Isaya 13
13
1 #
Isa 47.1-15; Yer 50.1—51.64 Kunini d'aamsa lafa Babiloni ka AABBO Waaqi Isaya ilma Amoziti d'aame. 2Kubi qulqulliti ira baandera d'aaba! Askartiti lalaba, harka keesani oliqaba, akheekha garsiisa, aka worri balbala dira worra gugurdaa had'u. 3AABBO Waaqi yayu askarti jajanna filatani ga yaame, aka worri d'ufe, worra inni iti dallane had'e balleesu.
4Iyyaana gaara iraa d'uftu ch'aqasa — qonqo gumi guddo, gosa heddu wolti baate. Waaqi abba duulaa duula ufii had'iisaa kurfeesu jira. 5Worri lafa fago ta muumme lafati d'ufuu jira. AABBO Waaqi dallansu ufitini lafa ch'ufa balleesu d'ufa. 6#Yoe 1.15 Laalefad'a, boha! Guyyaani AABBO Waaqaa yayu d'iaate, guyyaani Waaqi guddaani lafa balleesu. 7Nama ch'ufa harki iraa bue, garaalleeni aka male laafa. 8Nami ch'ufa mudame, aka hama laalefate d'ukubsate, akuma nad'eeni d'alaa ch'ininfattu taha. Worri ch'ufti ila sodaatiini woli ilaale, aka male woli mudamsiisa. 9Guyyaani AABBO Waaqa d'ufuu jira — guyyaani hamani inni aka male dallanu. Lafti ch'ufti aloo taate, nama ch'ubbu ch'ufa balleesani. 10#Eze 32.7; Mat 24.29; Mar 13.24-25; Luk 21.25; Mul 6.12-13 Urjini ch'ufti ifsu lakifte, aduuleeni hojja gabaatu dukanoofte, jiileeni ifsu dida.
11AABBO Waaqi waan jed'u, Anini baddi lafatini d'ufe, nama ch'ubbu qabu ch'ufa maro ch'ubbu isaanitifi gaargalcha. Anini kiyyiba ch'ufa d'owe, nama hamama ufi olifuud'ule gaargalcha. 12Anini nama lafa irati diqeese, diqeenna worqi ka lafa iraatini woli fakeesa. 13Anini gubba hargufe, laftileeni chochoote, fulla ufiti deemti, guyya anini, AABBO Waaqi guddaani, gugubad'e dallanu.
14Keessumaani lafa Babiloni keesa jirtu lafa ufiti baqatti akuma hiddini nama had'u duraa baqattu, yokhaani aka hooliye tissitu inqamne. 15Nama qabani ch'ufa goraadeeni ijeesani, sheeftiini hobaasani. 16Ila worraa durati, ilmaani worraa ch'ach'arasani hobaasani, maneeni worraa saamani, nad'eeni worrale buufatani.
17AABBO Waaqi waan jed'u, Anini gosa Medi kaase, worra Babiloni haasisa. Worri sunini qarsi iyyaalu yokhaani worqile imfed'u. 18Worri t'iyaani kaima fit'e, ijoollele ch'ufaa nahu dida. 19#Uum 19.24 Lafti Babiloni lafa ch'ufa ira mid'aadu, mid'aaguma isii suni nami isii ch'ufti mataani d'aaba. Ammo anini, AABBO Waaqi, akuma Sodomafi Gomora balleese Babilonile balleesa! 20Nami tokoleeni deebie lafa suni keesa intahu; Araftini tokoleeni waaro ufii achiti ind'aabatu. Tissituuni tokoleeni hori achiti intissitu. 21#Isa 34.14; Sef 2.14; Mul 18.2Lafti sunini fulla bineensi alaa iti gale, urunguni mana iti jaaratu taati. Guchini achiti galte, reeni abba inqamne ona suni keesa buraat'i. 22Worabeesi doofi isii jajabdu keesaa yuuse, sareeni diida maneeni isi, guuti. Guyyaani Babiloni ya gahe! Guyyaani isii ya ala hobae.
Aka worri boojiani galu
Borana Bible © Bible Society of Kenya, 2019.