MAKABAYO 3
3
Khuli Helioduro Yatukha mu Yerusalemi
1Lwa Oniasi yali nali Mukali wa vasalisi voosi mu Yerusalemi, litaala litakatifu likhoyela milembe khandi nilihindahala. Vandu valondanga malako kalio, shichila Oniasi yali wayihaana nu mwoyo kwosi khurumishila Nyasaye, khandi yali wayambakhana vutamanu. 2Khali mumatukhu kenako, vami vali vaha Litempeli luyali nu khulikhuminya, lwa vahilanga mulio vihanwa viu vukuuli vululu, 3khali Mwami Selehuko wa Asia, namalila tsisenti tsietsie tsiosi khurunga mihinzilu chiakholekhanga khulondokhana khu milukha chi misango khurula mu livishilu lielie mwene.
4Navutswa mundu wundi walaangwangwa Simoni, khurula mu vandu vuluhia lwa Benyamini, wali nali mwimilili wi Litempeli yahangalitsana mulilomoloma nu Mukali wa vasalisi voosi khulondokhana khuli vwimilili vwi mihinzilu vwa kholekhanga mu isokoni yi litaala likali. 5Lwa yakhaywa khulomoloma na Oniasi, yasimukha natsia khulola Apolonia wi litaala lia Tarisa. Mumatukhu kenako, Apolonia yali nali gavana wa Siria Ingali nende Foenike. 6Yamuvoolela ndi tsisenti ni tsinyishi mu livishilu lia Yerusalemi, khali shitsinyala khuvalitswa, inoho shitsili tsindala khu tsisenti tsi misango tawe. Navutswa vwakhavele vutoro khu mwami navukuli tsisenti tsienetso. 7Lwa Apolonia yakana nu mwami, yamuvoolela makhuva khulondokhana khu tsisenti tsia yali niyavoolelwa makhuva khulondokhanakhu. Nalwo lwa mwami yarovola Helioduro, wasinjililanga mihinzilu chiechie chiosi, manamuruma ni lilako liu khutsia khumuvukulila tsisenti tsienetso. 8Helioduro yaraanga vwangu luchendo lwelwe, nu khwikhola atsitsanga khurunishitsa mataala ki shivala shia Siria Ingali nende Foenike, navutswa yali ni lienya liu khutsia khurweshitsa ku mwami yali niyenyi kakholeshe. 9Lwa yali niyakhatukha mu litaala likali lia Yerusalemi, maniyinjilitswa vulahi nu Mukali wa vasalisi voosi wi litaala likali lienelo, yavavoolela shivune shiatoto khulondokhana khu luchendo lwelwe. Yavareeva nikava makhuva ka yali niyavoolelwa ni katoto. 10Mukali wa vasalisi voosi yamuvoolela ndi tsiesenti tsiarikala mu livishilu ni tsia vakhutsakhali nende vavisandu, 11khandi ndi tsisenti tsindala ni tsiu mundu walaangwangwa Hirikana mwana wa Tobiasi, mundu wali niyaheelwa luyali lunyishi muno. Tsisenti tsienetso tsiosi ni vitonye vi ifetsa tsikilo 13,000 nende itsahabu tsikilo 6,500. 12Yavoola khandi ndi nu vutamanu khwononyinya mioyo chia vandu, vali nivavikha lisuuvila liavo mu vutakatifu vwa havundu henaho, khandi mu vutakatifu, khandi vulahi vwi Litempeli liali ni liaheelwa luyali shia havundu hosi mu shivala.
Khuli Helioduro Yaloshitsa Khwinjila mu Litempeli
13Navutswa Helioduro yatsililila khuvoola ndi tsisenti tsienetso tsivukulwi nu khuhilwa mu livishilu liu mwami, khulondokhana khuli mwami yali navooli kakholeshe. 14Khulwa yako, yaviritsa litukhu, manatsia khwinjila mu Litempeli, khurunishitsa tsisenti tsienetso. Shikholwa shienesho shiachila shileeche nishiraanga mu shivala shienesho. 15Vasalisi vakwa mahunama imbeli wu vwaali, nivifwali tsinguvu tsiavo tsiu vusalisi, nivasaala khu Nyasaye alinde tsisenti tsiali nitsili mu livishilu lienelo; shichila yali warulitsa malako ku khulinda tsisenti, tsia vandu vavikhanga mu livishilu mu Litempeli. 16Shia mundu wosi waheenzakhu khu Mukali wa vasalisi voosi yanyakhana mu mwoyo; shichila yali ukalukhane likoondo lielie, khumanyinya ndi anyakhananga mu mwoyo kwekwe. 17Yatechelanga naria, khumanyinya ndi ahulilanga isalila mu mwoyo kwekwe, lwa vandu vamuheenzanga. 18Vandu vakhola vwangu, nivarula mu tsinzu tsiavo mu vituma khutsia khusaala, shichila Havundu Hatakatifu hali nali himbi khwononyinywa. 19Khali vandu vakhali nivivohi tsinguvu tsialombwa khu makunia vitsula shia havundu hosi khu tsinjila. Vaana vi shikhana vakhonyanilanga mu tsinzu, vilukhachila khulala nivatsia mu vilivwa, khandi valala nivatsia khu masisi, na vandi niheenzelela mu matirisha. 20Vandu venavo voosi vachinga ikulu makhono kavo khu Nyasaye, nivasaala. 21Vuveleli vwaliho khulondokhana khuli vandu venavo voosi vali nivakwili mahunama, khandi khulondokhana khuli Mukali wa vasalisi voosi yali nu vuveleli mu mwoyo kwekwe.
