VAGALATIA 5

Vuvoholole mu Kristo

1Kristo wa khuvoholola, khulu khwenya khuve vavoholole! Sinjili ni tsingulu khuli vandu vavoholole. Muvuli khukwa khandi khuli varukwa va Malako.

2Hulishitsi! Inzi Paulu, muvoolelanga ndi niiva munyi vene munyala khuhuchilila khushevwa, kamanyinyanga ndi Kristo avulakhu shindu shiosi shia yakholela munyi. 3Ngalushilanga khuchelihitsa shia mundu wosi unyala khuhuchilila khushevwa ndi khutukha alonde Malako koosi. 4Munyi vamuchelitsanga khwikholwa khola khuva valunji imbeli wa Nyasaye khuvirila mu Malako, mwayiyahula vene haluveka khurula khu Kristo. Muli ihale wene khurula khu tsimbavasi tsia Nyasaye. 5Navutswa khutsi, khuli ni lisuuvilitswa ndi Nyasaye aliitsa khukhukhola khuva valunji imbeli wewe; nako ka khulindililanga khuvirila mu tsingulu tsia Roho wa Nyasaye, wu kholanga muhinzilu khuvirila mu lisuuvila lieru. 6Lwa khuli mu Yesu Kristo, khushevwa inoho khuvula khushevwa khuvula vukhala vwosi. Shindu shikali, ni lisuuvila lilolekhanilanga mu muhinzilu kuleranga vuyaanzi.

7Mwali numutsilililanga nu mwiima mulahi! Ni viina wamwikalila khulonda katoto? Anyala khuva wamukaatilitsa munjila shina? 8Khukaatilitswa khuli khwenokho, shiukhurulanga khu Nyasaye, wamulaanga tawe. 9Khuli vavoolanga, “Mamela mati ka vimbitsanga shinokho shiosi.” 10Ndi ni lisuuvilitsa mu Mwami ndi shiumunyala khulondakhu makhuva kandi tawe. Nyasaye aliitsa khusalilitsa mundu umukoyanyinyanga woyo, khali nava ni viina.

11Vasuuvili vashianje, niiva nzilililanga khwilwatsa makhuva khulondokhana khu shishevo, shichila shina nzilililanga khutambitswa? Niiva makhuva kenako nindio kali, khwilwatsa khwanje khulondokhana khu musalaba kwa Kristo, shiukhwakhaleri tsisoni tawe. 12Nzikombanga ndi vandu vamukoyanyinyanga, shikali vavuli khushevwa vutswa khwonyene tawe, navutswa vameete khwilaata vene!

13Munyi vasuuvili vashianje, mwalaangwa khuva vavoholole. Navutswa muvuli khurumishila vuvoholole vwenyu khuva khuli shivune shiu khumwimilila ni liiva lienyu liu mmbili; navutswa murumishile vandi munjila yu vuyaanzi. 14Malako koosi kahambanyinywa halala mu lilako lilala: “Uyaanze mureende wowo khuli mwene wiyaanza.” 15Navutswa niiva munyala khulolekha khuva khuli tsinyama tsiumbulimu, khulumana nu khusalilitsana tsiene, khu muheenze vulahi, inoho munyala khutivitsana vene.

Roho wa Nyasaye nende Liiva liu Mmbili

16Khulwa yako, mbolanga ndi muleshe Roho ave namwimililanga mu limenya lienyu; khandi muleshe khurweshitsa likomba li liiva liu mmbili kwenyu. 17Ka liiva liu mmbili kwikombanga kahinganyinyanga ka Roho yenyanga kakholwi. Ka Roho yenyanga kakholwi, kahinganyinyanga ka liiva liu mmbili likombanga. Khuli nu vuhimwa hakari ha Roho nende liiva liu mmbili; khandi yaka kamanyinyanga ndi shiumunyala khukhola ka mwenyanga mukhole tawe. 18Khulwa yako, niiva Roho amwimililanga, Malako shikanyala khuva kamwimililanga tawe.

19Vikholwa vi liiva liu mmbili viamanyikhana havulavu; navio ni vikholwa via vandu vasatsa nende vakhali vakholanga nivashili khuhilana, mwiima kwi shifwavi, nende vikholwa vindi viosi vilerelanga vandu tsisoni; 20khusaala khu misambwa, vuloochi; vutsiku, khulembana, khushendekha, vurima, vwimani, mahingani, liavukhana 21nende imbotokha; vutandi, khusieva, nende vindu vindi visasanga vienevo. Muchelihitsanga nunundi, khuli namuchelihitsa khale, vandu vamenyanga munjila khuli yeneyo, shivaliitsa khwinjila mu Vwami vwa Nyasaye tawe.

22Navutswa vikholwa virulanga khu Roho nu vuyaanzi, khuyaanza vandi, milembe, likhutsila, mwoyo mulahi, vulahi, vusuuvilwa, 23vuhoma nende khwilinda munjila indahi. Lilako livulakhuho linyala khuhinganyinya vindu khuli vienevo. 24Yavo vali va Yesu Kristo, vali khuli vayiirila khu musalaba liiva liavo liosi li mivili ni lienya nende likomba liachio. 25Niiva khunyala khumenya khuli Roho yenyanga, leshi Roho atsililile khukhwimilila mu limenya lieru. 26Chendi khuleshe khwilola, khuleshe khurindilana vene inoho khushendeshelana.

Currently Selected:

VAGALATIA 5: LLLCATHOLIC

Highlight

Copy

Compare