2 Samuwɛli 8
8
Nɔ-Ko Sɔrɔn-Koe Dawuda Bolo
(1 Ko-Kɔrɔta-Karan 18.1-17)
1Wati tenbinɛ, Mansa Dawuda tara bui Filisitinu ma tun. A ya anu nɔ ka anuna nyamanɛ do bi anu bolo.
2Wo kɔma, a tara bui Mohabu kɛnu ma ka anu bira. A ya anu sa dugi ma. A wa mɔgɔ fila faga, a sawa nyɔgɛ, a si wo to. Wole ya a ma, Mohabu nyamanɛ tora a kɔrɔ. Anu tora duti dila ale Dawuda ma.
3Rihobula den Mansa Hadadisa, min bi Soba soe wo kun na, wo tanɛ kɛlɛ-kɛ-tinɛ Yufereti bɛ dafɛ alako a ni nyɔ bi tun a yogenu bolo. Mansa Dawuda anubɛ ala kɛlɛ-dannu tara bui anu ma ka Soba soe bi anu bolo. 4Kɛlɛ-dan minnu bi soeenu naburila, Mansa Dawuda ya wonu mɔgɔ waga kelen anubɛ mɔgɔ kɛmɛ wɔrɔnfila (1,700) bira. So sa kɛlɛ-dan minnu bolo, a ya wonu mɔgɔ waga mogan (20,000) bira. Soee minnu si ke kirindi kɛmɛ saganna, a ya wonu namara. A toe, a ya wonu kin-kɔma-fasɛnu natɛgɛ.
5Siriya-nyamanita-mɔgɛ minnu siginɛ Damasika soe burɔ, wonu ya a lamɔɛn nkɛkuna ko Mansa Dawuda ara ta bui Soba soe ma, wonu ya anuna kɛlɛ-dannu nata Mansa Hadadisa dɛnbɛ tinɛ. Wonu fanan ke nyɔ, Mansa Dawuda ya mɔgɔ waga mogan-ni-fila (22,000) faga wonu tɔ. 6Wo kɔma, Mansa Dawuda ya ala kɛlɛ-dannu daga makɛ tinɛnu nadan Siriya wonuna nyamanɛ rɔ. Siriyanu fanan tora ale kɔrɔ ka to duti dila a ma. Mari ya a ma, Mansa Dawuda ya nɔ-ko sɔrɔn kan tinɛ bɛɛ rɔ. 7Sɛnɛ-walan minnu bi Mansa Hadadisala mɔgɔ-banu bolo, a ya wonu bi ka ta anu na Yerusalɛm. 8Wo kɔma, Bɛta soe anubɛ Bɛrotati soe minnu bi Mansa Hadadisa kɔrɔ, Mansa Dawuda ya sila siyaman bi wonu bolo.
9Siriya mansɛ doi min bi Hamati soe kun na, Mansa Tɔyi, kɔni, wo ya a lamɔɛn min kɛ ko Mansa Dawuda ara Mansa Hadadisa nɔ, 10a ya Mansa Dawuda sanba fen-siyaman na ka a wɔlibɔ ala nɔlɛla ko la. Ale fanan kɛlɛ-nyɔgɛ le Mansa Hadadisa wo la nun. Sɛnɛ wo, wodi-gbɛ wo, silɛɛ wo, a ya wonu don ala den Yɔram bolo alako ala dan wo nyɛrɛ ni ta Mansa Dawuda sanbɛ wonu na. 11-12Mansa Dawuda ya fen-kolomɛ wonu bi ka anu dantɛgɛ Allata wɔlɛla ko la. Idɔm kɛnu wo, Mohabu kɛnu wo, Amonnu wo, Filisitinu wo, Amalɛkinu wo, a ya fen-kolomɛ min bɛɛsi bi anu bolo kɛlɛ rɔ, a ya wonu fanan dantɛgɛ Allala wɔlɛla ko la. Wo kɔma, a ya fen-kolomɛ minnu bi Hadadisa bolo, a ya wo do sa wonu kuma.
13 #
Yaburi 60 (A kunyɛ) Mansa Dawuda tara Idɔm kɛ mɔgɔ waga tan-ni-segin (18,000) faga lɛɛ do rɔ min tɔgɛ Kɔgɛ. A bɔɛ nyɔ, a mankan tora koloyala. 14Wo kɔma, a ya ala kɛlɛ-dannu daga makɛ tinɛnu nadan nyɔ rɔ. Nyamanɛ wo fanan tora a kɔrɔ. Mari ya a ma, Mansa Dawuda ya nɔ-ko sɔrɔn kan tinɛ bɛɛ rɔ.
15Mansa Dawuda ya Isirɛla nyamanɛ mumɛ bɛɛ mara, ado a ya koe bɛɛsi lata a kilɛ fɛ ka ko-latelennɛ kɛ. 16Yohabu min bi kɛlɛ-den-kun-tigiyɛ la Mansa Dawuda kɔrɔ, wo na tɔgɛ le Sɛruwa. Isirɛla mɔgɛnuna kuma-kɔrɔ-sɛbɛnɛ-lamaralɛ le Ahiludila den Yɛhosafati la. 17Ahitubala den Sedoki wo, anubɛ Abiyatarila den Ahimɛlɛki, saraka-masɔlɛ le wonu na. Ala kɛdi-sɛbɛlɛ le Seraya la. 18Yɛhoyadala den Bɛnaya, wo le ye Mansa Dawuda makandannɛnu kun na. Mansa-makawandilɛ le mansɛla den-keinu na.
Kuranko Common Language Bible © The Bible Society in Sierra Leone, 2006.