Yoshua 13
13
1Yoshuani jaare hobae jennaani AABBO Waaqi waan jed'eeni, Atini ya jaarte hobaate, amma lafti fud'achu malani guddooti hafe, 2lafti hafte tana: Lafa Filistitifi lafa Geshori 3ammalle lafa Avi gara bita. (Lafti haga galaana Shihori, ta seera lafa Misiriti aantu haga seera Ekroni gara bita, lafa Kanaani jed'ani, hayyooti worra Filisti dira Gaza, Ashdodi, Ashkeloni, Githifi Ekroni keesa teeti.) 4Ammalle lafti d'ibiini ta hafte, lafa — Kanaanifi Meara (lafa worra Sidoni), haga Afeka, ta fulla seera lafa Amori; 5lafa worra Gebali; lafa Lebanoni ch'ufa gara ilaboru haga Baal-Gadi ta bita gaara Hermoni haga kaarra Hamathi. 6#Hen 33.54Lafti worra Sidoni ka lafa gaareeni, jiddu gaareeni Lebanonifi Misrefoth-Maimu keesa tauleeni lafa suni keesa jirti. Anini gosa tana ch'ufa worra Israeli duraa baasa. Lafa tana ch'ufa worra Israeliti gargari qoodi, akuma anini siini jed'e kaani. 7Amma duuba lafa tana, gosa Israeli sagallani taanifi gosa Manase ta haga garille gargari qoodifi, aka worrileeni lafa suni d'aalu.
Qooda lafa Yordanini ilaboru
8 #
Hen 32.33; Qab-Ser 3.12 Gochiti Reubenifi Gadi ammalle gochiti Manase ta gari taani yayu lafa hojattuuni AABBO Waaqa Musani worraa kenne taani fud'atte: Lafti sunini galaana Yordanitini ilaboruti. 9Lafti worra dira Aroeri (ka afaani bale Arnoni) ammalle dira wod'aka bale suni keesa jiru ejite, dirra haga Medeba eje Diboniti ejuti ejiti. 10Ammalle lafti worra haga seera worra Amonile ejite ammalle dira Sihonini, hayyu Amori, ka Heshboni fideeti ejiti. 11Ammalle lafti tunini ch'ufti lafa Gileaditifi, arda Geshuritifi lafa Maakatifi gaara Hermoni ch'ufafi lafa Bashanile ch'ufa, haga Seleka lafa worraa keesa jirti. 12Lafti tunilleeni lafa Oguni ka worra Refai keesaa inni ch'allaani hafe, ka duri Ashtarothifi Edrai keesa lafa fide, lafa worra keesa jirti. Musani duri worra lafa tana keesa tau dabsate keesaa baase. 13Ammo taatule, worri Israeli worra Geshurifi Maaka keesaa imbaamne, arrale worri lafa Israeli keesa taa. 14#Qab-Ser 18.1 Gochiti Musani qooda lafa inkeniniifi ta Lawi ch'alla. Akuma AABBO Waaqi Musani jed'e waan gubani AABBO Waaqa Israeliti baasaniti d'aala worraati.
Lafa gosa Reubeniti kennani
15Musani yayu d'aala gosa Reubeniti kenne, aka worra isaani gula. 16Lafti worra dira Aroeri (ka afaani bale Arnonitifi) dira wod'aka bale suni keesa jiru ejite ammalle dira d'aatu Medebati ejiti. 17Ammalle lafti worraa Heshbonifi dira ch'ufa ka dirra lafa gubba jiru: Diboni, Bamoth-Baali, Beth-Baali-Meoni, 18Yahasi, Kedemothi, Mefaathi, 19Kiriathaimu, Sibma, Sereth-Shahari ta kubi bale keesa jirtu gubba jiru, 20Beth-Peori lape gaara Pisgatifi Beth-Yesh-Mothi. 21Ammalle lafti worra dira ch'ufa ka dirra lafa gubba jiru ammalle lafa Sihonini, hayyuuni Amori, ka Heshboni tau, fide ch'ufa. Musani isaafi worra lafa Midiani fidule dabsate: worri suni Evi, Rekemu, Suri, Hurifi Reba. Worri kunini ch'ufti hayyu Sioni jala hojatte. 22Worra worri Israeli ijeese keesa nama toko ka wo fagu, ka maqaani isaa Balamu ilma Beoriti jira. 23Seera lafa Reubeni gara ila adu galaana Yordaniti. D'aalti gosa Reubeni dirafi ollowaani tana.
Lafa gosa Gaditi kennani
24Musani yayu qooda lafa gosa Gaditi kenne, worra isaani gula aka worri d'aalu. 25Lafti worra dira Yazerifi dira ch'ufa ka lafa Gileadi, ammalle lafa Amoni gama toko, haga Aroeri, ta Rabani ilaboru. 26Ammalle haga dira Heshboniti ejite, Ramath-Mizpefi Betonimuti ejite. Ammalle Mahanaimu baate seera Deberiti ejiti. 27Bale Yordani keesale lafti worraa Beth-Haramufa Beth-Nimirafa, Sukothifa, Safonifa. Lafti tunini ch'ufti lafa haga toko ta hayyuuni Heshboni mohate. Seeri worra ka ila adu galaana Yordaniti eje haga galaana Galilaya mirgati eja. 28Lafti worri Gadi d'aale, worraafi dirafi ollowaani gula tana.
Lafa gosa Manase ta ilaboruti kennani
29Musani yayu qooda lafa gosa Manase ta ilaboruti keenne, worra isaani gula, aka worri d'aalu. 30Lafti worra haga Mahanaimu ejite, Bashanile ch'ufati ejite lafa hayyuuni Oguni ka Bashani fideefi ammalle ollowaani Yairi jaatama ta Bashani keesa jirtuleti. 31Ammalle lafa Gileadi ta haga garitifi dira Ashtarothifi Edrei, dira gudda hayyu Ogu ka Bashani ejite. Dira kana ch'ufa yayu worra gosa Manase ta gari ta Makiri ilma Manase iraa baate kennani. 32Aki Musani lafa Yerikofi Yordani ilaboru gargari qoode, gaafa inni diida Moabu keesa jiru, akana. 33#Hen 18.20; Qab-Ser 18.2 Musani gosa Lawiti lafa tokole d'aala inkennineefi, ammo waan jed'eeni, D'aalti teesani ha waan AABBO Waaqa Israeliti baasani taatuti.
Qooda lafa Yordani ilaboru
Borana Bible © Bible Society of Kenya, 2019.