VAKORINZO 3
3
Varumishi vi Lilakano Liyia
1Kanyala khuva ni kilikali, khwichinjililanga khandi khulondokhana khu khutsi vene? Kanyala khuva khwenyanga khunyole tsibarwa tsiu khwimanyinya khu munyi inoho khurula khu munyi, khuli vandu valala vanyola? 2Munyi vene muli khuli ibarwa ya khuli nayo, yahandikwa mu mioyo chieru, khulu khwenya shia mundu wosi achimanye khandi achisome. 3Nu munyi vene mwimanyinya muli khuli ibarwa yarula khu Kristo, khurulana khu muhinzilu kweru, yakhahandikwa nu vwinu tawe, navutswa yahandikwa na Roho wa Nyasaye uli mwoyo. Shikanyala khuva yahandikwa khu machina kakhongwa tawe, navutswa mu mioyo chia vandu.
4Khuvoolanga ndio, shichila khuli ni lisuuvilitsa mu Nyasaye khuvirila mu Kristo. 5Shindu shivulakhuho shinyala khukhukhola khwivukuli khuli ni tsingulu tsiu khukhola muhinzilu yuku. Tsingulu tsia khuli natsio tsiosi tsirulanga khu Nyasaye. 6Nyasaye neye wa khukhola khuva varumishi vi Lilakano liyia, shikanyala khuva vi ibarwa yahandikwa tawe, navutswa va Roho; shichila ibarwa ileranga likhutsa, navutswa Roho ahaananga vulamu.
7Malako kahandikwa mu tsindukuta khu machina kakhongwa, ma vukhumi vwa Nyasaye nuvulolekha lwa kahaanwa. Khali niiva liang'ang'a liu vweni vwa Musa liali nilivwetsanga, liali ni tsingulu tsinyishi, khali nililomba Vaisraeli khuvula khuraangalila khuye nivamuheenzanga. Niiva Malako, lwa karumikhanga kaleranga likhutsa, kitsa nu vukhumi khuli vwenovo, 8muhinzilu kwa Roho kuliitsa khuva nu vukhumi vunyishi muno! 9Niiva muhinzilu kuchilanga vandu nivakhalachilwa kuli nu vukhumi vunyishi, muhinzilu kuchilanga vandu ni vahonyinywa kuli nu vukhumi vunyishi muno! 10Ni kilikali, shindu shiali nu vukhumi vunyishi shivula vukhumi nunundi, nushisasanyinya khu vukhumi vuviranga. 11Niiva khwali nu vukhumi mu yeshio shialiho hatititi vutswa, yeshio shili mwoyo mihika ni mihika, shiliitsa khuva nu vukhumi vunyishi muno!
12Khulwa yako, lwa khuli ni lisuuvilitswa khuli lienelo, shiukhunyala khuria tawe. 13Shiukhunyala khuva khuli Musa wavimba shitambaya mumoni mwemwe, khulu khuvula khwenya Vaisraeli khulola vulavu vwang'ang'anga, nuvukora. 14Ni kilikali, tsinganakani tsiavo tsiachila nivasuluhala; khali khutukha nunundi, lwa vasomanga vitabu vi lilakano likhulu, shitambaya shilala shienesho shi shivavimbanga mu tsimoni tsiavo; navutswa shitambaya shienesho, shinyala khurulitswa khuvirila mu Kristo wonyene. 15Khali nunundi, lwa vasomanga Malako ka Musa shia havundu hosi, shitambaya shienesho shi shivimbanga tsinganakani tsiavo. 16Navutswa lwa mundu ahuchililanga khulonda Mwami Nyasaye, shitambaya shienesho shirulitswaho. 17Mwami Nyasaye ni Roho, khandi wa Roho wu Mwami Nyasaye ali, vuvoholole vuliho. 18Khutsi voosi, va khwarulitswa vitambaya mu tsimoni tsieru, khwang'ang'anga vukhumi vu Mwami Nyasaye; khandi khukalukhanyinywa khusasa khuli ye, khuvirila mu vukhumi vunyishi vurulanga khu Mwami Nyasaye, nali Roho.
Currently Selected:
VAKORINZO 3: LLLCATHOLIC
Highlight
Share
Copy
Want to have your highlights saved across all your devices? Sign up or sign in
© The Bible Society of Kenya, 2013
