Ruthi 2
2
1Duuba namicha gudda dureesa toko jira, ka Boazi jed'ani; inni fiit'a Elimeleki, d'iirsa Naomi. 2#Law 19.9-10; Qab-Ser 24.19 Jennaani intalti Moabu, ta Ruthi jed'ani, waan Naomiini jette, Eegi, oobru biyyaa kae deema, yo nami naa nahe isa gula deeme bua mid'aani guurad'a. Isiini waan jetteeni, Dansa, beeni deemi, intala tiyya.
3Jennaani isiini kaate worra mid'aani haamu gula deemte bua guuratte. Duuba ato imbeekhini oobra Boazi, ka fiit'a Elimelekitiini baate. 4Eegi sunii Boaziini Bethlehemu gad'ufe, worra mid'aani haamu nagaya fuud'e, AABBO Waaqi isani woliini jiraatinna jed'e, worrileeni, AABBO Waaqi ha si eebisu jed'eeni. 5Jennaani Boaziini namicha worra hujiti mataa gaafate waan jed'e, Intalti tunini ta eenu? 6Namichi waan jed'e, Isiini intala Naomi woliini lafa Moabuti d'ufte taani. 7Isiini haguma diirama hojachumaa jirti, ammatana diqo hafuura baafatte male.
8Jennaani Boaziini waan Ruthiini jed'e, Intala, waan taatu, oobra d'ibi keesaa bua inguuratini, dubruma tiyya tana woliini hojad'a; 9aka worri hojatu ilaali, biraa indeemini, woliini hojad'a. Anini worra kiyya ka hujitiini, intala tana ingaargalchina ya jed'e. Yo d'eebotele, butte worraa keesa bisaani d'ugi.
10Isiini isaa saalfatte guddo gajette, Atini keessuma aka tiyya tana maafi naataafi? jette. 11Jennaani Boaziini waan jed'eeni, Haguma d'iirsi kanke due, waan atini jaarti haad'a d'iirsa keetiti tolchite ch'ufa la nati himani. Ammalle la d'agaye aka atini abbaafi haad'a tanteetiifi lafa iti d'alatte lakifte gosa qara imbeenneti galte. 12Waan atini waan kana taateefi AABBO Waaqi si eebisinna. AABBOONI, Waaqi Israeli, ka atini moona isaa d'eete, waan ch'ufa sii kenninna. 13Duuba isiini waan jette, Abeera, atini guddo naa naate, afaani dansa nati dubbatte garaa na jabeesite, ato anini haga hojattu tanteeti gahu d'ibaad'ele.
14Fulla gololati Boaziini waan isiini jed'e, Kooti, qit'a nyaad'u, daad'iini tuqad'i. Isiini worra huji bira teennaani, inni garbu akhaani kenneefi. Isiini nyaatte quufte hambifte. 15Eegi isiini kaate bua guurachu d'at'e, Boaziini worra hujitiini waan jed'e, Garbu haamani lafa ch'iiftule ha iraa guurattuuti, ind'owiina. 16Tuulale keesa luqisaafi, ha guurattuuti.
17Tana gula haga d'ia aduti asi oobru keesa mid'aani guuratte d'aante jennaani garbu haga subba tokofa argatte. 18Duuba fud'ate baate, gara dirati deebite, waan argatte haad'a garsiifte, hamba sagalele kenniteefi. 19Naomiini waan jetteeni, Eesaa waan kana ch'ufa guuratte? Atini fulla tami hojatte? Waaqi nama sii nahe sunii eebisinna! Jennaani Ruthiini waan had'aani jette, Anini arra oobru namicha toko, ka Boazi jed'ani, keesa hojad'e.
20 #
Law 25.25
Naomiini waan Ruthiini jette, AABBO Waaqi naasu isaatini nama nama ka jirufi ka due qaabate sunii eebisinna. Ammalle Naomiini waan jette, Namichi sunii fiit'a teenna, inni nuu miilo aanti, nama sila nu d'aalu.
21Jennaani Ruthiini, Ta gosa Moabu, waan jette, Suni male inni waan naani jed'e, Hojattu tiyya biraa imfagaatiini, haga mid'aani ch'ufa galaniti. 22Duuba Naomiini waan Ruthiini jette, Ee, intala tiyya, aki hojattu isaa ta uwa woliini hojattani sii fulla, aka oobru d'ibi keesati nami si ingaargalchine. 23Tanaafi isiini ato haad'a d'iirsa isii woliini teetu, d'aatu hojattu Boazi hojatte, garbufi dargaye filatte guurte, haga mid'aani ch'ufa galchaniti.
Aka Ruthiini d'iirsa argatte
Borana Bible © Bible Society of Kenya, 2019.