1 VATESALONIKE 1
1
1Khutsi Paulu, Silivano nende Timoteo -- Khuhandichilanga vandu vi likanisa lia Tesalonike, nivali vandu va Nyasaye, uli Tata nende Mwami Yesu Kristo.
Tsimbavasi nende milembe vive na munyi.
Limenya nende Lisuuvila lia Vatesalonike
2Khusanditsanga Nyasaye shia khase khosi shichila munyi voosi, lwa khumusaalilanga. 3Lwa khusaalanga shia khase khosi, khuvoolelanga Nyasaye, uli Tata weru makhuva khulondokhana khu lisuuvila lienyu nende muhinzilu kwenyu ku vuyaanzi, khandi lisuuvilitswa lienyu lia muli nalio khumatukhu koosi khuvirila mu Mwami weru Yesu Kristo. 4Vasuuvili vashianje, khwamanya ndi Nyasaye wamuyaanza, khandi neye wamurovola mwene khuva vandu veve. 5Khwitsa nu khumwilwatsila Ivanjeli, shikali khulomoloma khwonyene tawe; navutswa khuvirila mu tsingulu khandi khuvirila mu Roho Mutakatifu, ni lisuuvilitswa liayo liatoto. Mwamanya limenya lieru lia khwamenyanga na munyi; liali liu vukhonyi khu munyi. 6Mwalonda mwiima kweru nende ku Mwami. Khali niiva mwanyakhana muno, mwasuuvila likhuva khuvirila mu vuyaanzi vwa Roho Mutakatifu. 7Khulwa yako, mwamanyinya mwiima mulahi khu vasuuvili voosi mu tsisomo tsia Mekadonia nende Akaya. 8Shikanyala khuva ni likhuva lia mwilwatsa lionyene khulondokhana khu Mwami liarula mu munyi, nililanda shia havundu hosi mu tsisomo tsia Mekadonia nende Akaya tawe; navutswa likhuva khulondokhana khu lisuuvila lienyu mu Nyasaye limanyikhane shia havundu hosi. Shindu shivulakhuho shia khunyala khuvoola khurulana khu kenako. 9Vandu venavo valomolome makhuva khulondokhana khuli mwakhwinjilitsa vulahi, lwa khwali nu khumuchenihi, khandi khuli mwalekha khusaala khu misambwa, numurumishila Nyasaye uli mwoyo khandi watoto, 10nu khulindilila khurula mwikulu Mwana wewe Yesu, wa Nyasaye yisimushitsa khurula mu likhutsa, khukhukhola khuva vavoholole khurula khu vurima vwa Nyasaye vwitsanga.
Currently Selected:
1 VATESALONIKE 1: LLLCATHOLIC
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013
