VAGALATIA 1
1
1Inzi Paulu, shikali nalaangwa khuva murumwa khuvirila khu vunyali vwa vandu inoho tsingulu tsiu mundu tawe; navutswa khuvirila khu vunyali vwa Yesu Kristo khandi Nyasaye, uli Tata wisimushitsa Yesu Kristo khurula mu likhutsa. 2Vasuuvili voosi vandi navo hanu, khuhaananga milembe chieru khu makanisa koosi mu litaala lia Galatia.
3Nyasaye, uli Tata nende Mwami weru Yesu Kristo vamulolele tsimbavasi nu khumuha milembe.
4Kristo yihaana mwene khukhutsa, shichila vwoni vweru khulondokhana khu lienya lia Nyasaye, uli Tata weru, khu akhuvoholole khurula mu vindu vitamanu vikholekhanga mumatukhu kanu. 5Vukhumi vuve khu Nyasaye mihika ni mihika! Amina.
Ivanjeli Indala Yatoto
6Ndi ni lichenya khuli mwambakhane vwangu woyo wamulaanga khuvirila mu tsimbavasi tsia Kristo, khandi mulondanga Ivanjeli yu lukanu lundi. 7Shikanyala khuva khuliho ni Ivanjeli yu lukanu lundi tawe; navutswa khuliho na vandu valala mu munyi vamunyashitsanga, nivenya khukoyanyinya Ivanjeli ya Kristo. 8Navutswa, khali niiva ni vanga khutsi inoho indala khu tsinjelosi khurula mwikulu, inyala khumwilwatsila Ivanjeli yu lukanu lundi khuvira ya khwilwatsa khu munyi, nu vulahi nalaamilwi! 9Khuli lwa khumali khuvoola, nunundi ngalushilanga khuvoola ndi, niiva mundu aliitsa khumwilwatsila Ivanjeli yu lukanu lundi khuvira ya mwahuchilila; nu vulahi nalaamilwi!
10Nyala khuva nyenyanga vandu vambukuli khuva mulahi, inoho Nyasaye khumbukula khuva mulahi? Inoho nyala khuva njelitsanga khuyaanzitsa vandu? Niiva nzilililanga khwenya vandu vanyanze, shinyala khuva murumishi wa Kristo tawe.
Khuli Paulu Yakholwa Khuva Murumwa
11Vasuuvili vashianje, nakhayaanzi mumanye ndi Ivanjeli ya namwilwatsila, shiyarula khu vandu tawe. 12Shinachinyola khurula khu mundu, inoho khwechitswa nu mundu tawe; navutswa nachinyola lwa Yesu Kristo yamanyinya.
13Mwahulila khale makhuva khulondokhana khuli namenyanga nindi mu idini ya Vayahudi, khuli natambitsa vululu likanisa lia Nyasaye, khandi khuli nachelitsa khwenya khulitivitsa. 14Nali namanya makhuva khulondokhana khu idini ya Vayahudi khuvira Vayahudi vi likhula lianje, mu vandu vaanje va nali nivulwamu. Nali nu vuha vukali khushila muno khulonda mechitso ka vakuuka veru.
15Navutswa Nyasaye, wali niyandovola nishili khwivula, khandi wali niyanaanga khuvirila mu tsimbavasi tsietsie; 16yayaanzitswa muno khumanyinya Mwana wewe, khu nzilwatse Ivanjeli khulondokhana khuye khu vandu vi tsimbia tsindi. Shinali natsiakhu khureeva mundu wundi wosi likhuva lianyala khukhola tawe. 17Khali nali nishili khutsiakhu Yerusalemi khulola vandu vali vu khuraanga khuva varumwa imbeli wanje inzi nishili. Navutswa naroonjela ninzia mu shivala shia Arebia, khandi ningalukha mu litaala lia Damasika. 18Mihika chivaka nichiakhavira, natikulukha ninzia Yerusalemi khuchendelela Kefa. Namenya naye khumatukhu likhomi na karanu. 19Navutswa avulakhuho murumwa wundi wa nalolayo, nikakhali Yakobo, amwavo wu Mwami.
20Musuuvilitsanga imbeli wa Nyasaye ndi ka muhandichilanga ni katoto, shikanyala khuva ku vuvehi tawe. 21Matukhu mati nikakhavira, nasimukha ninzia khuchendelela tsisomo tsia Siria nende Kilikia. 22Mumatukhu kenako, vandu va makanisa mu lusomo lwa Yudeya, vali nivashili khumanya vulahi vwene. 23Vali vahulilakhu vutswa makhuva ka vandu vavoolanga, “Mundu wa khutambitsanga yilwatsanga lisuuvila lia yachelitsanga khutivitsa!” 24Vandu venavo vahaana vukhumi khu Nyasaye shichila inzi.
Currently Selected:
VAGALATIA 1: LLLCATHOLIC
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013
