HOSEHA 4
4
1Munyi Vaisraeli, hulishitsi likhuva liu Mwami Nyasaye,
shichila Mwami Nyasaye ali ni likhuva limunyashitsanga
shichila munyi vamuli vene shivala;
mwalekha khuva vasuuvilwa, muvula vulahi mu shivala shinu,
khandi mundu avulakhuho wamanya shindu khulondokhana khu Nyasaye mu shivala shinu.
2Vandu vamenya nivaliitsanga nivisuuhitsana, vashila vuvehi,
ni valumindi, vihuuvi khandi vaheeyi;
khali vikholwa viu khusalilitsa vandi viayitsula muvo,
khandi shisahi shiamenya ni shiasuundulwa.
3Khulwa yako, vandu vikhulanga mu shivala,
khandi voosi vamenyanga mushio vativanga;
khali tsinyama tsiumbulimu, manyonyi,
nende tsisutsi vitivitswangwa.
Nyasaye Yayaala Vasalisi
4Mwami Nyasaye avoolanga,
“Munyi vasalisi, leshi khuhuchililakhu mundu khwililila
inoho khwituula;
shichila ninzi wilililanga shichila munyi.
5Muliitsa khwisikarila mbasu,
khali vaprofeti valiitsa khwisikarila na munyi mu vutukhu;
nilitivitsa mama wenyu Israeli.
6Vandu vaanje vativitswangwa shichila vavula vucheli;
lwa mwambakhana khuchelihitswa,
inzi mali khumwambakhana khuva vasalisi vaanje.
Lwa mwambakhana khulonda malako kaanje inzi Nyasaye wenyu,
niitsa khwivilila khandi vaana venyu.
7“Khali lwa vasalisi vivulana mu vunyishi,
nalwo lwa vatsililila khukhola vwoni imbeli wanje;
niitsa khukalukhanyinya vukhumi vwavo khuva tsisoni.
8Vanyolanga miandu chiavo khurula khu vwoni vwa vandu vaanje vakholanga,
vali nu vuha vu khutsililila khulola ni vatsilililanga khumeeta khukhola vwoni.
9Navutswa Khuli lwa vandu valiitsa khusalilitswa,
nindio khandi niitsa khusalilitsa vasalisi;
niitsa khuvasalilitsa shichila mwiima kwavo,
nu khuvanzila vikholwa viavo vitamanu.
10Valiitsa khulia, navutswa valiitsa khuvula khwikura;
valiitsa khukhola vulaaya, navutswa valiitsa khuvula khwivulana mu vunyishi,
shichila vayambakhana Inzi Mwami Nyasaye,
vatsililile khukhola vulaaya.”
Nyasaye Wayambakhana Misambwa
11Mwami Nyasaye avoolanga,
“Idivai, ive ikhulu inoho impia
ikoyanyinyanga vandu vavula khuva ni limanya.
12Vandu vaanje vareevanga inganakani
yu khukhonywa khu misala;
shikong'o shiu vukhumu shivavoolelanga
ka venyi khumanya.
Valekhana ninzi Nyasaye wavo;
khuli mukhali wu kholanga vulaaya,
nindio vatsilililanga khusaala khu vanyasaye vandi.
13Vakholelanga misango khu vutoonje vwi vikulu,
khandi vahaana vihanwa khuvio,
hasi hi misala chi miseno, mikomari, nende mireembe,
khuvela ni havundu hi shiniikha shili shilahi;
khulwa yako, vaana vi shikhana venyu vakholanga vulaaya,
khandi viiha venyu vaheeyanga.
14Navutswa shinyala khusalilitsa vaana venyu vi shikhana
lwa vava nivakholanga vulaaya,
inoho vakukhu venyu vi shikhana
lwa valiitsa khuva ni vaheeyanga tawe;
shichila khali munyi vene muheeyanga
na vakhali vakholanga vulaaya vu mu litempeli,
nu mukhola navo misango mu milukha chiu khuheeya.
Vandu venavo valiitsa khutiva lwa vavula limanya!
15“Munyi Vaisraeli, khali niiva mukholanga vulaaya,
vandu va Yuda vavuli khunyolekha mu vutamanu!
Muvuli khwinjilakhu mu litaala lia Gilugali,
inoho khutikulukha Betsi-aveni!
Muvuli khwisuuhakhu, numuvoola, ‘Khwisuuhanga khu Nyasaye uli mwoyo!’
16Vaisraeli ni vahaaka khuli imosi imbalave.
Nyala khuvaliishitsa ndina khuli mwayi yayitsanga makondi mushikuri?
17Vaefurahimu vasikamilanga misambwa;
lekhani navo!
18Khali nivamali khutanda, vayaanzilila miima chiu khukhola vulaaya;
vayaanza khuheelwa tsisoni khuvira khuheelwa vukhumi.
19Khulwa yako, shihungutsi shiliitsa khuvahilana,
misango chiavo chiliitsa khuvaha tsisoni.”
Currently Selected:
HOSEHA 4: LLLCATHOLIC
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013
