VAKORINZO 1
1
1Ninzi Paulu, murumwa wa Yesu Kristo khuvirila khu lienya lia Nyasaye, nende musuuvili washieru Timoteo—
Khuhandichilanga munyi vamuli likanisa lia Nyasaye mu litaala lia Korinzo, khandi khu vandu va Nyasaye voosi, vali shia havundu hosi mu lusomo lwa Akaya.
2Nyasaye, uli Tata weru nende Mwami Yesu Kristo vamulolele tsimbavasi, khandi vamuhe milembe.
Paulu Yasanditsa Nyasaye
3Khusanditsi Nyasaye, uli Tata wu Mwami weru Yesu Kristo, Tata wi tsimbavasi, uli Nyasaye uleminyanga mioyo chia vandu voosi! 4Nyasaye akhuleminyanga mioyo mu matiinyu keru koosi, khu khali khutsi khuve nu vunyali vu khuleminya mioyo chia vandi mu matiinyu koosi lukanu na lukanu, munjila indala yene khuli Nyasaye akhuleminyanga mioyo chieru. 5Lwa khusanganga mu vunyishi mulinyakhana lia Kristo, nindio khandi khuvirila mu Kristo, khusanganga mulileminywa mioyo. 6Niiva khunyakhananga, linyakhana lieru nalio lichilanga nu muleminywa mioyo, khandi nu muhonyinywa. Niiva khuleminywangwa mioyo, nu munyi navo vamuleminywangwa mioyo; khandi muheelwa tsingulu tsiu khutsililila khwikhutsila mulinyakhana lilala liene lia khunyakhananga. 7Lisuuvilitswa lieru lia khuli nalio mu munyi ni liu khuvula khutechelitswa; shichila khwamanya lwa musanganga mulinyakhana lieru, nindio khandi muliitsa khusanga mulileminywa li mioyo chieru.
8Vasuuvili vashianje, khwenyanga mumanye makhuva khulondokhana khu matiinyu ka khwavirilamu, nu khuli mu lusomo lwa Asia. Vakhutiukha misiko militoho, chia khunyala khuvula khwikhutsila khuchinga, khali nu khwikomba khukhutsa. 9Ni kilikali, khwakanakana nu khulola ndi khukhalachilwi likhutsa. Navutswa kikholekha kario, khu khuleshe khusuuvilila mu tsingulu tsieru vene; nikhali mu Nyasaye wonyene, wisimushitsanga vandu khurula mu likhutsa. 10Nyasaye wa khuhavina khurula mu vutiinyu vutamanu vwi likhutsa, aliitsa khukhuhavina. Khwavikha lisuuvilitswa lieru muye ndi aliitsa khukhuhavina khandi, 11lwa mukhukhonyanga mu lisaala lienyu. Lisaala linyishi lia mukhusaalilanga liliitsa khuchipwa, khu Nyasaye alikhukasitsa; ma vandu vanyishi valisanditsa Nyasaye shichila khutsi.
Shiachila Paulu Nakalukhana Tsinganakani Tsietsie
12Khwichinjililanga, shichila tsinganakani tsieru tsiu mukari tsikhusuuvilitsanga ndi limenya lieru mu shivala shinu, khandi khushila muno lihaambana lieru na munyi, lia yamihwa nu vulunji vwa Nyasaye khandi katoto, khuvirila mu tsingulu tsi tsimbavasi tsia Nyasaye; navutswa shikali khuvirila mu vusitsa vwa vandu tawe. 13Shikali khumuhandichilanga shindu shindi vutswa tawe; navutswa shia munyala khusoma, khandi mumanye. Ndi ni lisuuvilitswa ndi muliitsa khumanya vulahi vwene, 14khuli mumanyikhu hatititi. Muliitsa khwilola shichila khutsi, khuli khutsi khwilolelanga munyi Khulitukhu liu Mwami Yesu aliitsa khukalukha.
15Ni kilikali, nali manyi vulahi vwene khuli mwilola, shichila khutsi, ninganakana khumucheniha lukhuraanga. Munjila indala yeneyo, khwenya mukasitsi hali khavili khulondokhana khu luchendo lwanje. 16Nali ninganakani yu khumucheniha, lwa mba nimbira ninzitsanga mu lusomo lwa Mekadonia, khandi lwa ngalukha khurulayo, khu nyole vukhonyi khurula khu munyi vu khukhonya mu luchendo lwanje, lu khutsia mu lusomo lwa Yudeya. 17Musuuvilanga lwa naloshitsa kenako, mbulakhu khwa nali nisinjile? Inoho mulolanga ndi vutswa mundu uvoolanga, “Mbuchilile” inoho “Nzambakhane” khwenya khuyaanzitsa vandi vutswa? 18Navutswa ni kilikali, shichila Nyasaye nu musuuvilwa, khandi makhuva keru ka khumuvoolelanga shikali “Mbuchilile” inoho “Nzambakhane” tawe. 19Yesu Kristo, uli Mwana wa Nyasaye, wa inzi Paulu, Silivano nende Timoteo khwa mwilwatsila shiali vutswa “Mbuchilile” wa Nyasaye tawe. 20Ye, ni “Mbuchilile” wi lilaaka liosi lia Nyasaye. Nako kachilanga “Amina” yeru nivoolwa khuvirila mu Yesu Kristo, khulu khuhaana vukhumi khu Nyasaye. 21Navutswa Nyasaye neye ulombanga khutsi, halala na munyi, khuva ni lisuuvila mu vulamu vweru mu Kristo; neye wakhurovola; 22watuuya muhuuli kwekwe khu khutsi khumanyinya ndi khuli veve, khandi wakhuha Roho Mutakatifu mu mioyo chieru, khuli shimanyilu shi vindu viosi via ya khuvishila.
23Navutswa nanganga Nyasaye khuva mushiahidi wanje, wamanya kali mu mwoyo kwanje! Nambakhana khukalukha mu litaala lia Korinzo, khulu khwenya khuvula khumunyashitsa. 24Shikanyala khuva khuchelitsanga khurumishila tsingulu khumunika khusuuvila tawe; navutswa khwamanya ndi mwasinjila ni tsingulu mu lisuuvila. Nikhali, khukholanga mihinzilu na munyi, khulu khwenya muve nu vuyaanzi.
Currently Selected:
VAKORINZO 1: LLLCATHOLIC
Highlight
Share
Copy
Want to have your highlights saved across all your devices? Sign up or sign in
© The Bible Society of Kenya, 2013
