Danieli 2
2
1Ganna lameeso ka Nebukadrezani lafa mohate inni oobju oobjate oobjuuni suni guddo herega isa nat'e rafu d'owarte. 2#Uum 41.8 Jennaani inni worra wohimufi falfaltufi nama murma baafatufi ka ayyaana heddu wolti yaame, waan oobjuuni tiyya d'ooftu nati hima jed'e. Worri isa dura d'ufe jennaani 3waan jed'eeni, Oobjuuni anini oobjad'e sunini guddo herega natiini d'ufte, waan isii beekhu fed'a, nati hima.
4Jennaani worri afaani Aramutini waan jed'e, Ee hayyicha, lubbu buli! Oobju tante nuti himi, waan isiini d'ooftu siti himna.
5Hayyichi waan worraani jed'e, Isani oobjufi waan isiini d'ooftule nati hima, yo himu baatani, anini harkaafi miila isani iraa ch'ire maneeni teesanile balleese ona tolcha. 6Ammo yo isani oobjufi waan isiini d'ooftu nati himtani, waan guddo isanii kenne isani ulfeesa. Duuba amma oobjufi waan isiini d'ooftule nati hima.
7Jennaani worri ammalle waan jed'eeni, Ee hayyicha, yo atini oobju suni nuti himte, nu dandeenne waan isiini d'ooftu siti himna.
8Hayyichi waan jed'eeni anini ya hubad'e, isani ufumaa ch'iiftani guyya dabarsitani, wonti akanatiifi isani aka anini isani ch'ufa gaargala takaa itiini d'ufu fed'u ya gartani, hojja isani oobju nati himu dad'abdani. 9Wonti isani teetani na sobdani d'ara nati dubbatanifi waan hegeri heregi kiyya jijiramu seetani. Tanaafi duuba amma oobju nati hima, duuba anini akasiini aka isani waan isiini d'ooftu himtanile beekha.
10Jari kaani waan jed'eeni, Ee hayyicha, nami waan akasi suni beekhe himu lafa keesa injiru. Hayyuuni guddaani irre qabuleeni takaa nama ufi ka wohimufi, falfaltufi ka ayyaana heddule waan akana kana ingaafanne. 11Wonti atini gaafatu kunini waan nami afaani beekhuniti, yo waaqooti nama woliini inteenne ch'allaani beete male.
12Dubbi suni irati hayyichi aka male dallane, Jara qaqaro Babiloni ch'ufa fit'a jed'e. 13Duuba seera baasani, Jara sunifi Danielifi jaallani isale ch'ufa woliini fit'a jed'ani.
Aka Waaqi oobju suni waan isii Danieli garsiise
14Jennaani Danielini gudda askarti hayyu eeddu, ka Arioko jed'ani, ka huji fit'aansa iti kennani d'aqe, aka dansaa dubbi qalbeefate 15waan jed'eeni, Hayyichi maanifi seera jaba akana kana gadi baase? Jennaani Ariokoni aka dubbini sunini baate Danieliti hime.
16Hojuma suni Danielini gara hayyu d'aqe waan jed'eeni, Ee hayyicha, diqo toko naa eegi, duuba deebie waan oobju suni siti hima. 17Jennaani Danielini gale, jaallani isa taani Hananiafi Mishaelifi Azaria dubbi suni iti hime 18waan jed'eeni, D'iiro, Waaqa gubba kad'ad'a, aka inni nuu nahe, waan nu imbeenne kana nuti himu, aka akasiini nuufi jara Babiloni kaani woliini inhobaamne. 19Duuba halkani suni waan d'ossani kaani AABBO Waaqi daayya keesa Danieliti mullise. Jennaani inni Waaqa gubba faarse waan jed'e; 20Waaqa qaroomafi jabeenna qabu haga jiru jireenna ha faarsani!
21Barafi wogaale ch'ufa isumati harkaa qaba;
hayyule isumati barch'uma ira teesise,
ammalle iraa buusa;
nami qaroomafi hubacha namaa kennu isuma.
22Inni waan d'ossani, ka nami imbeenne ch'ufa immullisa;
waan dukana keesati d'ossani ch'ufa imbeekha;
ifsalee isumati qaba.
23Anini si faarseti si guddisa, ee Waaqa ababoota tiyya;
atini yayu qaroomafi jabeenna naa kennite
kad'acha tiyyale d'ageete,
waan nu hayyuti himnu nu garsiifte.
Aka Danielini oobjufi waan isiini d'ooftule hayyuti hime
24Jennaani Danielini gara Arioko, namicha huji fit'aansa worra qaqaro Babiloni hayyuuni iti kenne kaani d'aqe waan jed'eeni, Jara suni infit'ini; gara hayyu na geesi, anini oobju isaa iti hima.
25Jennaani hojuma suni Ariokoni Danieli fuud'e, hayyuti geese waan jed'eeni, Ee hayyicha, anini jara Yuda ka boojiani kaani keesa namicha toko, ka waan oobju teeti siti himu, ya sitini d'ufe.
26Hayyichi waan Danieli, ka maqaani d'ibiini Belteshazatini jed'e, Atini waan anini oobjad'eefi, waan oobjuuni tiyya d'ooftu naati himu indandeeta?
