Emɔsi 2
2
Mohabu Mɔgɛnu
1 #
Aiseya 15.1–16.14; 25.10-12; Yɛrɛmaya 48.1-47; Isikiyɛli 25.8-11; Sɛfanaya 2.8-11 “Mari ko wole Mohabu mɔgɛnu, wo ara hakɛ dan-natenbi, ado a si wo tɔrɔ, yɔ! Wo ya Idɔm mansɛ kanbɛ laka ka a kolenu nabɔ. Wo ya anu mintan gburr, alako Idɔm nyamanita-mɔgɛnu ni yarabi. 2Woletɔ a ko a si tɛ layigi Mohabu nyamanɛ rɔ ka wola so-latankanɛ, Kɛriyoti mintan. Hali wola kɛlɛ-kurugbɛnu tenbi sɔnkɛ anubɛ buri-fɛ kun na, wole Mohabu mɔgɛnu si na faga kɛlɛ-kɛ-tinɛ. 3Mari ko a si Mohabu mansɛ anubɛ ala mɔgɔ-banu faga.
Yuda Mɔgɛnu
4“Mari ko wole Yuda nyamanita-mɔgɛnu, wole ara hakɛ dan-natenbi, ado a si wo tɔrɔ, yɔ! Mari ko wo ara ale nyɛrɛta karan lɔn fufafuyi la ka tɛgɛ a rɔ. Wo ye bɛsɛnu kɔla iko wo benbanu ya a ma nya min. 5Woletɔ a si tɛ layigi Yuda nyamanɛ kuma ka wola so-latankanɛ, Yerusalɛm mintan.”
Isirɛla Kiti-Koe Alla Bolo
6“Mari ko wole Isirɛla mɔgɛnu, wole fanan ara hakɛ dan-natenbi, ado a si wo tɔrɔ, yɔ! Hali bolo-kolɔn minnu bi wo tɛma, wonu natelennɛ kɔnɔ hali sanbara-sɔnkɛ, anu ti ke wo sɔrɔnna. Wole ye bolo-kolɔn wonu mala yɔɔnnu na ka anu mayira ka a tɛgɛ anuna yilinɛnuna ko ma. 7Wo ye bolo-kolɔnnu natosokɔrɔla ka tagama anu kuma.
“Wola yɔɔn-musi minnu bi wo tɛma, fa wo, ala den wo, anu filɛ ye anu sala wonu fɛ. Wola ko-ladan-bole wo ara ma Mari tɔgɔ-tinya-koe la. 8Bolo-kolɔnnu bi anuna birinkan sigila wo ma tulumɛ la, wo sa wonu nasɛgila anu ma wurɛ la, ado wo ye wonu sala wo kɔrɔ hali wola batoli-kɛ-tinɛnu tɔ. Wo ye mɔgɛnu bɔnina wodi minnu na, wo ye wonu sanna gbɛɛ la ka ta a min wota bɛsi-kɔ-bɔnnu tɔ.
9-10 #
Tɔn-Fɔɛ-Fila-Nyɔgɛ 3.8-11
“Mari ko hali wo, wo ni la a la ko ale le nara wo la ka bɔ Iyipiti nyamanɛ rɔ. San bi-nani, a sɔnɛ wo yarɔ wulɛ rɔ. Wo ni wo miri wo yogenu ma, Amoranu, kɔni. Anu yan, anu kolo, anu tagbɛlɛ kɔnɔ Mari ya anu halaki wolela ko la. A ya anuta nyamanɛ di wo ma ka a ma wo halalɛ la.
11 #
Yilan-Yilan Koe 6.1-8
“A ya wola dan donu ma nɛbinu na ka donu ma mɔgɔ-dantɛgɛnɛnu#2.11 Mɔgɔ-dantɛgɛnɛnu: Kɛnu bi Nansaran Lanyiri kɔrɔ ko anu kana gbɛɛ min, anu kana anu kun-sigi matɛgɛ, anu kana anu bole tugu furi la. na. Wole Isirɛla mɔgɛnu, wo ya a lɔn ko Mari ye tonyɛ fɔla wo ye, nyɛ? 12Kɔnɔ wole Isirɛla mɔgɛnu bi a fɔla nɛbinu ye ko anu kana Marita sarakanɛ fɔ mɔgɛnu ye. Wo ya gbɛɛ di mɔgɔ-dantɛgɛnɛnu fanan ma. 13Mari ko a si wo digin dugu la ha wo ni kurun iko dunu-bilɛ wa dunɛ bi, a ti min nɔ. 14Hali buri-kɛla-wɛnu, wonu kian ra si faga kuluba! Fanka-tiginu si fɛya iko duduyi. Kɛlɛ-dan minnu bɛnta ka mɔgɔ-gbɛrɛnu nakisi, wonu ti ke anu nyɛrɛ gbuyɛ lakisila. 15Hali kalabɛn-nakɛlɛnu ti ke anu sɔla anu gba kelan tɔ ka anuna kalabɛn nakɛ buri bolo. Minnu kian ragbɛlɛ buri-kɛ-tinɛ, wonu ti ke anu nyɛrɛ lakisila. Hali so-laburila-wɛnu ti ke anu nyɛrɛ niyi lakisila. 16Wo tɔrɔ-wati wa ke tumɛ min, hali kɛlɛ-kurugbɛ minnu kerinte wo tɛma, wonu si anuna kɛlɛ-kɛ-fannu boloka ka anu buri. Mari nyɛrɛ-nyɛrɛ ya kɛ le fɔ.”
Kuranko Common Language Bible © The Bible Society in Sierra Leone, 2006.