YOELI 2
2
Tsisichi Khuli Lichelihitso li Litukhu liu Mwami Nyasaye
1Mukhuvile shisiliva mu Sayoni;
vuri muhumu khu shikulu shianje shitakatifu!
Munyi voosi vamenyanga mu shivala shinu, mutechele,
shichila litukhu liu Mwami Nyasaye khukhalachila vandu
lili himbi khutukha, lili ha muliango.
2Liliitsa khuva litukhu li shisuundi nende khutuunya;
litukhu lia malesi kaliitsa khulolekha
nu khumwaminya shivala!
Shituma shikali shi tsisichi tsiliitsa khuroonjela
khuli shivala shimwamanga ni shilanda khu vikulu;
tsiliitsa khulolekha khuli shituma shikali
shia vandu vi tsingulu tsinyishi muno.
Shindu khuli shienesho shishili khwikholekhakhu khuraanjila mumatukhu kakhale;
khali khusuuvilanga shiliitsa khuvula khwikholekhakhu khandi
mumatukhu kitsanga.
3Mulilu kulaalitsanga shia shindu shiosi imbeli watsio,
tsimemo tsiakhanga munyuma mwatsio.
Khali ni tsishili khuvira, shivala shilolekhanga khuli Mulimi kwa Edeni,
navutswa nitsiakhaviraho,
shiangalangwi shiele vutswa,
vuchila shindu shiosi khwihonolokha.
4Tsilolekhanga khuli ni tsifarasi;
khali tsilukhakanga khuli tsifarasi tsiu khutsia khukwana.
5Tsisila silanga khu vutoonje vwi vikulu,
tsihumanga khuli makaare kiliihe kakolongomanga;
tsihulilikhananga khuli mulilu kulaalitsanga vunyasi vumu,
khuli vasikali vi tsingulu ni viyavaale khutsia khukwana.
6Lwa tsilolekhanga imbeli, vandu varitsanga;
voosi vaheendanga mwoyo.
7Tsiroonjelanga khuli vasikali vakwananga,
tsininanga khu masisi khuli ni vasikali.
Tsiosi tsiroonjelanga vulunji khu injila yatsio,
vuchila khukoyanakhu munjila.
8Shitsituuyananga tawe;
shia isichi iroonjelanga vulunji munjila yayo.
Tsivirilanga havundu ha viuchi vili,
vuchila khwikalilwa ni shindu shiosi.
9Tsinjililanga litaala likali,
tsininanga ni tsimola khu masisi;
tsininanga nitsinjila mu tsinzu;
tsinjililanga ni tsivirila mu matirisha khuli shihuuvi.
10Lilova litechelanga imbeli watsio lwa tsilolekhanga,
malesi karenganga;
liuva nende mweli vimwaminywangwa,
khali tsinyining'ini tsilekhanga khwakha.
11Mwami Nyasaye neye uhaananga lilako
liu khwimilila mukaanda kwa vasikali veve,
vasikali veve ni vanyishi!
Valondanga malako keke ni vanyishi khuvira shichelo.
Ni kilikali, litukhu liu Mwami Nyasaye akhalachila vandu ni likali muno;
liliitsa khuva liu khurishitsa --
ni viina uliitsa khwikhutsila khulitukhu lienelo?
Khuvoolela Vandu Vikanile
12Mwami Nyasaye avoolanga,
“Khali nunundi, kalushi nu mwoyo kwosi khwinzi,
numuhonga vuchila khulia,
numulila tsikhwili khandi numwikhula.
13Leshi khurandula tsinguvu tsienyu
khumanyinya vuveleli vwenyu mu mioyo,
navutswa vwichehitsi vwenyu mu mioyo vumanyikhane.”
Kalushi khu Mwami Nyasaye, uli Nyasaye wenyu;
shichila nu wi tsimbavasi khandi uvelanga vandu,
uvula vurima vu vwangu, witsula vuyaanzi,
khandi shiali mwangu khusalilitsa tawe.
14Mumanyila shiina niiva Mwami Nyasaye
aliitsa khukalukhana amulolele tsimbavasi,
nu khumukasitsa ni shihanwa shi imu nende shihanwa shi idivai
shiu khulera khu Mwami Nyasaye, uli Nyasaye wenyu?
15Mukhuve shisiliva mu Shikulu shia Sayoni!
Muhaane lilako liu khuhonga vuchila khulia;
laanji shikhaalo shia vandu.
16Laanji halala vandu,
mutakase shikhaalo shia vandu;
leri vasakhulu;
laanji halala vaana,
khali tsindana tsia vanunyinyanga.
Vooleli musatsa uselelanga nende mwiiha,
varuli mu inzu ya vamenyamu.
