MATAYO 15

Mechitso ka Vakuuka

(Mk 7:1-13)

1Vandu valala khu Vafarisayo nende veechitsi va Malako, vali nivaruli Yerusalemi vatsia khu Yesu; nivareeva, 2“Shichila shina veechi vovo vambakhananga khulonda mechitso ka khwaheelwa na vakuuka? Valiitsanga shiukhulia na mamisu.” 3Yesu yavachipa, “Shichila shina mwambakhananga khulonda malako ka Nyasaye mamulonda mechitso kenyu vene? 4Nyasaye yavoola, ‘Uhe tata wowo nende mama wowo luyali,’ khandi ‘mundu unyekanga tata wewe inoho mama wewe aliitsa khwiirwa.’ 5Navutswa muvoolanga ndi niiva mundu alavoolela tata wewe inoho mama wewe, ‘Shiambele khuhe mbani khu Nyasaye,’ 6shiavetsanga naheele tata wewe luyali tawe. Mulekhanga khulonda malako ka Nyasaye mamulonda mechitso kenyu vene. 7Munyi vamwikhola kholanga khuva valunji! Muprofeti Isaya yavoola katoto, lwa yaprofeta khulondokhana khu munyi,

8‘Nyasaye avoolanga, vandu yava vambetsanga luyali khuvirila mulilomoloma liavo,

navutswa mioyo chiavo chili ihale wene khurula khwinzi.

9Vasaalanga khwinzi mushikhaya;

veechitsanga malako ka vandu valomba khuli ni malako kaanje!’ ”

Vindu Vilombanga Mundu Khwonekha

(Mk 7:14-23)

10Yesu yalaanga halala shituma shia vandu khuye, navavoolela, “Hulishitsi mamumanye! 11Shindu shivulakhuho shinjilanga mu mundu khurula ilwanyi shimulombanga avula khuva munihu, navutswa yeshio shirulanga mu mundu, nashio shimulombanga khwonekha.”

12Khu, veechi veve vatsia khuye, nivamuvoolela, “Ushili khumanyakhu ndi Vafarisayo vasalili mu mwoyo lwa vahulile makhuva ka uvooli?”

13Yesu yavachipa, “Shia shiraakwa shiosi shia Tata wanje uli mwikulu yakharaaka, shilitsa khurinyuulwa. 14Lekhani navo; ni vimilili vavekhu. Niiva mundu muvekhu aliitsa khwimilila muvekhu wundi, voosi vavili valiitsa khukwa mu vwina.”

15Navutswa Petro yamuvoolela, “Khuvoolelekhu shia lukanu yulu luvoolanga.”

16Yesu yavavoolela, “Khali munyi muvula limanya. 17Mushili khumanyakhu ndi shindu shinjilanga khuvirila mu munwa ku mundu shitsitsanga munda mwemwe, khandi shirula mu mmbili? 18Navutswa shindu shivirilanga mu munwa ku mundu shirulanga mu mwoyo; khandi nashio shilombanga mundu khwonekha. 19Mumwoyo ku mundu tsirulamu tsinganakani tsindamanu, vwiiri, vuheeyi, vakhana nende vayayi khukona nivashili khuhilana, vunuuli, vuvehi, nende khunyekanyinya vandi. 20Yivi navio vindu vilombanga mundu khwonekha; navutswa khulia shiukhulia na makhono kali na mamisu shikalombanga mundu khwonekha tawe.”

Mukhali wi Lisuuvila

(Mk 7:24-30)

21Yesu yarula havundu henaho natsia mu lusomo luli himbi khu mataala ka Tiro nende Sidoni. 22Mukhali Mukanaani wamenyanga mu lusomo lwenolo yatsia khuye, nalaanjilila, “Mwami, mwana wa Daudi, mbela tsimbavasi, shichila litimoni lili mu mwana wanje wi shikhana, khandi limunyashitsanga vululu muno.”

23Navutswa Yesu shiyamuvoolelakhu khali likhuva liosi tawe. Veechi veve vatsia khu Yesu, nivamusaya nuyaanza, “Muvoolele aruli hanu, shichila akhulerelanga liyooko lwa akhulondanga munyuma.”

24Khulwa yako, Yesu yachipa, “Narumwa khu Vaisraeli vonyene, nivali khuli makondi kakora.”

25Navutswa mukhali mwenoyo yatsia nasikama imbeli wa Yesu, navoola, “Mwami, khonya.”

26Yesu yavoolela mukhali mwenoyo, “Nu vutamanu khuvukula shiukhulia shia vaana nu khusiuvila tsisiimbwa.”

27Mukhali mwenoyo yachipa, “Mwami, nindio kali; navutswa khali ndio, tsisiimbwa tsinyanyanga matonye ki shiukhulia karikale khurula khu imesa yu muruchi watsio.”

28Khulwa yako, Yesu yamuvoolela, “Uli mukhali wi lisuuvila linyishi! Shia shindu shiosi shia wenyanga khukholelwa, nashio shiukholelwa.” Mutsisaa tsienetso, mwana wewe wi shikhana yahona.

Yesu Yahonyinya Valwale Vanyishi.

29Yesu yarula havundu henaho, navirila khundulu khwi inyanza ya Galilaya. Yanina khu shikulu, niyikhala hasi. 30Vituma vikali via vandu vatsia khuye. Vali nivamulerele vandu valema, vavekhu, vafwokoya, vasilu, nende vandi vanyishi vali nivalwala, va vavikha ha vilenje ha Yesu; navahonyinya. 31Vandu vali nilichenya, lwa valola vandu vasilu nivalomolomanga, vafwokoya nivahoni, valema nivachendanga, nende vavekhula nivalolanga; nivitsominya Nyasaye wa Israeli.

Yesu Yaliishitsa Vasatsa Tsihelefu Tsine

(Mk 8:1-10)

32Yesu yalaanga veechi veve khwitsa khuye; navavoolela, “Mbelele tsimbavasi shituma shia vandu yava; shichila mbele navo khumatukhu kavaka, navo vavula shia valia; khandi shindi ni lienya liu khuvaseevula varuliho nivali ni inzala tawe, shichila nikhola ndio, valala khuvo vanyala khuhundushila khunjila nivatsitsanga.”

33Veechi veve vamureeva, “Ni hena wa khunyala khunyola mu shiangalangwi yumu shiukhulia shitukha shituma shia vandu vanyishi yava?”

34Yesu yavareeva, “Muli ni mikati chianga?” Vamuchipa, “Mikati saba, nende tsisutsi tsindititi tsionyene.”

35Khulwa yako, Yesu yavoolela shituma shia vandu vikhale hasi. 36Yavukula mikati saba nende tsisutsi, nasanditsa Nyasaye. Yatong'olanyinya naha veechi veve. Veechi veve nivakavulila vandu. 37Vandu voosi valia nivikura. Veechi veve vavunjelitsa mihinda saba chia matonye ki shiukhulia kali nikarikale. 38Vandu voosi valia vali vandu vasatsa tsiheelefu tsine, vuchila khuvalitsa vakhali nende vaana. 39Lwa Yesu yali namali khuseevula shituma shia vandu, yinjila mu liaro, natsia mu lusomo lwa Magadani.

Currently Selected:

MATAYO 15: LLLCATHOLIC

Highlight

Copy