Ruthi 1
1
Aka Elimelekifi worri isaa Moabuti godaane
1Gaafa duri bara jaallabooti lafa fidde, oolaani jabduuni toko lafa d'ufte. Jennaani namichi toko, ka dira Bethlehemu lafa Yuda keesa, niiti isaatiifi ijoolle isaa ta d'iira lamaani woliini lafa Moabuti godaane. 2Maqaani namicha suni Elimeleki, niiti isaa maqaani Naomi, ilmaani isaa lamaani maqaani Malonifi Kilioni. Balbalti worraa Efrati, worri worra Bethlehemu lafa Yuda keesa. Jennaani lafa Moabu d'aqani achi qubatani. 3Ato achi jiranu, Elimelekiini d'iirsi Naomi due, duuba isiini ilmaani ufii ta d'iira lamaani woliini hafte. 4Worri lachu dubra gosa Moabu fuud'e; maqaani toko Orpa, taani maqaani Ruthi. 5Ganna kud'ani lafa suni keesa teennaani Malonifi Kilioniini lubbu d'abani, haati koba hafte, d'iirsafi ilmaani male.
Aka Naomifi Ruthiini Bethlehemuti dachaani
6Ato lafa Moabu jirtu, Naomiini aka AABBO Waaqi worra isaa qaabate sagale kenneefi d'ageete jennaani, nad'eeni ilmaani isii taani woliini kurfefatte, aka lafa ufiti deebitu. 7Duuba isiini, dubra suni lamaani woliini, lafa Yudati galissa kaate. 8Ammo Naomiini waan dubra lamaani suniini jette, Beena, worra keesaa d'allattaniti dachaa. AABBO Waaqi isanii nahinna, aka isani naafi worra duele naatani. 9Isiini worra d'ungannaani, worri iti bohe 10dubbi isii dide waan jed'e, Nu suma woliini gosa teetiti galla.
11Ammo Naomiini waan jette, Dubra tiyya, na gula iyyaaiina, dachaa; d'iirti d'ibiini garaati na inhamne ta isani fuutu. 12Dachaa, dubra tiyya, anini amma ya jaare hobae, nami na fuud'uleeni injiru. Yo sila dubbi jenne, herega d'iirsa argad'uuni qabaad'e halkanuma kana na fuud'ani ilmaani d'iira d'alelle, 13haga isiini gugurdattuuti eegu indandeetani? Tanaa jettani fuud'a diddani? Akasiniti, dubra tiyya, anini maro teesani guddo laalefad'a ka AABBO Waaqi naasu naa d'abe.
14Ammalle guddo wolti bohani jennaani Orpaani haad'a isii d'ungatte nagayaati jetteeni, ammo Ruthiini iti mamaratte. 15Duuba Naomiini waan jetteeni, Intala, aaddaani tante ya worra ufitifi aada iti d'aletteti galte, aadda tante gula deebii.
16Ammo Ruthiini waan jette, Ufi gula deemu na ind'owiini, nu wolumaani Yaana; gara ati deemtu ch'ufa anini indeema, fulla ati teetu anileeni taa; gochi tante gosa naa taati; Waaqi kanke Waaqa naa taha; 17fulla ati dootuti anileeni indua; artumati na awaalani. Waaqi na ijeesinna, yo dua male wonti d'ibiini gargari nu baafte!
18Naomiini aka isiini guddo isi gula deemu feetu agarte jennaani woma tokole gula indeebimne ch'alifte. 19Jennaani worri lachu yae dira Bethlehemu d'umnaani, worri dira sunii dibbise iti baafate; nad'eeni waan jette, Tunini d'uguma Naomi?
20Isiini waan jetteeni, Naomi naani injed'ina, Mara jed'a na yaama. Woni akanatiifi Waaqi guddaani ya jireenna nati had'eese. 21Gaafa duri armaa deeme waan ch'ufa qaba, ammo AABBO Waaqi ya duwa na galche. Maafi Naomi naani jettani, eegi AABBO Waaqi guddaani lafa na buuse gaargala natiini d'ufe?
22Akasiini Naomifi Ruthiini, intalti ilma isii, ta gosa Moabu, lafa Moabu keesaa galani. Ka garbu haamu jirani dira Bethlehemutiini bahani.
Aka Ruthiini oobru Boazi hojatte
Borana Bible © Bible Society of Kenya, 2019.