Isaya 43
43
1Ee Israeli, AABBO Waaqi ka isani uume,
waan isaaniini jed'u, insodaatina, anati isani baasa.
Anini maqumani isani yaama, isani kiyyuma.
2Hojja isani bisaani qile keesa buutanile
anini isani woliini jira;
yo galaana keesa deemtanile bisaani isani illiqimsani.
Yo ibida keesa yaatanile ingubattani;
bobai ibidaa woma isani tolchu.
3Wonti akanatiifi anini AABBO, Waaqa keesani,
Waaqa qulqullo Israeli, ka isani baasu.
Anini worra Misiritiini isani bite,
worra Kushitifi ka Sebatini isani balchoomsa.
4Waan anini guddo isani maache, isani jaalad'e,
guddinna isanii kennu fed'eefi,
anini namaani lubbu teesani bita.
5Insodaatina, anini isani woliini jira!
Lafa fagoo ta ilaborutiifi ta ila adu keesaa
gumi tante galcha.
6Anini mirgaani, worra gad'iisi jed'e,
bitaleeni galakisi jed'a.
Ilmaani tiyya, ta lafa fagoo muumme lafa ch'ufa jirtu,
naa galcha.
7Worri gumi tiyya,
ta anini uume akasiini guddinna ira argad'e.
Aka worri Israeli Waaqaa d'uga tahe
8Waaqi waan jed'u,
gumi tiyya gayaama,
worri ila qaba, ammo woma inargu,
gurra qaba, ammo woma ind'agau!
9Gosa ch'ufa wolti yaama,
ha wolti baatu.
Waaqooti worraa ta dandeete waan takaa tana taha himtu, eenu?
Waaqooti worra sunii,
ka waan amma tahu jira kana himtu eenu?
waaqooti worraa sunini ha d'ugaa ufi gayaamte,
duuba d'ugaani isaani suni d'ufte
dubbi waaqoota isaani suni d'ugeesitu.
10Gumi Israeli, isani d'uga tiyya;
anini isani fohad'e, aka na male waaqi d'ibiini injirre hubattani.
Na male waaqi d'ibiini injiru; durile injiru,
takaa tanale injiru.
11AABBOONI anuma, ana male ka isani baasu injiru.
12Anini waan taha hime, duuba isani qarqaaru d'ufe.
Waaqi d'ibiini taka waan akana kana intolchine,
isani naa d'uga.
13Anini Waaqa, haga jiru jireennale Waaquma.
Nami tokoleeni, ka irre tiyya jalaa bahu injiru,
nami waan anini tolchu dandae jijiru injiru.
Aka Waaqi worra Israeli baase
14AABBO Waaqi, Qulqullooni Israeli ka isani baase, waan jed'u,
Anini duula Babiloniti erge akasiini isani baasa;
anini balbala fullo dira ch'abse,
iyyanti gumi isaa garagalte boha taati.
15Anini AABBO, Waaqa keesani qulqullo.
Israeli, anumati isani uume,
hayyuuni keesanileeni anuma.
16Duri AABBO Waaqi baariini keesati kara tolche
daandi bisaani ke baase.
17Inni duula gudda baditi geese
duula gaarifi fardaani yau.
Worri jige, kau dad'abe,
akuma ifse d'aamfani d'aame.
18Ammo AABBO Waaqi waan jed'u,
waan duri tahe ded'a,
waan dabre inheregina.
19Waan hareeti anini tolchu eegad'a.
Wonti sunini tahuu jirti,
isani amma ingartani!
Anini lafa aloo kara ke baase,
madda bisaani achiti isanii kenna.
20Bineensi alaaleni na guddise,
sare diidatifi guchileeni na faarsiti,
hojja anini galaana lafa gamooji ke baase
gumi anini fohad'e bisaani obaasu.
21Worri sunini gumi anini uume tiyya tolfad'e,
tanaafi isiini na faarsiti.
Ch'ubbu worra Israeli
22AABBO Waaqi waan jed'u, Ee Israeli,
isani yayu na dad'abdani na yaamachu diddani.
23Isani sorio hooliye teesani ta gubani na baasu diddani;
isani sorio teesanini na inguddimne.
Anini sorio naa baasa jed'e isani ingargalchine,
yokhaani hit'aana na aarsa jed'e isani indad'absiimne.
24Isani hit'aana naa imbinne yokhaani gabbinna hori
keesanitini na inquufsine.
Ammo isani daba keesanini na gaargalchitani,
wollaala isani tolchitanini na dad'absiiftani.
25Ammo hataatu, Waaqi daba isanii araaramu anuma,
anini fed'uma tiyyafi akasi tolche.
Anini deebie daba keesani isaniti inheregu.
26Gaadisa koraa na geesa, na himad'a!
Dubbi himad'a, aka d'uga qabdani ufi agarsiisa.
27Ababoota teesani ta duri isani d'alteti daba tolche;
nami isani dura deemu nati ch'ubbame,
28hayyooti teesanileeni mana kiyya qulqullo t'ureesite.
Tanaafi anini badi Israelitini d'ufe,
gumi tiyya miid'aati lakise.
AABBO ch'allati Waaqa
Borana Bible © Bible Society of Kenya, 2019.