Khuli Mwami Nyasaye Yalinda Litempeli Lielie
22Lwa vali nivashisaalanga khu Mwami Nyasaye khulinda vulahi tsisenti, tsiali vali nivaheelwa valinde, 23Helioduro yatsililila khukhola ka mwene yali namali khuloshitsa khukhola. 24Navutswa lwa yali niyakhatukha ha livishilu, ye mwene nende valindi veve, Mwami Nyasaye Uli Ikulu khu Viosi ya vamanyinya malolo, katechelitsa nu khuchehitsa tsingulu tsia shia mundu wosi wachelitsanga khwinjilamu halala na Helioduro. Shia mundu wosi yahundushila, shichila vunyali vwa Nyasaye. 25Valola ifarasi yalolekhanga khuva indahi muno khuvo, muhili mwene wachihilanga niyifwali tsinguvu tsiliihe tsialombwa khu itsahabu nende viuchi, viali nivialombwa khu itsahabu. Yalondelela vwangu Helioduro, nihola holanga nimuseena ni tsimbakaywa tsiayo. 26Helioduro yalola khandi vandu vavili vi tsingulu khandi vi likoondo lilahi, nivifwali tsinguvu tsiu vukuuli vululu. Vasinjila khuluveka lwelwe lundi, nivaraanga khumurumula vuchila khumulolela tsimbavasi. 27Lwa Helioduro yakwa hasi nalola shisuundi khandi naraanga khushiinda, vandu veve vamusinjilitsa, nivamuvikha khu shiseelo. 28Vamurulitsaho. Khutsisaa tsindi ni tsimali khuvira khale, mundu mweneyo yatukhaho nali ni shituma shia vandu vanyishi; yinjila havundu hi livishilu liali nilili, valindi veve voosi nivaliho. Vamanya vulahi muno ndi tsingulu tsiu khuchenyinya tsia Nyasaye, natsio tsiakholanga muhinzilu. 29Lwa Helioduro yali nashikoni mahunama, vuchila shiavoola shichila tsingulu tsia Nyasaye tsiali nitsikholanga muhinzilu, vuchila khuva ni lisuuvilitswa liosi liu khuhona, 30vitsominya Mwami Nyasaye, wali nakholi vindu viu khuchenyinya shichila havundu hehe hamenyanga. Litempeli, lia vandu vanyishi vali nivaria, khandi liachilanga nivava vakoyanu, litsula vuyaanzi khandi lisangala, shichila Mwami Nyasaye yalolekhayo. 31Valala khu valina va Helioduro vareeva vwangu Mukali wa vasalisi voosi Oniasi asaale khu Nyasaye Uli Ikulu khu Viosi, nayaanza ahonyinyi vulamu vu mundu wali nakhutsanga woyo. 32Mukali wa vasalisi voosi yakhola musango, nakanakananga ndi Nyasaye aliitsa khuhonyinya vulamu vwa Helioduro; shichila shiyali ni lienya mwami ave ninganakani ndi Vayahudi navo vali nivakholi kenako khu mundu wa yali niyaruma tawe. 33Lwa Mukali wa vasalisi voosi Oniasi yali nakholanga musango, vasatsa vavukha vavili venavo valolekha khandi khu Helioduro. Vamuvoolela, “Sanditsa Mukali wa vasalisi voosi Oniasi. Mwami Nyasaye umali khukhuhonyinya vulamu vwovwo shichila ye. 34Witsushitse ndi Nyasaye wu mwikulu neye wa khusalilitsa yivi. Simukha utsi khuvoolela shia mundu wosi makhuva khulondokhana khu tsingulu tsia Nyasaye.” Nivamali khuvoola kenako, varulaho nivatsia. 35Nalwo lwa Helioduro yakhola musango khu Mwami Nyasaye, nalaaka khumukholela vindu vinyishi, shichila Mwami Nyasaye yali umali khumuhonyinya vulamu vwevwe. Niyakhashielitsa Oniasi milembe chiu khulekhana, yarulaho nu mukaanda kwa vasikali veve, natsia khulola Mwami Antioko. 36Nali iweneyo, yahaana vushiahidi khu shia mundu wosi khulondokhana khu vikholwa via Nyasaye uli nu vunyali yali nakholi imbeli wewe.
37Lwa Mwami Antioko yareeva Helioduro mundu lukanu shina wanyala khuruma Yerusalemi khulitukhu lindi, yamuchipa, 38“Nikava ulikhu nu mutsiku inoho mundu uchelitsanga khwikhalila khukhunuula vwami vwovwo, neye wa uliitsa khuruma. Aliitsa khukalukha khu yivi namali khusalilitswa vululu muno. Niiva aliitsa khuchelitsa khwilukha, ni kilikali, tsingulu tsiu khuchenyinya tsia Nyasaye tsikholayo muhinzilu. 39Nyasaye wu mwikulu neye uheenzanga shia shindu shiosi shikholekhanga havundu henaho khandi ahaanaho vukhonyi. Neye wu salilitsanga khandi ativitsa shia mundu wosi witsanga khukholelaho shifwavi.” 40Nindi makhuva kikholekha khu Helioduro, khandi khuli livishilu lialindwangwa.
Currently Selected:
MAKABAYO 3: LLLCATHOLIC
Highlight
Share
Copy
Want to have your highlights saved across all your devices? Sign up or sign in
© The Bible Society of Kenya, 2013