2 Thesalonike 3
3
1Tanaafi, dubbi buufata, oboleyaani, Waaqa nuu kad'ad'a, aka dubbini Aabbo fulla ch'ufa geete dabsattu, akuma jiddu teesaniti taate. 2Ammalle Waaqa kad'ad'a, aka inni harka nama hamamatiifi ka dabaati nuu baasu. Wonti akanatiifi nami ch'ufti d'ugefacha inqabu.
3Ammo Aabbooni ka d'ugaati. Inni isani jabeeseti Sheet'anale isani iraa d'owa. 4Aabbooni ya isani nu d'ugefachiise; ammalle nu imbeenna, aka isani waan nu isaniti himnu ch'ufa arrafi hegerile guuttani:
5Aabbooni jaalala Waaqaatiifi obsa Kristoni namaa kennuti isani akheekhiina.
Huji hojad'a
6Maqa Aabbo Yeso Kristotiini isaniti himna, oboleyaani teenna: oboleyaani huji hojachu diddu ch'ufa lagad'a, ka waan nu barsiimne gula indeemne. 7Isaniyu imbeetani, aka waan nu tolchine tolchu maltani. Gaafa isani woliini jirru nu huji hojachu indinne. 8Qarqaarsa nama tokole bilaasha imfud'anne. Ammo halkani guyya gaargalle hojanne, aka nu nama tokole ind'imne. 9Nu waan kana maro waan nu argachu malle nuu kenna jechu indandeenneefi, jechu indinne, ammo aka akheekha dansa isani agarsiimnuufi dinne. 10Gaafa isani woliini jirru, Nami hojachu didu sagale inyaatini jenne.
11Wonti nu waan kana jennuufi, waan aka nami gari jiddu teesani keesa huji hojachu dide waan nama d'ibi ch'alla yaku jiru d'ageenneefi. 12Maqa Aabbo Yeso Kristotiini jara suni himne gorsina: Huji teesani laana hojad'a, ufi bulcha.
13Ammo isani, oboleyaani teenna, waan dansa tolchu indad'abiina. 14Nami toko hegeri d'aamsa nu tatabe tana keesati t'aamnu inguutufa. Nama suni ilaala, lagad'a, aka inni ufumaani ch'eeru. 15Ammo aka nyaapa isa intolchiina, aka oboleesa gorsa.
Dubbi eege
16Aabbooni, ka nagaya namaa kennu, hojja ch'ufaafi guyya ch'ufa nagaya isani guutinna. Aabbooni isani ch'ufa woliini ha tau.
17Waan kana anini harkuma kiyyaani t'aafa: Pauloni nagaya isani fuud'a. Anini tatabe ch'ufa akana maqa kiyya jalati t'aafa; anini akana t'aafa.
18Eebiti Aabbo Yeso Kristo isani ch'ufa woliini tahinna.
Borana Bible © Bible Society of Kenya, 2019.