17Leshi vasalisi, varumishi vu Mwami Nyasaye varumikhanga
hakari wu vwaali nende vwinjililu vwi Litempeli,
valile tsikhwili, khandi vasaale, nivavoola,
“Mwami Nyasaye, nuyaanza uvele vandu tsimbavasi.
Lekha khukhola vandu vi tsimbia tsindi
khukholela vandu vovo shihenye henye
inoho khuvachaya,
shichila shina vandu vavoole,
‘Ni hena ha Nyasaye wavo ali?’ ”
Nyasaye Yakalushitsila shivala Vunuulu
18Nalwo lwa Mwami Nyasaye yayaanzitswa ni shivala shieshie;
khali navela tsimbavasi vandu veve.
19Yavahulishitsa, nachipa lisaala liavo,
navoola, “Niitsa khumuha imu, idivai,
nende makura ku musayituni;
muliitsa khulia khutukha lwa mwikura.
Shinzitsanga khukhola vandu vi tsimbia tsindi khumuchaya tawe.
20Niitsa khurulitsaho shituma shi tsisichi tsiarulila ivuluka;
khutsikhunga khutsia mu shiangalangwi.
Niitsa khusiuva tsisichi tsili imbeli mu Inyanza yi Ichumbi,
shituma shili inyuma mu Inyanza ya Meditarenia.
Tsiliitsa khukuunda nitsihuunya vutamanu muno;
natsio tsiakhola vindu vitamanu muno!
21“Yivi lilova, lekha khuria;
usangale nu khwikhoya,
shichila Mwami Nyasaye wakhola vindu vi tsingulu!
22Munyi tsinyama tsiumbulimu, muvuli khuria,
shichila lwayilu lu mwichendanyama luli nu vunyasi vuvisi;
misala chiamanga matunda,
khali musala ku mukhuyu nende musabibu
chiayama matunda manyishi.
23“Munyi vandu va Sayoni, musangale,
mwikhoyele mu Mwami Nyasaye, uli Nyasaye wenyu;
shichila neye wamuha imbula yu khuraanga,
wamuha imbula inyishi muno,
imbula yu mumatukhu ku khuraaka nende yi shiuvwi,
khuli yakholanga khale.
24Havundu ha vahulachilanga imu halitsula imu,
vwina vwa vaminilamu matunda
vulasumeela idivai nende makura ku musayituni.
25Niitsa khumukalushitsila vindu via mwakoritsa mu mihika chiavira
lwa vituma ni vituma vi tsisichi tsialia viraakwa vienyu,
nitsili khuli mukaanda kwa vasikali vaanje
vi tsingulu va nali naruma khu munyi.
26Muliitsa khulia mu vunyishi khutukha mulikura;
khali muliitsa khwitsominya lira liu Mwami Nyasaye, uli Nyasaye wenyu,
wamukholela vindu viu khuchenyinya.
Khali vandu vaanje valiitsa khuvula khuheelwa khandi tsisoni.
27Nalwo lwa mulimanya ndi ninzi menyanga mu Vaisraeli,
khandi ndi ninzi Mwami Nyasaye, uli Nyasaye wenyu
wundi avulakhuho khuli inzi.
Vandu vaanje valiitsa khuvula khuheelwa khandi tsisoni.
Litukhu liu Mwami Nyasaye Akhalachila Vandu
28“Lwinyuma, niitsa khuhaana roho wanje khu mundu wosi;
vaana venyu vi shiyayi nende vi shikhana valiitsa khuprofeta,
vasakhulu venyu valiitsa khuloora malooro,
khandi vayayi venyu vavukha valiitsa khulola malolo.
29Mumatukhu kenako,
khali niitsa khuhaana roho wanje khu varumishi venyu
vasatsa nende vakhali.
30“Niitsa khuchila vimanyilu viloleshe mwikulu nende khulilova;
khuliitsa khuvaho na masahi, mulilu,
nende mwooshi munyishi.
31Liuva liliitsa khumwaminywa,
mweli kuliitsa khukalukhana kukwi mumuuchi khuli masahi,
litukhu li tsingulu khandi liu khurishitsa
liu Mwami Nyasaye aliitsa khukhalachila vandu nilishili khutukha.
32Nalwo lwa shia mundu wosi usaalanga
khuvirila mu lira liu Mwami Nyasaye alihonyinywa;
shichila vandu valala valiitsa khwihonolokha
nivali mu Shikulu shia Sayoni nende Yerusalemi;
shichila inzi Mwami Nyasaye umali khuvoola.”
Currently Selected:
YOELI 2: LLLCATHOLIC
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013
