MAKABAYO 2
2
Yeremia Yavisa Liheemo Litakatifu liu Mwami Nyasaye
1“Khusomanga makhuva khurula mu makhuva kahandikwa ndi Muprofeti Yeremia yavoolela vandu vali nivahilwangwa mu vuhaambe khutsia khuvisa mililu khurula khu vwaali, manya khuli lwa khumali khuvoola. 2Khwamanya khandi ndi yaveechitsa Malako ka Nyasaye, khandi navachelihitsa vavuli khukaatwa khusaala khu misambwa chiasiaha chiali ni chialombwa khu itsahabu nende ifetsa, chia valiitsa khulola nivamenyanga mu vuhaambe. 3Yarumishila makhuva kandi malala mele khuvatinyilitsa khuvula khulekhana na Malako.
4“Makhuva malala mele yaka ka khwivaalilanga shindu shindi khulondokhana khu Yeremia, wimililwangwa mu vutakatifu vwa Nyasaye, khuli yahaana lilako vahile Liheemo Litakatifu nende Lisanduku li Lilakano khu shikulu wa Musa yaheenzela nalola shivala shia Nyasaye yali niyavoola aliitsa khuha vandu veru. 5Yeremia yatukhaho nanyola luhangaywa. Yavikhaho Liheemo Litakatifu, Lisanduku li Lilakano nende vwaali vu khusambilakhu vubani; niyikala vwinjililu vwa havundu henaho.
6“Valala khu valina veve vamulonda vachelitsa khuheenzeshitsa injila yu khwinjilayo, navutswa shivali vachilola tawe. 7Lwa Yeremia yahulila makhuva khulondokhana khu vindu vienevo, yavakondeshela navoola, ‘Mundu avulakhuho uliitsa khumanya havundu hanu Nyasaye nashili khulaanga halala khandi vandu veve nu khuvavela tsimbavasi. 8Mumatukhu kenako koosi, aliitsa khuvoola havulavu havundu ha vindu vienevo viaviswa, khandi liang'ang'a liu vulavu vwevwe vuliitsa khulolekhanila mu malesi, manya khuli kakholekhanga mumatukhu ka Musa; khandi khuli kakholekhanga mumatukhu ku Mwami Solomoni lwa yasaala ndi Litempeli litakaswi mu tsingulu tsiu vutakatifu vwalio.’
9“Khali khwavoolelwa makhuva khulondokhana khuli Mwami Solomoni wali nu vusitsa, yakhola musango kukhutakasa Litempeli lwa liali ni liakhamala khumbakhwa, 10khandi khuli lwa Musa yasaala khu Mwami Nyasaye, ma mulilu nu kurula mwikulu, nu kulaalitsa misango. Nindio khandi Solomoni yasaala, ma mulilu nu kurula mwikulu nukulaalitsa vihanwa viu khusambwa. 11Musa yavoola, “Misango chienecho chialaalitswa shichila shihanwa shiu khurulitsaho vwoni shiali nishishili khulilia. 12Khali Solomoni yikhoyela kenako khumatukhu munane.
Havundu hi Vitabu via Nehemia Yasomanga
13“Makhuva malala mele kahandikwa mu vitabu via vami khandi mu vitabu viahandikwa khulu khwitsushitsa makhuva khulondokhana khu Nehemia, wraanjitsa inzu yu khusomelamu vitabu, khandi narulitsa shia havundu hosi vitabu via vami nende vaprofeti, vitabu via makhuva khulondokhana khu Daudi, nende tsibarwa tsiahandikwa khu vami khulondokhana khu vihanwa viu khwirulitsa khuhaana. 14Yudasi yavunjelitsa khandi vitabu viali ni viasalanyinywa shichila liihe lia khwakwana. Khali khushili ni vitabu vienevo nunundi. 15Nikava mwenyanga khusoma vitabu vienevo, rumi vandu vatsi khumuvukulila.
Khulaangwa Khwikhoyela Mulukha
16“Khulwa yako, khumuhandichilanga lwa khuli himbi khwikhoyela Mulukha ku Khunihitswa. Numuyaanza mwikhoyele mulukha kwenoko. 17Nyasaye neye wahonyinya vandu veve voosi, khandi wavaha shivala shiavo shitakatifu shiu khumenyamu, vwamihi, vusalisi nende mihinzilu chiu khurweshitsa mu Litempeli, 18manya khuli yali ni yalaaka khuvirila mu Malako keke. Khuli ni lisuuvilitswa mu Nyasaye ndi aliitsa khukhuvela tsimbavasi nu khukhulera halala khurula shia havundu hosi mu shivala khwitsa havundu hehe hatakatifu, shichila neye wa khurulitsa mu matiinyu makali khandi wanihitsa havundu hehe hatakatifu.”
