔ faran la ni a ma fen bira, wa?
5Mɔgɛ si kona taran kose la ni i ma dɔn-fan sa nyɔ?
Gbɛrɛ la si foo a nyɛrɛ ma ni fan do ma a lafoo?
6Kɛlɛ-buri si fɛ soe burɔ, a ni to, mɔgɔ ma kilan?
Soe do si halaki a nyɛrɛ ma, ni Mari ma sɔn min ma?
7-8Ni yarɛ wɔrɔndɔra, mɔgɔ kuma ti kɔ, wa?
Allatala ti ko-wo-ko ladan a ti min kɔrɛ fɔ male nɛbinu ye.
Woletɔ ni Allatala kumara, male nɛbinu ti a kuman-kan latenbi, wa?
Isirɛla Mɔgɛnu Halaki-Koe
9Nɛbi Emɔsi ya Mari kuman-kan natenbi Iyipiti mansɛ ma anubɛ Filisitinuna mansɛ ma min siginɛ Asadadi soe rɔ. A ko, “Mari ko nyamani-kun filɛ kɛ mɔgɛnu ni anu nadɛn kɔnkɛnu kuma Samariya soe dafɛ ka anu yɛ bɛn Isirɛla mɔgɛ wonu ma, anu bi ko-yogoma-sifa minnu mala.
10“Mari ko wo si a yen, anu bi anuna bon-hakikɛnu nafala kankanya-fannu na. Anu bi buila mɔgɛnu ma ka fan wonu bi anu bolo. Anu ma telenbagaya-kilɛ lɔn muk! 11Tamayi-wo-tamayi sa a rɔ, anu yogenu si na ka anuna nyamanɛ bira-a-la. Anu yogenu si anuna tarɛnu tugu a ma ka anu keri ka anuna bɔnnu tii.”
12Ni saga-fɛ-biralɛ si ke saga-woro kolo filɛ wa a tolo-lafɛlafɛ bila yarɛ dɛ la, mani Samariya kɛnu Isirɛla mɔgɛnu, kɔni, wonu si ke anu burila anu yogenu kɔrɔ, ado anu sanɛ anuna sa-fen kiannu na anu kin kɔrɔ.
13Mari Sɛnbɛ-Bɛɛ-Tigi ya a fɔ ko wo ni wo tole masɔ ka Yakoba kegeyɛnu makawandi. 14#2 Mansɛnu 23.15 Wo ni a fɔ anu ye ko Mari wa na anu tɔrɔ tinɛ tumɛ min anu hakɛla ko la, a si anuna saraka-mintan-tinɛ tinya min bi Bɛtɛli soe burɔ. A si anuna saraka-mintan-tinɛ bolon nanɛ keri, mɔgɛnu si anu dun min na anu niyi kisi-koe la. 15Mari ko a si anuna bɔn damasi tinya, a mara a kinama la wo, a mara a dɔgɔma la wo. Hali anuna bon-hakikɛ minnu tabɛnnɛ sogo-ba-nyin-malɛsɛnɛnu na, wo damasi si tinya pɔ!
Kuranko Common Language Bible © The Bible Society in Sierra Leone, 2006.