LEVI 10
10
Vaana va Haruni Vakhola vwoni Nivasalila
1Vaana vi shiyayi va Haruni, nivali Nadabu nende Abihu, shia mulala khuvo yavukula luchio lwelwe, narakhu mandaa kakhanga mulilu, nameetakhu vubani, nahaana khu Mwami Nyasaye. Navutswa mulilu kwenoko kwali nu kuvula vutakatifu, shichila Mwami Nyasaye yali nashili khuvavoolela vakhole kenako. 2Nonoho lwa Mwami Nyasaye yaruma mulilu, nukuvasamba khali nivakhutsila imbeli wu Mwami Nyasaye. 3Nalwo lwa Musa yavoolela Haruni, “Mwami Nyasaye avoolanga, ‘Niitsa khwimanyinya ndi mutakatifu khu yavo voosi visuundanga himbi khwinzi, khandi niitsa khuheelwa vukhumi imbeli wa vandu voosi.’ ” Navutswa Haruni yatsililila khuhonjela vutswa.
4Musa yalaanga Mishaheli nende Elizafani, nivali vaana va Uzieli, wali nali khootsa wa Haruni. Yavavoolela, “Hambi himbi, muchinji mivili chia vasiala venyu vakhutsa, khuchirulitsa Havundu Hatakatifu, khuchihila ihale wene, khurula mu maheemo ka vandu vamenyamu.” 5Vitsa himbi nivachinga mivili chienecho, nivachihila ihale wene, khurula mu maheemo ka vandu vamenyamu, khuli Musa yali navavoolele vakhole.
6Musa yavoolela vaana veve vi shiyayi, nivali Eliazari nende Itsamari, “Muvuli khulekhakhu maswi kenyu kayumbi, vuchila khukachenula inoho khurandula tsinguvu tsienyu, khumanyinya ndi mwikhulanga. Niiva muliitsa khukhola kenako, muliitsa khukhutsa, ma Mwami Nyasaye alolele Vaisraeli voosi vurima. Navutswa Vaisraeli veshie voosi, vamali khuhuchililwa khwikhula likhutsa lialerwa nu mulilu ku Mwami Nyasaye yaruma. 7Muvuli khurulakhu mu vwinjililu vwi Liheemo Litakatifu. Niiva munyala khukhola ndio, muliitsa khukhutsa, shichila mumali khuvekhwa makura ku Mwami Nyasaye.” Vakhola khuli Musa yali navavoolele vakhole.
Malako ka Vasalisi Valonda
8Mwami Nyasaye yalomoloma na Haruni, navoola, 9“Yivi nende vaana vovo vi shiyayi va uli navo, muvuli khung'wa idivai inoho malwa isaa yosi, ya mwinjilanga mu Liheemo Litakatifu. Niiva muliitsa khukhola kenako, muliitsa khukhutsa. Yili ni lilako lia vitsukhulu venyu voosi, valiitsa khutsililila khulonda mihika ni mihika. 10Mwavukhanyinyi vindu vitakatifu nende vindu viliho shia khase khosi, khandi vindu vinihu nende vindu vioneshe. 11Uliitsa khwechitsa Vaisraeli voosi malako koosi, ka inzi Mwami Nyasaye muheele khuvirila khu Musa.”
12Musa yavoolela Haruni nende vaana veve vi shiyayi vandi vavili vali nivarikale, nivali Eliazari nende Itsamari, “Vukuli shihanwa shi imu shirikale, khurula khu shihanwa shi shiukhulia shiahaanwa khu Mwami Nyasaye, mulombe mukati vuchila mamela khurula khushio, mamulii mukati kwenoko khuluveka lundi lu vwaali, shichila shihanwa shienesho ni shitakatifu muno. 13Muliitsa khulia mukati kwenoko Havundu Hatakatifu; shichila ni shitonye shioshio halala na vaana vovo vi shiyayi, khurula khu shihanwa shi shiukhulia shiahaanwa khu Mwami Nyasaye. Nako ku Mwami Nyasaye yambolela mukhole. 14Navutswa munyi halala na vandu vi inzu yenyu, muliitsa khulia tsimbele nende vilenje vinyuma, via vahaananga khuli shihanwa shilahi, khandi khuli shihanwa khu Mwami Nyasaye shichila vasalisi. Muliitsa khulia shiukhulia shienesho, numuli shia havundu hosi hali hanihu khulondokhana khu mulukha. Vihanwa yivi navio via mwaheelwa munyi nende vaana venyu, khuva shitonye shienyu, khurula khu vihanwa viu khulera milembe via Vaisraeli vahaananga. 15Valiitsa khulera shilenje shinyuma nende luveele, isaa ya shivana shiva ni shihanwangwa, khuli shihanwa shi shiukhulia khu Mwami Nyasaye. Vitonye vi tsinyama tsienetso, viliitsa khuva vienyu halala na vaana venyu khumatukhu koosi, khuli Mwami Nyasaye yavoola.”
16Musa yareeva makhuva khulondokhana khu imbuli, yi shihanwa shiu khurulitsaho vwoni, navoolelwa imali khusambwa nu mulilu khale. Makhuva kenako kamulomba nalolela vurima Eliazari nende Itsamari, nareeva, 17“Shichila shina numuvula khulia shihanwa shiu khurulitsaho vwoni Havundu Hatakatifu? Ni shihanwa shitakatifu muno; khandi Mwami Nyasaye umuheele munyi, khusemeha Vaisraeli voosi khurula mu vwoni vwavo. 18Lwa masahi kayo kavula khuhilwa havundu hatakafu, muliitsa khulia imbuli yeneyo havundu henaho, khuli namuvoolela.”
19Haruni yavoolela Musa, “Vamali khuhaana nunundi shihanwa shiu khurulitsaho vwoni nende shihanwa shiu khusambwa khu Mwami Nyasaye; navutswa makhuva yaka, kamali khwikholekha khwinzi. Mba ninalia shihanwa shiu khurulitsaho vwoni nunundi, ni kilikali, Mwami Nyasaye yakhashihuchilile?” 20Lwa Musa yahulila makhuva kenako, yayaanzitswa nako.
Currently Selected:
LEVI 10: LLLCATHOLIC
Highlight
Share
Copy
Want to have your highlights saved across all your devices? Sign up or sign in
© The Bible Society of Kenya, 2013
