Isabulin 78
78
Akuju nepepe ka Itung'a keng'
Amaskil ka Asaf.
1Itung'a kang', kopuputu akisisianakino kang',
bobo kotupata nu enera eong'.
2Abuni eong' akitosoma awaragasia
ka akitemeteme aumosia ageun sek,
3iboro lu eirasi siong' ka ajenun,
iboro lu abutu luka asonya kosi kolimokisi siong'.
4Mam siong' kegwaete kodwe kosi;
ibunete siong' alimokin auri na etupakini
kuju ka agogong' ka Lokapolon nepepe ka asomisio keng' nukapolok
nepepe ka iboro luka aumosia lu esoma nesi.
5Abu nesi koinaki itung'a luko Israel ikisila ka ainakin auri ka Yakobo acorasia.
Abu nesi kicoraki luka asonya wok akisisianakin idwe kes ikisila keng',
6tetere auri na etupakini isisiaete kesi
bobo ebong'okinete kesi alimonokin idwe kes.
7Kokipone kalo ebeikinete kesi de akipiakin amuno kes nama ka Akuju komam kimuruokinete nu esoma nesi,
konye koyong'itete kesi ng'ini pak acorasia keng'.
8Mam kesi keraunete bala luka asonya kes,
itung'a lu enwang'ito kalu mam keyong'ito,
lu mam akiyuun kes Akuju kicasit
bobo lu mam abutu kideunosi emunokiito nesi.
9Abutu itung'a luko Efraim irumito akabwai ka ikojoi,
kokerata apaaran naka ejie.
10Amam kesi abutu koricata akitutuket kes ka Akuju;
abutu kesi kong'eroto akiyong' ekisil keng'.
11Abutu kesi kimuruokisi nu abu nesi kisoma,
aumosia nu abutu kesi kwanyutu nesi isomae.
12Itetee luka asonya kes,
abu Akuju kisoma aumosia
kajelukot kanako Soan ka akwap kanako Misiri.
13Abu nesi kotiak akare kosodi nes akitutuboor kesi;
abu nesi kitogwo akipi bala arwatan.
14Paran king'arenik nesi kesi kidowon
bobo akware kere king'arenik nesi kesi ka acaus ka akimi.
15Abu nesi kobwang'abwang' amoru kong'aarosi komoding'
kosodi ainakini kesi akipi nu alomunete kaneni.
16Kitolomuni nesi ecori kataba
kosodi ainakin akipi eleleete bala ang'ololo.
17Konye kitolototo kesi asoma aronus koking'aren ka Akuju,
bobo komoding' komenata kesi lo Eliliara noi.
18Kitebeikisi kesi akitama Akuju kokipone kaloka akidiaun ka agogong' inyamen lu akotosi kesi.
19Kinerata kesi nukarokok kuju ka Akuju kosodete atemar,
“Ebeikini Akuju ayaun inyamen ko moding'?
20Erait abeite ebe kinomo nesi ataba.
Kosodete akipi abukun;
konye ebeikini nesi bobo ainakin oni emugati
ka ainakin itung'a keng' akiring'?”
21Kanuka ng'unu konyunyurari Lokapolon na eirara nesi kesi;
abu nesi kolomik itung'a keng' ka akimi,
kosodi anyunyura keng' kuju kes akiyatakin,
22naarai amam kesi akiyuun nesi
bobo amam amunokiito ebe kebeikini nesi ayuuni kesi.
23Konye abu nesi kinerata ka akuju kokuju
kicorakini nesi ikekia keng' kong'aarosi;
24abu nesi koinaki kesi emaana kokipone kaloka akijukakin kesi emaana alomun kokuju konyamata.
25Kanuka ng'un abutu kesi konyamata inyamen luka imalaikan,
kosodi Akuju ainakin kesi iboro kere lu kekotosi kesi.
26Bobo abu nesi koinaki ekuwam loko kide akikutu,
bobo kapedor keng' kiguruok nesi ekuwam loko ng'alakimak;
27kosodi nesi akijukakin itung'a keng' ikwenyi,
ipu bala asing'e kong'eleja;
28abutu kesi kodoto kiding' ka ekambi imanakiito ayemai.
29Kanuka ng'un abutu itung'a konyamata ka akimonikin;
abu Akuju koinaki kesi nu akotosi kesi.
30Konye aring'a kesi kimonikina bobo etolosito kesi akinyam,
31konyunyurar Akuju ka kesi kosodi akiyara ikiliok kes luka agogong' noi,
isapa lukajokak noi ko Israel.
32Konye kong'in de abutu itung'a kitolototo asoma arokusio;
amam kesi abutu komunokisi nesi konye esomate nesi aumosia.
33Kanuka ng'un kong'etak nesi aparasia kes bala akiyeng'ar
bobo kang'etakin akijar kes ka amudiaro kana eng'esun.
34Ng'ini kere na aaria nesi ice kama kes, kobong'unete luce nama keng';
isilarete kesi arokusio kes kosodete akilip nesi kokipone kalo elae.
35Iitunete kesi ebe Akuju nes kerait lokedaran kes,
ebe kebu loka Apedor kere king'arak kesi.
36Konye akiro kes kere araito aliokonu;
emam ibore ipede niketemarito kesi kerait abeite.
37Mam kesi ayong'ito nesi; mam kesi amunokina kotoma akitup akitutuket na etenito kesi ka nesi.