27Danielini waan jed'eeni, Ee hayyicha, nami qarooni, yokhaani falfaltuni, yokhaani nami wohimu, ka yokhaani ayyaana heddu, ka waan suni dandae siti himu injiru. 28Ammo Waaqa gubbati jira, ka dandae waan d'ossani mullisu. Inni, ee hayyicha, yayu waan taka tana taha siti hime. Anini amma oobju atini oobjateefi daayya atini hiriba keesa agartele siti hima.
29Ee hayyicha, atini, ato raftu, waan taka tana taha oobjuuni agarte; jennaani Waaqileeni, ka waan d'ossani mullisu waan taka tana taha si agarsiise. 30Wonti waan d'ossani kana mullisanifi, waan; anini nama ch'ufa ira qarooma qabuniti, ammo, ee hayyicha, atini waan oobjuuni tante d'ooftu baratte herega siti d'ufale hubatu.
31Ee hayyicha, oobju tante keesa atini akheekha nama gudda bibiliqu, ka nami millatu ch'ufti sodaatu, agarte. 32Mata isaa worqi mid'aadu ch'allaani mid'aasani — qomafi harka isaa qarsiini mid'aasani garaafi gudeeda isaa sibiila diimani mid'aasani; 33miila isaa sibiila guraacha, faana isaa sibiila guraachafi faaraani mid'aasani. 34Ato atini ilaaltu, d'akhaani nami indarbini fiit'e d'akha d'ibi iraa ch'ee, faana waan kaani ta sibiilafi faaraani mid'aasani taani d'ae ch'ach'abse. 35Jennaani hojuma suni sibiilafi faarafi sibiila diimafi qarsifi worqiini ch'ach'abt'e, gargari jidde, bullofte, awaara guyya bona oobdi keesaa kaatu fakaatte. Jennaani bubbeeni d'ufte, ka tokole inhambisiini ch'ufa fuute. Ammo d'akhaani akheekha suni d'ae kaani gaara tahe lafa ch'ufa guute.
36Oobjuuni atini oobjate suni amma, ee hayyicha, waan isiini d'ooftu siti hima, ch'aqasi, 37Ee hayyicha, atini hayyu lafa jiru ch'ufa ira jirta. Waaqi gubbaa yayu irreefi jabeennafi guddinna sii kenne. 38Inni yayu hayyu lafa nami keesa tau ch'ufa si tolche, horifi bineensafi simpirre ch'ufa si jalati bulche. Mataani worqi suni sii. 39Eegi tante gosa d'ibiti d'ufe lafa tana mohata, ammo worri haga kanke ingahu, eegi sunile ka sadeesoti d'ufa, ka sibiila diima, ka lafa ch'ufa mohatu. 40Duuba eege ka afreesoti d'ufa, jabaani aka sibiila guraacha, ka waan ch'ufa gargari ch'ach'abse bulleesu. Akuma sibiili guraachi waan ch'ufa ch'ach'absu, worrileeni finna qara kaani ch'ufa bulleese d'ukeesa. 41Atini ammalle faana isaa ta sibiila guraachafi faaraani mid'aasani ya agarte. Suni wonti isiini garsiiftu, aka finni gargari qoodamu garsiifti. Finna suni keesa, jaba aka sibiilaati jira, akuma atini faarafi sibiila wolkeesa mid'aasani agarte kaani. 42Akuma quba miila, ka atini agarte kaani gama toko sibiila guraachani mid'aasani, kaani faaraani mid'aasani, akasuma finni suni gami toko jabaate gami kaani laafa. 43Ammalle atini sibiila guraachafi faara wolti makhani agarte. Wonti woni suni garsiiftu, aka worri lafa mohatu suni wolfuud'e akasiini taka tahu garsiifti, ammo dandaani woliini intaani, akuma faarafi sibiili guraachi woli intaane. 44Bara hayyooti suni lafa fiddu Waaqi gubbaa finna haga jiru jireenna ind'umanneeni d'ufa. Finna suni dandaani indabsatani, ammo inni finna d'ibi ch'ufa balleese haga jiru jireenna mohata. 45Atini d'akha nami indarbini, ka fiit'e d'akha d'ibi iraa ch'ee, akheekha sibiila guraachafi sibiila diimafi faarafi qarsifi worqiini mid'aasani d'ae agarte. Ee hayyicha, Waaqi guddaani waan taka tana taha si garsiisuu jira. Anini waan atini oobjateefi waan isiini d'ooftule ch'ufa, ka diqole iraa ingorini, ya siti hime.
Aka hayyichi Danieli galata galche
46Jennaani hayyu Nebukadrezani Danieli guddise isa durati lafaani ufi d'ae waan biyyaani jed'e, sorio baasafi hit'aanale aarsafi. 47Ammalle hayyichi waan Danielini jed'e, D'uguma Waaqi kanke Waaqa Waaqa ch'ufati, ka abba hayyoota ch'ufa ka waan d'ossani ch'ufa namaa mullisu, Tanaafi atini waan d'ossani kana dandeete nati himte. 48Jennaani duuba hayyuuni Danieli ulfinnaafi waan heddu muumme inqamne kenneefi, gudda lafa Babiloni ch'ufa isa tolche, jara hayyu mala d'aule ch'ufa mataa iti tolche. 49Kad'acha Danieli gula, hayyichi huji lafa Babiloni ch'ufa harka Shadrakafi Meshekifi Abednego kenne; ammo Danieli hayyuma birati hafe.
Aka Nebukadrezani woi worqiini mid'aase nama ch'ufaani kad'ad'a jed'e
Borana Bible © Bible Society of Kenya, 2019.