Mika 7
7
1Anini la ufi jibbaad'e! Anini nama beela qabu, ka mid'aani mukha ira barbaadate, yokhaani mid'aani zabibu mukha iraa d'abe, fakaad'a. Mid'aani zabibutifi ka oda mimiao ya na duraa guuratani. 2Nami d'ugaafi qajeeluma gula deemu, ka Waaqa sodaatu, tokoleeni injiru. Nami ch'ufti gaade wolijeesa. Ch'ufti oboleesa ufii yokhaani gosa ufii t'ururaani qabe balleesu fed'a. 3Worri ch'ufti aka waan hamtu tolchu ya iti ogeesa tahe. Jaaroleefi jaallabi gumbo nama ira fud'ata. Nami gurra qabu waan fed'u worra suniti hime duuba ch'ubbu iti wold'aqani. 4Worra nami keesaa goomuleeni aka mogore nama woraana, ka ira qajeelaleeni hanqare fakaata.
Guyyaani Waaqi biyya balleesu, akuma inni qara afaani raagootatini nama gorse, ya d'ufe. Biyyiti amma ya waan taatu wollaalte. 5Olla kanke ind'ugeefatiini, yokhaani jaala kanke inquufiini; niiti tante ta woliini raftanile iti indagatiini. 6#Mat 10.35-36; Luk 12.53Bara kana ilmi abba ufii tuffate, intaltileeni dubbi haad'a didde, niitiini ilmaaleeni haad'a isaa d'agayu diddi. Nyaapi namaa ch'ufti worruma isaati.
7Ammo anini gama kiyyaani AABBO Waaqa eegad'a; Waaqa kiyya, ka na baasu, heregad'a; ka na d'agayu isuma.
Aka AABBO Waaqi nama baasu
8Nyaapi kiyya waan maro gaargala kiyyatiifi gammaduufi inqabu; anini ya jige amma inuma kaa. Anini amma dukana keesa jira, ammo AABBO Waaqati ifsa naa keenna. 9Anini ya Waaqa durati ch'ubbu tolche, tanaafi dallansu isaa obsu male, haga inni naa dubbate d'uga na muruuti. Inni ifsatiini na d'ufe baafama na garsiisa. 10Duuba nyaapi kiyya waan kana arge, nami qara na goyeese, Waaqi kanke me? naani jed'e inch'eera. Anini nyaapa suni ka aka d'oqe karaati d'id'iitani arga.
11Worra Yerusalemu, guyyaani naabo dira keesani deebiani jaarani d'ufuu jira. Gaafasi tari seera lafa teesani hiisani. 12Nami gaafasi gama ch'ufaa isaniti d'ufa — Ashuru ta ilaboruti, Misiri ta bitati, arda galaana Efratatiifi galaana ch'ufafi gaareenile ch'ufa. 13Ammo lafti badde duwa taati, waan nami isi keesa tau ch'ufti ch'ubbu hojateefi.
Naasu AABBO Waaqi Israelii nahe
14Ee AABBO Waaqa, gumi tante ta atini fohatte, ule tanteetiini tissi. Ato worri lafa aloo koba keesa taele, lafa gabboti d'aatu worraa jira. Worri ha godaane lafa gabbo Bashanitifi Gileadi, ta worri duri keesa tauti deebie achiti nyaate d'uguuti.
15Ee AABBO Waaqa, waan mama tolchi, nu agarsiisi, akuma duri gaafa lafa Misiri keesaa nu baafte tolchite nu agarsiifte. 16Gochiti si imbeenne taani, yo waan kana argite, ato irre guddo qabaattele, inch'eerti. Mudamsu keesa afaani qabatte gurra ch'ufatte 17aka bofa awaara keesa looti; maneeni worraa jajabdu keesa, ka sodaatani hollatani, gad'ufani sodaani AABBO Waaqa keennati deebiani.
18Waaqi aka keeti injira? Ee AABBO Waaqa, atini ch'ubbu namaa araaramte wollaala gumi teeti ta hafte biraa deemtaafi. Atini haga jiru jireenna indallantu, ammo atini jaalala tante ta ind'umanne nu garsiisu feeta. 19Atini ammalle deebite nuu naate ch'ubbu teenna ch'ufa nuraa fuute, d'immu baariini keesa buufta! 20Atini naasufi jaalala tante ta ind'umanne gumi Yakobotiifi ta Abrahamu garsiifta, akuma atini duri ababoota teennati kakhatte.
Borana Bible © Bible Society of Kenya, 2019.