Galatia 4
4
1Ilaala, gurba abba d'aalu haga inni diqa ch'ufa hojja ch'ufa akuma tisse tolchani, ato wonti ch'ufti ta isaa taatele. 2Haga inni diqa, nama isa qorqorate waan isaa ch'ufa tissuti jira, haga guyyaani abbaani d'aamatu gahuuti. 3Akasuma nuleeni duri, gaafa ijoolle, tisse qilleensa lafa fidu. 4Ammo hojjaani geennaani, Waaqi Ilma isaa erge. Haad'a namati isa d'ale, Seera Yahudi keesaa d'alate, 5#Rum 8.15-17 aka worra Seera jala jiru balchoomsu, aka nu ilmaani Waaqaa taanu.
6Waaqi aka, aka nu ilmaani isaa agarsiisu, Lubbu Ilma ufi erge garaa keenna ke kaye, ta Aabbo, Aabbo kiyya jettu. 7Tanaafi armaa achi atini tisseeniti, ammo ilma. Waan atini ilma isaa taateefi, Waaqi d'aala ufi ch'ufa sii kenna.
Pauloni gumi Galatia kad'ata aka garingale
8Duri isani Waaqa imbeetani, tanaafi tissele waan waaqa intahiini taatani. 9Ammo amma waan isani Waaqa beetaniifi yokhaani waan Waaqi isani beekhufi akamiini dandeetani herega lafa ka woma imbaane ka due deebitani? Maafi deebitani tissele worra tahu feetani? 10Isani guyyafi jiafi gannafi bara hereddani! 11Anini waan keesani insodaad'a. Hujiini anini jiddu teesaniti hojad'e ch'ufti ufumaa baddi?
12Anini isani kad'ad'a, oboleyaani tiyya, aka kiyya taha. Anileeni akuma keesani jira. Isani nati iwolaalle. 13Isani waan anini Odu Dansa qaraa fiit'e isaniti odeeseefi imbeetani; waan anini fayya d'abeefi. 14Taatule gaafasi isani na intufanne yokhaani na indinne, ato nafi kiyya gufu isani tahele. Ammo akuma sila malaika Waaqa fud'attani nale fud'attani; akuma Kristo Yeso fud'attani nale fud'attani. 15Isani gaafasi guddo gammaddani! Ammo amma maanti lafa d'ufe re? Wonti anini waan keesani jed'u tana: yo dandeetani gaafasi sila ilale ufi keesaa fuutani naa kennitani! 16Amma ya d'uga isaniti himnaani nyaapa keesani tahe?
17Jari kaani guddo isani sosoba, ammo dansumti keesa injirtu. Worri gargari nu baasu fed'a, aka waan worri isani sehu isanileeni worrale seetani. 18Duuba guddo dansa, yo waan dansaafi nama jaalatani wonti kunini yo ch'ufa dansa, yo anini isani woliini jiru ch'allaaniti. 19Ijoolle tiyya, akuma haati nama d'altu ch'ininfatte d'ukubsattu, anileeni isanifi d'ukubsad'a, haga Kristoni isani keesati uumamuuti. 20Yo sila isani woliini jiraad'e, guddo fed'a, aka waan keesani kara d'ibiini heregu. Anini guddo waan keesani yaada!
Fakeenna Hajirifi Sara
21Isani worra Seera gula yau fed'u, anini wo gaafad'a: waan Seeri jed'u ind'ageetaniiyu? 22#Uum 16.15; 21.2 Abrahamuni ilmaani lama qaba jed'a, toko niiti tisseti d'aleefi, kaani niiti balchaati d'ale. 23Ilmi niitiini tisse d'alte aada namaa gula d'alate, ammo kaani kakhu Waaqa gula d'alate. 24Waan kana aka mammaasa hima: nad'eeni lamaani wold'aqisa lama, toko Hajiri ta gaara Sinai ira d'ufte, d'alooti isii tissele. 25Hajiri gaara Sinai ka lafa Arafti keesa jiru fakaatti; isiini fakeenna dira gudda Yerusalemu amma jiru qabdi, ka nami isa keesa jiru ch'ufti tisse. 26Ammo Yerusalemuni gubbaa balcha, isiini haad'a teenna. 27#Isa 54.1 Wonti akanatiifi t'aafiini waan jettu,
Gammadi, niiti taka ilmaani ind'aliini!
Iyi, qilit'ami, atini nami taka ch'ininfacha d'alisaa inargiini!
Niitiini d'iirsi lakise niiti d'iirsa qabdu taani ira ilmaani d'alti.
28Amma isani, oboleyaani tiyya, ilmaani Waaqaati, maro kakhu isaatiifi, akuma Isaaqo. 29#Uum 21.9 Gaafasi ilmi aada nama gula d'alate ilma Lubbu Waaqaatiini d'alate gaargalche; arrale akasuma. 30#Uum 21.10 Ammo t'aafiini maani jetti? Niiti tissetiifi ilma isii gati, wonti akanatiifi ilmi niiti tisse ilma niiti balcha woliini abba ind'aalu jetti. 31Tanaafi oboleyaani tiyya, nu ilmaani niiti tissetiiniti, ammo ta niiti balchaati.
Aka balcha ejaanja
Borana Bible © Bible Society of Kenya, 2019.