Isabulin 74
74
Akilip kanuka alakunio ka akwap kere
Akimonyo ka Asaf.
1Inyo, inyekina ijo siong' ekipone lo, Okwai Akuju?
Ibuni ijo anyunyurakiite itung'a kon ikaru kere?
2Kiitute itung'a kon lu ibu ijo elope koseu sek araun itung'a kon,
lu ibu ijo kolemu kayenis korautu ekitekere kon kelope.
Kiitu Emoru loko Sayon nama ape pak iboya ijo.
3Koloto ipudaye akapong'oru nu;
amunautu ipading'atin kosi ng'in ibore ko Otogo kon.
4Acelata ipading'atin kon ko Otogo kon ka agogong';
egwakisi kesi ibendera kes ng'ina eraito bala akitodiareta nuka akilanya.
5Ajaasi kesi bala itung'a luketenak iboro ka abawoi
ibironokinete kwap ikito ka ayepia kes.
6Abutu kesi kobilibilata ikekia luka Etogo ka Akuju,
itosomaete kesi ayepei ka inyundoi kes.
7Abutu kesi kicwaata Etogo kon lokalaunan;
abutu kesi konwang'ata alaro ng'ini nama imaere ijo.
8Akotosi kesi adaun siong' cut;
abutu kesi kicwaata ng'ini alaro nakalaunan ka akwap.
9Aputon kosi kere nukalaunak adaunosi;
emam lukadwarak ideuna bobo emam itwan ejeni itolosiete nu akitodol iwori.
10Kapaki kana etia ai, Okwai Akuju,
ebuniata ipading'atin kosi akwenare ijo?
Ebunete kesi akirata ijo ikaru kere?
11Inyo ing'eria ijo aking'arakin siong'?
Inyo ing'adaritere ijo akanin kon kau?
12Konye ijaikin ijo irait ejakait kosi ape kageunete, Okwai Akuju;
iyuu ijo siong' irwana ipu.
13Ibu ijo kagogong' kon kana epolo kotiaka akare
bobo kosodi nesi akibung'a akwes nuka ityeng' luka akare;
14ibu ijo kipiricaana akwes ka imunuo ka lukapolok luka akare
ka ainakin akwana keng' konyamata ityeng' luko moding'.
15Ibu ijo koinaki eleliete abwalini ka akonyen kicorin alele;
ibu ijo kitowon ang'ololon nukapolok.
16Ibu ijo kosub apaaran ka akwaare;
ibu ijo kigwaaki akolong' ka elapa alarosinoi kes.
17Igwaaki ijo esial ka akwapin kere;
itemeteme ijo apakio nuka akamu kanuka akiru kotaa ci.
18Kiitu nu, Okwai Lokapolon kwape ekwenatatare ipading'atin kon ijo,
kwape ekwenatatare itung'a lu enwang'ito ekiror kon ijo.
19Mam ajalakin itung'a kon lu emam kejaasi ka agogong' ka akanin ka ipading'atin kes kalukarokok;
mam akimuruokin itung'a kon lu isicanio!
20Kiitute akitutuket na ibu ijo kitenata ka siong'.
Ejii ejie ng'olo wai ka akwap.
21Mam ajalakin itisilikino ng'ulu lu isicanio;
kinyek itung'a ng'ulu lukapalapalak kalu ekadada kiturwoto ijo.
22Konyou, Okwai Akuju, kigang'a nu isomae ijo!
Kojeni ebe kikwenatatare ijo ng'in paaran itung'a lu mam kiminasi ijo.
23Mam akimurwokin acela naka adedeng'u naka ipading'atin kon,
ka acela na emam esial na ecelasi ipading'atin kon.
Currently Selected:
Isabulin 74: TESOP
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2020
info@biblesociety-kenya.org
AKITUTUKET NAKITETET (NEPEPEKA ISABULIN KA AWARAGASIA)
TESO NEW TESTAMENT PSALMS amp PROVERBS
