MATAYO 14

Likhutsa lia Yohana Mubatisi

(Mk 6:14-29; Luka 9:7-9)

1Mumatukhu kenako, mwamihi Herode, wamihanga lusomo lwa Galilaya, yahulila makhuva khulondokhana khu Yesu; 2navoolela varumishi veve, “Ni kilikali, mundu uyu neye Yohana Mubatisi, wisimushitswi khurula mu likhutsa. Nako kachilanga nava ni tsingulu tsiu khukhola viloleshitsu.” 3Herode yali wahaana lilako Yohana akumilwi, nu khuvohwa mucheela shichila Herodia, mukhali wa amwavo wewe walaangwangwa Filipu; 4shichila matukhu kandi, Yohana yavoolela Herode, “Nu vutamanu khulondokhana khu malako khu yivi khuhila Herodia.” 5Khali niiva Herode yenyanga khwiira Yohana, yali waria vandu, shichila vandu vali vamuvukula khuli muprofeti.

6Navutswa lwa litukhu liu khwikhoyela khwivulwa khwa Herode liatukha, mwana wi shikhana wa Herodia yasieva imbeli wi shituma shia vandu voosi, khandi nayaanzitsa Herode, 7nalaaka khumuha shindu shiosi shianyala khureeva. 8Namali khutsuvwa na mama wewe, yavoolela Herode, “Mbe khu isahani murwi kwa Yohana Mubatisi lwenulu.”

9Mwami Herode yavelela, navutswa shichila yalaaka imbeli wa vacheni veve, yahaana lilako akholelwi ka yenyanga. 10Yaruma mundu khutsia mucheela khureema khandi khukutuula murwi kwa Yohana Mubatisi. 11Murwi kwenoko kwalerwa khu isahani nu kuhaanwa khu mwana wi shikhana mwenoyo; wavukula nahilila mama wewe. 12Veechi va Yohana vatsia nivavukula mmbili kwenoko, nivakuyeveela mu shilindwa; nivatsia khuvoolela Yesu.

Yesu Yaliishitsa Vasatsa Tsihelefu Tsiranu

(Mk 6:30-44; Luka 9:1-17; Yoh 6:1-14)

13Lwa Yesu yahulila makhuva khulondokhana khu Yohana, yarulaho mu liaro, natsia havundu ha vwivisi. Navutswa lwa vituma via vandu vahulila ndio, vamulonda khu vilenje khurula mu mataala kavo. 14Lwa Yesu yarula mu liaro natsia khuluchinga lwi inyanza, yalola shituma shikali shia vandu. Yavalolela tsimbavasi; manahonyinya vandu vavo vali nivalwala.

15Lwa khulukolovo khwali nu khwakhatukha, veechi va Yesu vatsia khuye nivavoola, “Shivala shimwami khale, khandi ha khuli hanu ni havwivisi. Seevula vandu vatsi mu michitsi khukuula shiukhulia shia valia vene.”

16Yesu yavavoolela, “Vavulakhu shivune shinyala khuvakhola vatsi; munyi muvahe shiukhulia shia vanyala khulia.”

17Vamuvoolela, “Khuli ni mikati chiranu nende tsisutsi tsivili tsionyene.”

18Khulwa yako, Yesu yavoola, “Ndereli hanu.” 19Yesu yavoolela vituma via vandu vikhale hasi khu vunyasi. Yavukula mikati chiranu nende tsisutsi tsivili, naheenza mwikulu, khandi nasanditsa Nyasaye. Yatong'olanyinya mikati, naha veechi veve, navo nivaha vandu. 20Vandu voosi valia nivikura. Veechi veve vavunjelitsa mihinda likhomi na chivili nichitsuli matonye ki mikati nende tsisutsi tsiali nitsirikale. 21Isavu ya vandu vasatsa voosi valia vali himbi tsiheelefu tsiranu, vuchila khuvalitsa vakhali nende vaana.

Yesu Yachenda khu Matsi

(Mk 6:45-52; Yoh 6:15-21)

22Khulwa yako, Yesu yavoolela veechi veve vinjile mu liaro khutsia khwimila imbeli wewe khuluveka lundi lwi inyanza, naye naseevula vandu. 23Lwa Yesu yali niyakhaseevula vandu, yasimukha natsia wonyene khusaala khu shikulu. Lwa khulukolovo khwatukha, yarikaho wonyene, 24khandi musaa yeneyo, liaro liali nilili hakari mu inyanza, nilihuutsanyinywangwa na maruundu, shichila imbuutsa yali nilihuutsanga.

25Muvutukhu, nuvuli himbi khu shia mu mavwevwe, Yesu yasimukha natsia khu veechi veve, nachendanga khu matsi. 26Navutswa lwa veechi veve vamulola nachendanga khu matsi, vatechela. Vavoola, “Ni shinanyenzo!” Valaanjilila nivaria.

27Navutswa Yesu yalomoloma khuvo vwangu navoola, “Vi ni ikholo! Ninzi. Muvuli khuria.”

28Petro yamuvoolela, “Mwami, niiva toto nivi, mbuchilila njendele khu matsi khutukha wa uli yaho.”

29Yesu yavoola, “Hamba.” Khulwa yako, Petro yarula mu liaro, naraanga khuchenda khu matsi khutukha khu Yesu. 30Navutswa lwa yalola imbuutsa inditoho nihuutsanga yaria, naraanga khwiyinikha mu matsi. Yalila navoola, “Mwami, mbonyinya.”

31Yesu yanyiila mukhono kwekwe namukumila vwangu, namuvoolela, “Yivi mundu wi lisuuvila litititi, shichila shina nuhaya haya?”

32Lwa vinjila mu liaro, imbuutsa yasinjila. 33Khulwa yako, veechi vali nivali mu liaro vasikama nivasaala khu Yesu, nivavoola, “Ni kilikali uli Mwana wa Nyasaye.”

Yesu Yahonyinya Vandu Valwala mu Genesareti

(Mk 6:53-56)

34Vambukha inyanza, nivatukha mu litaala lia Genesareti. 35Lwa vandu viweneyo vamanya ndi ni Yesu, varumana likhuva shia havundu hosi mu lusomo lwenolo, nivamulerela vandu voosi vali nivalwala. 36Vasaya Yesu nayaanza ahuchilile vandu vali nivalwala vatiile khu lupindo lwi inguvu yeye. Vanyishi vamutiilakhu vahona.

Currently Selected:

MATAYO 14: LLLCATHOLIC

Highlight

Copy