Isabulin 109
109
Nama kalo epolokiit ekiruke. Ekiruke ka Daudi.
Akimonyo naka itwan kani icana
1Eturi eong' ijo Akuju;
mam akideun itaa ti!
2Kalomikisi eong' lukarokok ka iliokoikis.
Inerasi aliokonu kuju kang'
3bobo inerasi iboro lukarokok kuju kang',
kalomikiito eong' emam atenikina.
4Ereito kesi eong' konye amina eong' kesi bobo elipaki eong' kesi.
5Etacate kesi ajokus kang' ka arokusio
etacete kesi amina kang' ka akadakiite.
6Koseu lokatubonokinan eliokoi kotuboki epading'a kang',
bobo kinyek epe kamaka ipading'atin keng' kiwosa nesi.
7Kinyek kiwosai nesi kodumun ejaasi ka aronus;
kinyek kodumune akilip keng' de eraito aronus!
8Kinyek kodaun akijar keng' atipet;
kinyek koyaa itwan ice asoma keng'!
9Kinyek korautu idwe keng' ikokiokok,
kinyek korau aberu keng' apuserut!
10Kinyek korautu idwe keng' lu ilipanarosi komam kejaasi ka ere;
kireng'iare kesi kotogoi kalu kibironorosi kalu iboyata kesi!
11Kinyek koyaasi ng'ulu lu ejaasi nesi ka apesani kes iboro keng',
kinyek koyaasi ilong'au ng'in ibore nikedumuut nesi akitor asoma keng'.
12Kinyek komam itwan ipede ni ebuni akisomakin nesi ajokun
kere de ni ebuni akitere ikokiok lu inyekini nesi.
13Kinyek kotwana auri keng' kere,
kimurwore ekiror keng' ka auri kana etupi.
14Kiitu Lokapolon arokusio nuka luka asonya kes
bobo mam cut arimakin arokusio nuka toto keng'.
15Kiitute Lokapolon ng'ini pak arokusio kes,
konye kinyek kimuruokine cut kesi ikulopek!
16Amam etwan ng'olo cut abu kiitu asoma ajokun;
abu nesi kisican ka akiyara lukapalapalak,
lu ajaasi ka akiisite kang'ulu kalu amam kejaasi ka ekipone epede.
17Amina nesi akilama — kinyek kilamai nesi!
Mam nesi amina akisulwanyinikin itung'a —
kinyek komam itwan ipede ni isulwanyikini nesi!
18Anaikiit nesi ilami kwape anaikiitere anapienene inapen;
kinyek ilami keng' kelope kitabautu akwana keng' bala akipi
bobo de kitabautu akojo keng' bala akinyet!
19Korapata ilami keng' nesi bala inapen
kimanakisi nesi elope ng'ini pak bala arokoba!
20Lokapolon, kitisila ipading'atin kang' kokipone kang'olo
ng'ulu lu inerasi iboro bala ng'ulu kuju kang'!
21Konye Lokapolon Akuju, king'araki eong' kwape isumunikina ijo,
bobo koyuu eong' atupa ka ajokus naka amina kon na emam esial.
22Apalipalit eong' bobo ajaasi eong' ka akiisite;
ekang'asi eong' akitodol toma otau.
23Kwape ka etolibe kaloka ebong', apu eong' adaun;
kakutar eong' bala ecucut.
24Emam akong'in kang' agogong' kanuka amamus kinyamen;
mam eong' karait ibore ipede emam kerait ejamu ka akojo along'u.
25Na aanyunata itung'a eong' ekwenatatar eong';
imung'umung'ete akwes kes kanwang'ite.
26King'arakine eong', Okwai Lokapolon, Akuju kang';
kanuka amina kon na emam esial, koyuu eong'!
27Kitejenu ipading'atin kang' ebe ijo nes eyuuni eong'.
28Ebeikinete kesi akilama eong',
konye ibuni ijo akisulwanyikin eong'.
Kilanyai luketisilarito eong',
bobo kinyek eong' lokejaanakinan kon kajaasi ka alakara.
29Kinyek asilutu korapaki ipading'atin kang';
kinyek konapata kesi asilutu bala enaga.
30Abuni eong' akiyalamikin Lokapolon kang';
abuni eong' akiturite nesi ka atuket ka itung'a,
31naarai igang'it nesi lukapalapalak
nepepe ka ayuuni kesi koking'aren kang'ulu
kalu etubonokinete kesi kotwakata.
Currently Selected:
Isabulin 109: TESOP
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2020
info@biblesociety-kenya.org
AKITUTUKET NAKITETET (NEPEPEKA ISABULIN KA AWARAGASIA)
TESO NEW TESTAMENT PSALMS amp PROVERBS