Ku Muhandichi Ali Nako
19Yasoni wi litaala lia Kurene, neye wahandika mu vitabu vikali viranu makhuva khulondokhana khu vindu via Yudasi Makabayo nende vamwavo veve vakhola, khuli Litempeli lianihitswa, khandi khuli vwaali vwalio vwakholwa khuva vutakatifu. 20Neye wavoola khandi makhuva khulondokhana khu maahe ka yakwana Antioko Epifane nende mwana wewe Ehupatori, 21nende makhuva khulondokhana khu malolo khurula mwikulu ka vandu vakwananga ni tsingulu nivali nu mwoyo ku khukhutsa, shichila idini ya Vayahudi. Khali ndio, nikava khwali ni isavu indititi ya vasikali, khwavukula shivala shikali khandi nu khuhitsanyinya mikaanda chia vasikali va vandu vi tsimbia tsindi. 22Vavukula ni tsingulu Litempeli liali liamanyikhana shia havundu hosi mu shivala, nivahonyinya litaala likali, nivaraanjitsa khandi malako kali nikali himbi khurulitswaho. Vali ni tsingulu tsiu khukhola kenako koosi, shichila Mwami Nyasaye yali mulahi khuvo khandi navalolela tsimbavasi.
23Nzitsanga khuchelitsa khwimbihitsa mu shitabu shilala shionyene vutswa makhuva koosi ka Yasoni wi litaala lia Kurene, yali niyahandikwa mu vitabu vikali viranu. 24Makhuva manyishi kivaalwa khandi makaratasi kahandikwakhu ni manyishi, khali mundu ukasomanga anyala khulechelelwa khusoma makhuva khulondokhana khu vindu viakholekha. 25Navutswa mali khukimbihitsa khwenya makhuva kenako kasomwi na vandu voosi. Vandu valiitsa khukasoma shichila vayaanza khusoma, valiitsa khuhulila vulahi lwa vasomanga, khandi yavo vasomanga shichila venyanga khukavikha mu murwi, valiitsa khusoma mu vutoro, khandi kaliitsa khukhonya vandu voosi. 26Muhinzilu kwa inzi mwene mbukule yuku, ku khwimbihitsa vindu shiukuli mutoro tawe; kwenyanga mundu akhole muhinzilu ni tsingulu tsiosi, nu khukoritsa tsindolo. 27Nu vutiinyu muno khulombela vacheni vi mitsanzo lukanu na lukanu mu mulukha kwi lilia vanyala khuyaanza. Navutswa ndi nu vuyaanzi khuvirila mu matiinyu yaka, khuyaanzitsa vasomi vaanje. 28Nzitsanga khurichila muhandichi mwene watoto waraanga khuhandika vuraambi vwa makhuva kenako. Navutswa nzitsanga khwimbihitsa vutswa makhuva kikholekha. 29Shindikhu mumbashi wumbakhanga inzu uli ni lienya liu khulola ndi umali khurumishila shia shindu shiosi khutukha lwa inzu yeneyo iliitsa khuvwa tawe, navutswa ndi vutswa khuli mundu uvekhanga ilaanji khu inzu yeneyo, aheenzeshitsanga vutswa khulola ndi inzu yeneyo ilolekhanga vulahi. 30Mundu wahandikakhu makhuva kakhale, neye wamanya shia shindu shiosi, khandi neye unyala khuvoola ka yalola vulahi vwene, khandi neye uli nu vunyali khuli anyala khwivaala mu vuraambi. 31Navutswa mundu wimbihitsanga lukanu, ahuchililwangwa khuhandika muvwimbi vwa makhuva, vuchila khwivaala shia shindu shiosi mu vuraambi. 32Khulwa yako, vuchila khwenya khutsililila na kandi, leshi khuraanje lukanu lweru vuchila khumeeta shindu khu kali nikavoolwa khale; shichila khuliitsa khuva nu khukholanga shikholwa shiu vuyiingwa, nikava khulahandika liraanjilila liraambi khuve khumali lukanu lwa khuli nalwo.
Currently Selected:
MAKABAYO 2: LLLCATHOLIC
Highlight
Share
Copy
Want to have your highlights saved across all your devices? Sign up or sign in
© The Bible Society of Kenya, 2013