Isabulin 86
86
Akilip kanuka aking'arasit
Akilip ka Daudi.
1Kopupok eong', Lokapolon, kinyakakine eong',
naarai apalipapalit eong', bobo ajaasi eong' kakadadu.
2Kidara eong' naarai ayong'it eong' ijo;
koyuu eong' lokejaanakinan kon lo emunokiit ijo.
3Irait ijo Akuju kang', kanuka ng'un kisoni eong';
naarai elipi eong' ijo ng'ini pak.
4Kitalaka lokejaanakinan kon,
naarai alipasia kang' ayauti eong' nama kon.
5Ijokuna ijo, Okwai Lokapolon bobo irimana ijo,
ileleba toma kon amina na emam esial kamaka ng'ulu kere kalu ilipete ijo.
6Kiira, Okwai Lokapolon, akilip kang';
kiira akimonyo kang' naka akote aking'arasit.
7Apaaran naka icani kang' eworokini eong' ijo, naarai ibong'onokini ijo.
8Emam akuju bala ijo, Okwai Lokapolon,
emam itwan ebeikini asoma nu isomae ijo.
9Ebunete akwapin kere nu isubu ijo aluronokin ijo Okwai Lokapolon;
ebunete akiturite apolou kon.
10Ipolo ijo bobo isomae ijo iboro luka aumosia;
ijo bon nes Akuju.
11Kisisianakine eong' Lokapolon nu ikote ijo eong' kesoma, kayong'i eong' ijo kamunokina;
kisisianakine eong' ayong'ite ijo kalemuna cut.
12Keturi eong' ijo Okwai Lokapolon Akuju kang', ketau kang' kere,
abuni eong' akitur ekiror kon ikaru kere.
13Epolo noi amina kon kama kang' na emam esial;
Iyuu ijo emoyo kang' alomun kokwap kates.
14Okwai Akuju agwaata lukepogi akitijii eong';
ekote akatong'otong'ot naka lukaarak akiyara eong', bobo mam cut keyong'ito ijo.
15Konye ijo, Okwai Lokapolon irait Akuju lo ijaasi ka akisoni ka asianut;
mam ijo kinyunyuranar atipet, ng'ini pak ijaasi ijo ka amina kiton amunokina.
16Kibeleun nama kang' kisoni eong';
koinakine eong' lokejaanakinan kon agogong' kon,
koyu okoku ka nakejaanakinan kon.
17Kitodikine eong' akitodiaret naka ajokus kon kama kang', Lokapolon;
tetere ng'ulu lu ereito eong' ebunete aanyun ka asilikin
kanyutu kesi ebe ing'araki ijo eong' bobo ing'aing'a ijo eong'.
Currently Selected:
Isabulin 86: TESOP
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2020
info@biblesociety-kenya.org
AKITUTUKET NAKITETET (NEPEPEKA ISABULIN KA AWARAGASIA)
TESO NEW TESTAMENT PSALMS amp PROVERBS
