YOELI 1
1
1Yili nalio likhuva liu Mwami Nyasaye yavoolela Yoeli mwana wa Petsweli.
Khuli Tsisichi Tsiononyinya Viraakwa
2Munyi vasakhulu, muhulile makhuva kaanje,
munyi voosi vamenyanga mu shivala, muhulishitsi!
Shindu khuli yishi shinyala khuva shia kholekhakhu mumatukhu kenyu,
inoho mumatukhu ka vakuuka venyu vali nivashili mwoyo?
3Muvoolelekhu vaana venyu makhuva kenako;
navo valiitsa khuvoolelakhu vaana vavo,
khali vaana vavo valivoolelakhu likhula lindi.
4Vituma ni vituma vi tsisichi, tsia yinjilila viraakwa mu milimi;
tsiativitsa shia shindu shiosi mu milimi.
5Munyi vatandi, muchelihi numulila!
Munyi vang'wetsanga idivai, mulaanjilile
numukhuva tsikhwili,
shichila matunda ka idivai irulakhu ka yononyinywa.
6Shituma shikali shi tsisichi tsilolekhanga
khuli vasikali tsiseeri shivala shieru,
tsili ni tsingulu khandi tsia yalulana mu vunyishi;
tsili na miino khuli miino ki isimba,
khandi tsili na miino ka macheko khuli ki isimba ikhali.
7Tsiayononyinya misabibu chianje;
nitsilia mikhuyu chianje;
lwa tsiakukuna makhanda kachio nu khukasiuva hasi;
khali tsisia tsiene tsiarikala tsinzele.
8Vandu munyi, mwikhule khuli mwana wi shikhana muchima
yifwalanga likunia niyikhula musatsa wewe
wakhutsa wali natushili khumuhila.
9Shihanwa shi imu nende shihanwa shi idivai viarulitswa
mu Litempeli liu Mwami Nyasaye;
khali vasalisi vakholanga muhinzilu ku Mwami Nyasaye vikhulanga.
10Milimi chiarikala miele;
lilova likhulanga,
shichila viraakwa via yononyinywa;
matunda ki misabibu kaniala khali makura kakora.
11Munyi valimi, muheende mwoyo;
munyi vasembeli vi misabibu, muve numulilanga tsikhwili;
shichila inganu nende ishayiri;
shichila lichesa mu milimi liativitswa.
12Misabibu chianiala,
misala chi mikhuyu chialekha khwama;
pomenguraneti, mashindu, nende misala chia matunda --
misala chiosi mu milimi chia yumakana.
Ni kilikali, vuyaanzi vuvula mu vandu.
13Munyi vasalisi, mufwale makunia numwikhula;
munyi varumikhanga ha vwaali,
kholi numulila tsikhwili.
Munyi varumishilanga Nyasaye wanje,
mwinjilimu numwifwali tsinguvu
tsia makunia vutukhu vwosi;
shichila shihanwa shi imu nende shiu khung'wa
viarulitswa mu Litempeli lia Nyasaye wenyu.
14Muhaane lilako lia vandu khuhonga vuchila khulia;
khandi mulaanje shikhaalo shia vandu!
Laanji halala vimilili nende vandu vi shivala shinu
khwitsa khwinjila mu Litempeli liu Mwami Nyasaye,
uli Nyasaye wenyu, numulila tsikhwili khuye.
15Wooyi! Khuliitsa khuva khuvutiinyu khulitukhu lienelo,
shichila litukhu liu Mwami Nyasaye
aliitsa khukhalachila vandu lili himbi khutukha,
litukhu liu Mwami Nyasaye aliitsa khutivitsa vandu.
16Viraakwa vieru viativitswa vene nu khulolakhu.
Vuyaanzi nende lisangala viakora mu Litempeli lia Nyasaye weru.
17Vukuutsa vwakuundila hasi mu malova;
tsinzu tsia khuvikhamu vindu tsiarikala tsinzele;
viachi vieru vivulamu imu yosi;
shichila viraakwa vivulakhuho via khwachesa.
18Hulilikhu khuli tsinyama tsiumbulimu tsitsiulanga!
Viayo vi tsing'ombe tsihuya huyanga,
shichila tsivula vunyasi vu khwaya;
khali shiayo shia makondi kanyakhananga.
19Mwami Nyasaye, nilililanga khu yivi,
shichila mulilu kwalaalitsa vunyasi vu mwichendanyama,
khali lumemo lwayeelitsila hasi misala chiosi mu mulimi.
20Khali tsinyama tsiumbulimu tsitsiulanga ni tsilila khu yivi,
shichila virula via matsi viakhaama,
mulilu kwalaalitsa lwayilu lu mwichendanyama.
Currently Selected:
YOELI 1: LLLCATHOLIC
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013
