VAKORINZO 4

Vuteteshele vu Mundu nende Vunyali vwa Nyasaye

1Nyasaye wa khuha muhinzilu yuku khukhole khuvirila mu tsimbavasi tsietsie, khandi shiukhunyala khukhutsa mwoyo tawe. 2Nikhali, khwamala khulekha khukhola vikholwa viosi viu muvwivisi nende vileranga tsisoni. Shikali khuchelitsanga khukaata mundu inoho khulomba likhuva lia Nyasaye khuva liu vuvehi tawe. Khuluveka lundi, lwa khulomolomanga katoto havulavu, khuchelitsanga khulomba shia mundu wosi khuva ni tsinganakani tsiu mukari tsindahi imbeli wa Nyasaye. 3Khali niiva Ivanjeli ya khwilwatsanga yaviswa, kalolekhanga yaviswa khurula khu yavo vativanga. 4Shivanyala khusuuvila tawe, shichila nyasaye mutamanu wamihanga shivala shinu, wavikha tsinganakani tsiavo mu shisuundi. Wavikalila khuvula khulola vulavu vuvwashilanga, nuvuli vulavu vurulanga khu Ivanjeli khulondokhana khu vukhumi vwa Kristo, uli ni likoondo liatoto khuli lia Nyasaye. 5Shikanyala khuva khwilwatsanga makhuva khulondokhana khu khutsi vene tawe; navutswa khwilwatsanga khulondokhana khu Yesu Kristo khuli lwali Mwami; khandi khutsi vene khuli varumishi venyu shichila Kristo. 6Nyasaye wavoola, “Vulavu vulakha khurula mu shisuundi!” Neye Nyasaye mulala mwele walomba vulavu vwevwe khwakha mu mioyo chieru, khukhuha vucheli khulondokhana khu vukhumi vwevwe vwang'ang'anga mu vweni vwa Kristo.

7Navutswa khutsi khuli ni livishilu yili, khuli tsinyungu tsialoongwa khu matohi, khumumanyinya ndi vunyali vwosi vwi tsingulu nu vwa Nyasaye wonyene; shiuvunyala khuva nu vweru vene tawe. 8Shia khase khosi khuvirilanga mu vutiinyu, navutswa khukuuranga; matukhu malala khuhaya hayanga, navutswa shikali khukhutsanga mwoyo tawe; 9khutambitswangwa, navutswa shikali khwivililwangwa tawe. Khali niiva matukhu malala khusalilitswangwa vululu muno, shikali khutivitswangwa tawe. 10Matukhu koosi khuli ni likhutsa lia Kristo mu mivili chieru, khu vulamu vwevwe vuloleshele mu mivili chieru. 11Khuli mu maraava ki likhutsa shia khase khosi mu limenya lieru liosi shichila Kristo; khu vulamu vwevwe vuloleshele mu mivili chieru chitushili khukhutsa yichi. 12Nakhwo khuvoola, likhutsa likholanga muhinzilu mu khutsi, navutswa vulamu vukholanga muhinzilu mu munyi.

13Mahandiko Matakatifu kavoolanga, “Nalomoloma shichila nasuuvila.” Khuvirila mu mwoyo kwi lisuuvila mulala kwenoko, khali khutsi voosi khulomolomanga, shichila khwasuuvila. 14Khwamanya ndi Nyasaye, wisimushitsa Mwami Yesu khurula mu likhutsa, aliitsa khu khwisimushitsa khurula mu likhutsa khandi na Yesu, makhuvukule na munyi khwitsa imbeli wewe. 15Ni kilikali, koosi kaliho khulu khumukhonya; khandi lwa vandu vanyishi vatsililila khunyola mu vunyishi tsimbavasi tsia Nyasaye, vandu venavo valiitsa khusaala lisaala mu vunyishi, liu khusanditsa nu khuhaana vukhumi khu Nyasaye.

Limenya Khulondokhana khu Lisuuvila

16Khulwa yako, shiukhunyala khukhutsa mwoyo tawe. Khali niiva mivili chieru chivwetsanga tsingulu, navutswa liiva lieru mu mioyo linyolanga tsingulu shia litukhu. 17Vutiinyu vutititi vuliho khumatukhu mati, vuchilanga nu khunyakhana yuvu, vuliitsa khukhulerela vukhumi vunyishi vwi mihika ni mihika, vunyishi muno khuvira vutiinyu vwa khuvirilamu vwosi. 18Shiukhunyala khuraangalila tsimoni tsieru khu vindu via khulolanga tawe; navutswa khu vindu via khunyala khuvula khulola. Vindu via khunyala khulola vivetsaho khu tsisaa tsindititi tsionyene; navutswa vindu via khunyala khuvula khulola, viliitsa khuvaho mihika ni mihika.

Currently Selected:

VAKORINZO 4: LLLCATHOLIC

Highlight

Copy

Compare