Mika 6
6
1Waan AABBO Waaqi jed'u d'agaya: AABBO Waaqa, kai, worra Israeli himad'u; gaareenifi kubileeni ha waan atini himattu d'ageetuti.
2Isani gaareeni, yayaba lafaa ka haga jiru jireenna, dubbi AABBO Waaqi himatu ch'aqasa! AABBO Waaqi gumi ufii himata. Dubbini inni himatu ta quufa d'abaati.
3AABBO Waaqi waan jed'u, Gumi tiyya, anini maani isani tolche? Anini maaniini isani dad'absiise? Nati hima. 4#Bah 4.10-16; 12.50-51; 15.20 Anini lafa Misiri keesaa isani baase tissooma keesaa isani fuud'e; ammalle anini Musafi Harunifi Miriamu qarqaarsaa isanii erge. 5#Hen 22.2—24.25; Yos 3.1—4.19 Gumi tiyya, waan hayyu Balakini, ka gosa Moabu, isaniti malateefi waan Balaamuuni, ilmi Beori, isaa deebise qaabad'a. Ammalle waan karaati isaniti tahe jiddu Shitimufi Gilgali qaabad'a. Yo waan kana ch'ufa qaabattani, waan anini baasiti teesani jed'e tolche hubattani.
Waan AABBO Waaqi nama iraa fed'u
6Anini hojja AABBO Waaqa, Waaqa gubbaa kad'ad'u, maaniini d'ufaafi? Anini jiboota fuud'e gube sorio AABBO Waaqaa baasa? 7Yo anini elemiyye kunki heddu yokhaani d'ad'a muumme inqamne ka aka galaana yau fuud'e d'ufeeni, AABBO Waaqi ingammada? Anini ch'ubbu tiyya jed'e, ilma kiyya ka angafa yokhaani ijoolle anini d'ale Waaqaa imbaasu? 8Hiyo akasiniti; AABBO Waaqi waan dansa nu tolchuu malle ya nuti hime. Wonti inni nuraa fed'u tana: aka waan d'uga qajeeltu tolchani, jaalala ind'umanne nama garsiisani, ufi saadu lakisani Waaqa woliini taani.
9Nami qarooni nama AABBO Waaqa sodaatu. AABBO Waaqi nama diraa yaame waan jed'uuni, Isani nami dira kana keesati wolti bahu, ch'aqasa! 10Anini miha maneeni dureeyyi keesa jiru, ka worri kara dabatini argate yokhaani waan worri woini biime namaani dabsu, ka abaarani, dandae inded'a? 11Anini miisana d'araatiifi d'akha nami woini biimu dandae obsa? 12Dureeyyiini teesani hiyyeesa dabsite, nami keesani ch'ufti d'ara dubbate, arabi worraleeni nama soba. 13Tanaafi anini amma maro daba keesanitiifi isani balleesa. 14Isani inyaattani ammo inquuftani, sabdoomtani bukiti taatani wo fud'attani ammo olinkeetani; waan isani olkeyattanile anini lola keesa balleesa. 15Isani mid'aani fach'aaftani ammo woma immurtani. Isani d'ad'a qabdani ammo indibattani, daad'ile mid'aafattani ammo ind'uddani. 16#1 Hay 16.23-34; 21.25-26 Wonti woni kunini ch'ufti isani qabatufi, waan isani aada hamtu hayyu Omritiifi ilma isaa Ahabu jabeesitani gula yaatanifi. Tanaafi anini isani balleese, gochiti ch'ufti isani tufatti. Ammalle fulla ch'ufati isani goyeesani.
Hameenna worra Israeli
Borana Bible © Bible Society of Kenya, 2019.