VAKORINZO 13
13
Mivaalo Kukhumalilikha ka Paulu khu Vakorinzo
1Yulu nalwo luva luchendo lwanje lwa khavaka khwitsa khumucheniha. Khuli Mahandiko Matakatifu kavoolanga, “Liyaalwa liosi khutukha limanyikhane khuva ni liatoto khuvirila khu makhuva kavoolelwi na vashiahidi vavili inoho vavaka.” 2Nachelihitsakhu khale vandu vali nivakholi vwoni halala na vandu vandi voosi; nyenyanga khuvachelihitsa nunundi nimbulaho, khuli lwa navachelihitsa nindiho khu luchendo lwanje lwa khavili, khu lwa niitsa khukalukha nilivula khulekha khuvasalilitsa. 3Muliitsa khunyola shimanyilu shia mwenyanga khumumanyinya ndi Kristo alomolomelanga mwinzi. Lwa akholanga muhinzilu mu munyi, shikali nu muteteshele tawe. Navutswa Kristo amanyinyanga tsingulu tsietsie mu munyi. 4Khali niiva nu vuteteshele, navwo vwachila Kristo navambwa khu musalaba, khali nakhutsa, nikhali tsingulu tsia Nyasaye, natsio tsichilanga natsililila khuva mwoyo. Khali khutsi khuli vateteshele khuvirila mu Kristo; navutswa mulihaambana lieru na munyi, khuliitsa khutsililila khuva mwoyo khuvirila mu tsingulu tsia Nyasaye.
5Mwirunishitsi vene mulole, niiva mutsilililanga khumenya khulondokhana khu lisuuvila. Mwichelitsi vene. Munyala khuva mwakorwa khumanya Yesu Kristo ali mwoyo mu munyi?—nikakhali kario, shindu shivulakhuho shia mwamanya. 6Ndi ni lisuuvila ndi munyala khumanya shindu shivulakhuho shia khwakorwa. 7Navutswa khumusaalilanga khu Nyasaye ndi muvuli khukholakhu shindu shiosi shitamanu. Shikali kamanyinyanga khwakuura tawe; navutswa mukhole ku vulunji, khali niiva khulolekhanga khuli khwakorwa shia shindu shiosi. 8Shindu shivulakhuho shia khunyala khukhola khwikalila katoto, navutswa khukhola katoto konyene. 9Shia khase khosi khuli nu vuyaanzi nu khuli vateteshele, navutswa munyi muli ni tsingulu; khandi khumusaalilanga muve vaseletse. 10Nako kachilanga nimuhandichila vindu yivi, lwa ndi ihale wene khurula khu munyi; khu lwa ngalukha khumulola mbuli khuva mululu lwa ndumishila vunyali -- vunyali vu Mwami yamba khumbakha munyi, navutswa khuvula khumusambula.
11Lukhumalilikha, vasuuvili vashianje, nyoli milembe chiu khuheelishitsana! Lunjishitsi mwiima kwenyu. Muhulishitsi makhuva kaanje ka namuvoolela; muhulishitsane vene khuvene; khandi mumenye mu milembe. Nyasaye uhaananga vuyaanzi khandi uchilanga milembe nichivaho, aliitsa khuva na munyi.
12Muheelelane milembe chi shimanyilu shitakatifu shiu khulolelana malahi. Vandu va Nyasaye voosi vamuheele milembe chiavo.
13Tsimbavasi tsiu Mwami weru Yesu Kristo, vuyaanzi vurulanga khu Nyasaye, nende vuhambani vwa Roho Mutakatifu vive na munyi voosi.
Currently Selected:
VAKORINZO 13: LLLCATHOLIC
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013
