2 Samuwɛli 9
9
Mansa Dawuda anubɛ Yonatanna Dan Wara-Koe
1 #
1 Samuwɛli 20.15-17
Lunyɛ do, Mansa Dawuda ya nyinikalɛ sa. A ko, “Mansa Sɔli ya mɔgɛ do to le a kɔma, wa? Ni mɔgɛ tora le, a sɔgɛ ye n na, n ni ko-nyimɛ kɛ wo tigi ye Yonatanna ko la.”
2Mansa Sɔlila bonna-wɔli-kɛlɛ do ye nyɔ, wo tɔgɛ le Saiba. Anu ya a fɔ wo ye ko, “Ta Mansa Dawuda wara.” Saiba wo ke nyɔ, mansɛ ya a manyinika ko, “Saiba le ile la?”
Saiba ko, “Ɔn, wo le nde la yɔ, ila keminɛ, kɔni.”
3 #
2 Samuwɛli 4.4
Mansɛ ya a manyinika tun ko, “I ya Mansa Sɔlila kebila-mɔgɛ do lɔn min bi a kɛndɛ la kaka? N bi a fɛ ka ko-nyimɛ kɛ wo ye iko n bara lanyiri kiri Alla ye nya min nun”
Saiba ya a fɔ a ye ko, “Yonatanna den kelen de nyɔ. Namarɛ le wo la.”
4Ale mansɛ ko, “Wo ye mintɔ?”
Saiba ko, “A ye Amiyɛlila den Makiri bolo Lodiba soe burɔ.” 5Ale Mansa Dawuda ya mɔgɛ lata a bi tinɛ.
6Yonatanna den Mɛfibasɛti, Sɔli mamanɛ, kɔni, wo nanɛ, a ya a madu Mansa Dawuda kɔrɔ ka a gbiliya. Mansɛ ya a fɔ a ye ko, “Mɛfibasɛti le ile la, wa?”
A ya a labira. A ko, “Ɔn. Ila keminɛ le nde la.”
7Mansa Dawuda ya a fɔ a ye ko, “Hali i ma kilan. N si ko-nyimɛ kɛ i ye ka a tɛgɛ i fa Yonatanna ko ma. N si i benba Mansa Sɔli halala-dugi bɛɛsi lasɛgi ile ma. N si a ma, ma ni to ma de-nyinina kan-tina-kelen.”
8Mɛfibasɛti ya a madu a kɔrɔ tun. A ko, “N tigi, wulu-suyi tenbira nde la. Nfenna i ye ko-nyimɛ kɛla nde ye?”
9Saiba min bi Mansa Sɔlila bonna-wɔlɛ kɛla nun, Mansa Dawuda ya wo kele. A ya a fɔ a ye ko, “N si i tigi anubɛ ala denbayɛnu halala-fan bɛɛsi lasɛgi a mamanɛ kɛ ma. 10Wobɛ ila dannu anubɛ wola yɔɔnnu si to wɔlila wo tigi Mansa Sɔlila dugi rɔ. Wo ye ki-fan minnu tɛgɛla nyɔ, wo si na wonu na ka wonu ma Mansa Sɔlila denbayɛ beli-fan la. Kɔnɔ malebɛ ale Mɛfibasɛti si to fen-dɔn-kɛla kan-tina-kelen.” (Den-kei tan-ni-loli le Saiba bolo nun. Wo kɔma, yɔɔn mɔgɔ mogan de ye a bolo fanan.)
11Saiba ko, “N tigi, i ya fenfen fɔ, n si wo ma le.”
Mɛfibasɛti tora fen-dɔn-kɛla Mansa Dawuda fɛ iko a halala dan. 12Den kelen bi Mɛfibasɛti bolo nun kɔnɔ kemini-mɛsɛ le a la nun fɔlɔ. A tɔgɛ le Maika. Kɔnɔ Saibala denbayɛ bɛɛsi mara Mɛfibasɛtila wɔli-kɛlɛnu na. 13Ale Mɛfibasɛti min kin filɛ bɔnɛ a kɔrɔ, a tora fen-dɔn-kɛla Mansa Dawuda fɛ Yerusalɛm soe burɔ.
Kuranko Common Language Bible © The Bible Society in Sierra Leone, 2006.