38Konye ajaasi Akuju ka asyanut kamaka itung'a keng'.
Abu nesi korumak aronus kes, bobo mam nesi abu komudia kesi.
Irwana ipu abu nesi kireboki anyunyura keng' bobo mam akinyekin adedeng'u keng' kinepu.
39Kiitu nesi ebe araito kesi lu etwakete,
bala ekuwam lo ekutuni kosodi atubor.
40Irwana emosai abutu kesi komenata nesi komoding';
irwana emosai abutu kesi kitakadikisi nesi!
41Irwana ipu abutu kesi kotamata Akuju
ka ainun apipilu Akuju Lokalaunan loko Israel.
42Abutu kesi kimurwokisi apedor keng' nakapolon
nepepe ka apaaran na ayuuna nesi kesi kamaka ipading'atin kes
43ka asoma keng' nukapolok nepepe ka aumosia
kajelukot kanako Soan ka akwap kanako Misiri.
44Abu nesi kibeloki ang'ololon ka akitaraun awokot
bobo amam itung'a luko Misiri akipi nu matan.
45Abu nesi kijukia icucu nama kes lu abutu kisicanata kesi
nepepe ka adodokia nu abutu komunautu akwap kes.
46Abu nesi kijukia emase konyama iraana kes
ka amunaun amaata kes.
47Abu nesi komunau amaata kes nuka emusabibu ka akako
ka ikaereren kes ka akaterot kana epolo noi.
48Abu nesi kwaara akituk kes ka akako ka akiyara amerekekin kes ka ekipyei.
49Abu nesi kijukaki kesi anyunyura keng' na apolo noi, ka eding', ka icani,
nepepe ka atukot naka imalaikan kalukaarak.
50Amam nesi abu kireboki anyunyura keng' kere de akinyekin kesi,
konye abu kwaara kesi kican.
51Abu nesi kwaara isapa lusodit luka itogoi kere luko Misiri.
52Kosodi nesi aking'arenikin itung'a keng' alomar king'a bala lokecokon ka ayaite itung'a itorito moding'.
53Abu nesi koyaa kesi kojokan, konye amam kesi abutu kokuriakaarosi;
konye abu akare kibubulaun opading'atin kes.
54Abu nesi koyaa kesi akwap keng' nakalaunan,
omoru lu abu nesi elope komariau.
55Abu nesi kireng'ia king'a itung'a lu eboyete kaneni itolosito itung'a keng';
abu nesi kotiakatiakak itekerio luko Israel amaata ka itung'a kalu eboyete kaneni ka ainakin itung'a itogoi kes.
56Konye abutu kesi konwang'ata Akuju loka Apedor kere ka atamatama nesi.
Amam kesi abutu koyong'ata acorasia keng',
57konye amam kesi ajaasi ka ayong'ara kwape ka luka asonya kes,
amam cut abeikiite amunokin kesi kwape ka ekojo kalo ekudit.
58Abutu kesi kitakadikisi nesi kokipone kaloka akiduk alarosinoi nama elipiata itung'a lu emam keminasi Akuju,
kosodete kesi akitakadikin nesi akitoro aputon kes.
59Abu Akuju konyunyuraar noi na aanyuna ng'unu,
kosodi nesi aking'er itung'a keng' noi.
60Abu nesi kinyeki ayema keng' ko Silo,
ere lo eboya nesi kokiding' wok.
61Abu nesi kojalaki ipading'atin kosi ikamarete Asaduk naka Akitutuket toma,
akitodiaret naka agogong' keng' nepepe ka akibusesu.
62Abu nesi konyunyuraki itung'a keng'
kajalakin aarete kesi ipading'atin kes.
63Apon kwarai isapa kojie,
komamunete apesur itung'a lukamanyak kesi.
64Apon kwarai isaseredootin kojie,
kiteng'erete apuseru kes akimonyo.
65Kosiel, konyouni Lokapolon bala anyoun kajoo;
arait nesi bala etwan lo ajaasi ka agogong' lo etalakarit nesi ajon.
66Abu nesi kiteker ipading'atin keng';
ka akitisilikin kesi cut.
67Konye abu nesi kong'er auri ka Yosef;
amam nesi abu koseu ekitekere ka Efraim.
68Konye abu nesi koseu ekitekere ka Yuda
nepepe ka Emoru loko Sayon, lo amina nesi noi.
69Abu nesi kodukoki Etogo keng' ng'ina bala ere keng' kokuju;
abu nesi kisicata bala akwap alope icasit apakio kere.
70Abu nesi koseu Daudi lokejaanakinan keng';
ka alemun nesi kasoma kanuka acoko amerekekin.
71Alemuni nesi Daudi kasoma kanuka acoko amerekekin ka ikalei;
ka ainakin nesi asoma nuka acoko itung'a luko okitekere ka Yakobo, itung'a keng'.
Acoko Israel, itung'a ka Akuju kelope.
72Abu Daudi kisisianak kesi ko otau keng' kere,
kosodi nesi apolokiite kesi kojokan noi.
Currently Selected:
Isabulin 78: TESOP
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2020
info@biblesociety-kenya.org
AKITUTUKET NAKITETET (NEPEPEKA ISABULIN KA AWARAGASIA)
TESO NEW TESTAMENT PSALMS amp PROVERBS
