HOSEHA 5
5
1Mwami Nyasaye avoolanga,
“Munyi vasalisi, hulishitsi!
Munyi Vaisraeli, muhulile!
Munyi vandu vi inzu yu vwami, muhulishitsi!
Shichila munyi navo vamutsitsanga khukhalachilwa:
mwali khuli mureeko mu litaala lia Mizipa,
khuli ineti khu Shikulu shia Tabori.
2Mwayeeva vwina vukhuvakumila mu litaala li Minyenye;
navutswa niitsa khumusalilitsa munyi voosi.
3Namanya Vaefurahimu,
khali Vaisraeli vashili khuviswa khwinzi;
nikhali khu lwenulu, Vaefurahimu vakholanga vulaaya,
Vaisraeli vayononyinywa.
Hoseha Yachelihitsa Vandu Khulekhana ni Misambwa
4“Vikholwa viavo viavikalila khukalukha khu Nyasaye wavo,
shichila vali nu mwoyo ku khutsililila khukhola vulaaya;
khandi vavula shindu shia vamanya khwinzi Mwami Nyasaye.
5Vwiloli vwa Vaisraeli vwamanyikhana havulavu;
Vaefurahimu valiitsa khwisikarila mu vwoni vwavo,
khali vandu va Yuda valiitsa khwisikarila navo.
6Valiitsa khutsia khukhava inzi Mwami Nyasaye,
nivali ni viayo via makondi kavo nende tsing'ombe tsiavo,
navutswa valiitsa khuvula khunyola;
shichila ndi ihale wene khurula khuvo.
7Valekha khuva vasuuvilwa khwinzi Mwami Nyasaye;
shichila vayivula vaana ilwanyi.
Khulwa yako, khulitukhu liu Mulukha ku Khwilavushitsa khu Mweli,
viraakwa vienyu viliitsa khwononyinywa.
Liihe Hakari ha Yuda nende Israeli
8“Khuvi shisiliva mu litaala lia Gibeha,
shisiliva mu litaala lia Raama.
Laanjilitsili muhumu kwi liihe mu litaala lia Betsi-aveni;
Munyi vandu vuluhia lwa Benyamini, mutsiku wenyu ali inyuma wenyu.
9Vandu vuluhia lwa Efurahimu valativitswa khukwa khuli shiangalangwi
khulitukhu liu khusalilitswa;
Ni kilikali, kambolanga havulavu mu Vaisraeli,
nako kaliitsa khwikholekha!”
10Mwami Nyasaye avoolanga,
“Vimilili va Yuda vakwa khuli yavo vasuundanga lwakho;
nivalolele vurima vwanje khuli michelelo chia matsi.
11Efurahimu atambitswangwa,
aminikhanga mulikhalachilwa katoto,
shichila ali ni shinani shiu khusaala khu misambwa.
12Khulwa yako, ndi vutswa khuli injetso khu Efurahimu,
khuli vukuundu vumakanu khu vandu va Yuda.
13“Lwa Vaefurahimu valola khuli valwalanga,
khandi vandu va Yuda nivalola makuule kavo,
nalwo lwa vandu va Efurahimu vasimukha nivatsia Ashuria
nivarumwa khu Mwami wi tsingulu wa Ashuria.
Navutswa yakhaywa khuvakhonya
inoho khuvahonyinya makuule kavo.
14Niitsa khukwa khuli isimba khu Vaefurahimu,
khuli mwana wi isimba khu vandu va Yuda.
Khali inzi mwene niitsa khuvavulanyinya mu vitonye nu khurulaho.
Inzi mwene neye uliitsa khuvachinga valirulaho,
khali valivula khuva nu mundu unyala khuvakhonya.
15“Niitsa khukalukha khandi havundu hanje hamenyanga,
khutukha lwa valiitsa khwiyama vakhola vwoni
nu khukhava inzi,
nivali mu matiinyu kavo valikalukha khwinzi, nivavoola.”
Currently Selected:
HOSEHA 5: LLLCATHOLIC
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013
