Galatia 5
5
1Nu balchooma inqamna, Kristoni ya balcha nu tolche! Aka balcha ejaanja, iti deebitani tisse intahiina.
2Ch'aqasa! Anini, Pauloni, waan kana isaniti hima: yo isani qabanqaba qabattani, Kristoni woma isanii imbahu. 3Waan kana anini jabeesu fed'a, aka nama qabanqaba qabatu ch'ufati himu: nami suni Seera ch'ufa gula deemu male. 4Isani, worri Seeraani aka d'uga hereganiifi feetani, la Kristo iraa ufi kuttani. Isani eeba Waaqa ira ala jirtani. 5Nu inhereganna aka Waaqi d'uga nuu heregu; nu waan kana eeganna, jabeenna Lubbu Waaqa ta d'ugefacha teenna keesa hojattu suniini. 6Wonti akanatiifi yo nu Kristo Yeso keesa jiraanne, qabanqaba qabachafi qabachu baannaanile haga tokotu; wonti jabduuni d'ugefacha ta jaalalaani hojattu.
7Isani qara waan dansa tolchitani! Eentu d'ugaa guutu isani d'owe? Inni akamiini isani sobate? 8Waaqi ka isani yaame akasi intolchine. 9#1 Kor 5.6 Bukho diqo tokoti sagale guddo bukheesa jed'ani. 10Ammo anini guddo Aabbo keesa isani d'ugefad'a, aka isani waan d'ibi inherenne; ammalle nama isani gaargalchu, abba fed'u taanaanile, Waaqi ingaargalcha.
11Ammo oboleyaani tiyya, yo anini Qabanqaba qabachu maltani jed'e barsiise, maafi ammalle na gaargalchani? 12Yo sila worri isani gaargalchu ufi kolaase ira dansayu!
13Oboleyaani tiyya, isani aka balchaa taataniifi isani yaamani. Ammo d'araani nafa keesani balchooma dabsatte isani imohatiini. Ammo jaalalti woli isani hojachiisiina. 14#Law 19.18 Seeri ch'ufti Seera kana keesa jira: nama ch'ufa aka ufi jaalattu jaalad'u. 15Ammo yo isani aka bineensa taatani wolhaatani, eegad'a, yokhaani wolballeesitani.
Huji nafatiifi huji Lubbu Waaqa
16Wonti anini jed'u tana: Lubbuuni ha isani qajeelchituuti, d'araani nafa keesani isani imohatiini. 17#Rum 7.15-23 Wonti nafi keenna fed'u waan Lubbuuni feetuuniti; waan Lubbuuni feetule nafi imfed'u: worri wolii nyaapa, tanaafi waan tolchu feetani dandeetani intolchitani. 18Yo Lubbuuni isani qajeelchite Seera jala injirtani.
19Wonti nafi fed'u diiduma teeti: wolbaraachafi t'urifi huji hamtu; 20falfalumafi waan harkaani boch'ani kad'atani. Nami nyaapa wolti tahe wolhad'e, wolqot'isani, wolti dalanani, ufo tahani, gargari woli qoodani, 21wolmorkani, farso d'ugani machaani, wolballeesani, waan hamamtu akana heddu tolchani. Anini amma isani gorsa akuma duri tolche: nami waan akana kana tolchu Finna Waaqa inargatu.
22Ammo Lubbuuni jaalalafa, qilit'amafa, nagayafa, obsafa, naasufa, d'uga gula deemitifa, dansoomafa, 23ufi diqeesitifi ufi qorqoracha d'alti. Wonti kuni tokoleeni seera inqabdu. 24Worri Kristo Yeso gula yau ya nafa ufi ijeese, d'araafi fed'i isaa ch'ufa woliini. 25Lubbuuni ya jireenna nuu kennite; jireenna keennale qajeelchu malte. 26Nu ufi saadu himmalle, woldalansiisu himmalle yokhaani wolqot'isule himmalle.
Ulfinna woli baad'a
Borana Bible © Bible Society of Kenya, 2019.