Isabulin 141
141
Akilip naka atabong'
1Eworoe eong' ijo, Lokapolon; king'arak eong' kipokona!
Kopupok eong' na anyaritere eong' ijo.
2Kidiau akilip kang' bala ibore ni ekukuny,
na ekiara eong' akanin kang' kuju kocamakine eong' bala isubanit nika atabong'.
3Lokapolon, mam ajalakin eong' kener nukarokok, kidara akituk kang'.
4Kidara eong' tetere mam eong' kesomae nukarokok,
komam eong' kemorikikinosi ka itung'a lukarokok karokusio kes.
Elipit eong' komam eong' kamorete ka kesi kopucin kes atikere apaaran apede.
5Ebeikinete itung'a lukajokak akisican ka akiretanakin eong' kajokus,
konye mam eong' kacamuni akitamao naka itung'a kaluka arokusio,
naarai ng'ini pak elipi eong' etepegi arokusio kes.
6Na edacunere ijakaa kes kwap alomun komor,
ebunete itung'a acamun ebe keraito akiro kang' nuka abeite.
7Kwape ka akito kanu ibelite ka akibetebet,
nes ekipone lo isiarakina akojo kes osial ka ates.
8Konye etolosit eong' amunokiite ijo, Lokapolon kang' loka apedor kere.
Akote eong' akidaro kon mam akinyekin eong' katwana!
9Kidara eong' kaloketa kanu elokokite eong',
kidara eong' kaloketa kang'ulu kalukarokok.
10Kinyek kibirokinosi lukarokok ikulopek aloketa kes
na alosia eong' emam kikang'asite eong'.
Currently Selected:
Isabulin 141: TESOP
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2020
info@biblesociety-kenya.org
AKITUTUKET NAKITETET (NEPEPEKA ISABULIN KA AWARAGASIA)
TESO NEW TESTAMENT PSALMS amp PROVERBS
