Cantar de los cantares 8
8
1¡Asquïsapänwa, jumajj nayan jilajjäsamäna, taycajjan ñuñupampi uywatäsamäna!
Uqhamat nayajj callen jicjjatasinjja jumarojj jamp'att'irisma, uqhamat jan qhitis nayarojj c'umiñapataqui.
2Nayajj taycajjan utaparuw irpirisma, jupan ucaruw irpantirisma,
ucatsti jumaw nayan yatichirejjäsmajja.
Nayasti jumarojj suma vino umt'ayirismajja, uqhamarac granada frutanacajjat ch'iwrsut umapwa churirismajja.
3¡Jupasti ch'eka amparapampejja p'eket catt'itpan, cupi amparapampisti khomantaraquitpan!
Chacha
4Jerusalenanquir warminaca, nayaw achict'asipjjsma:
jan munatajjarojj sartayapjjamti, ¡jan ucasti ict'ascpan cunapachcamatejj munqui ucqhacama!
Sojjtïr k'ochu
Waljani
5¿Qhitis wasar toketa
jutasqui, munatapana
callachipjjaru aljjatata?
Chacha
Mä manzano ali jac'anwa jumarojj iquit sartaysma;
ucanwa taycamajj parto usupjja sartayasi;
ucanaracwa taycamajj jumarojj wawachastam.
Warmi
6¡Nayarojj chuymamar kellkantasita, uqhamarac amparamar kellkantasita!
Munasiñasti jiwañar uñtata jan p'acjcayawa;
jumar munañasti jiwañar uñtata jan camachcayawa.
¡Munasiñasti ninar uñtatawa akaraqui, ucasti kollana ninawa!
7Take kotanacan umapasa janiw uca munasiñjja jiwt'aycaspati;
janiraquiw jawiranacas jiwaraycaspati.
Qhititejj kamir cancañapa churañ munaspa aca munasiña laycojja, jupajj jisc'achataquiw uñjasjjaspa.
Waljani
8Cullaquitasajja janïraw ñuñunacanïquiti.
¿Cuns jupampejja lurañänejja cunapachatejj jupar sart'iri jutapcani ucqhajja?
9Jupatejj mä perkäspa ucajja, jupjjarojja mä kollke perkwa jarc'akasiñataqui perksnajja,
jupatejj mä puncüspa ucajja, cedro lawanacampiw lek'equipsnajja.
Warmi
10Nayajj mä perkjamätwa, ñuñunacajjasti torrenacjamaraquiwa.
Ucatwa jupan nayrakatapanjja, samarañ jicjjatta.
11Salomonajj Baal-hamón sat chekanjja mä uva yapunïnwa.
Ucsti uñjirinacaparuw uñjañapataqui jaytäna,
cosecha tiemposti sapa mayniw waranka kollke apanisin churäna.
12Salomón, waranka kollkpachaw jumataqui,
pä pataca kollkesti uñjirinacamataquiwa.
¡Nayasti uva yapojjwa uñjasiscta!
Chacha
13¡Pankaranac taypinquir reina, suma arumjja ist'ayita!
¡Amigonacasasti arumjja ist'añwa munapjje!
Warmi
14Munatajjay, jalam,
mä tarujar uñtat jalam,
taruja kallunacjam t'ijtam suma k'apquir kollu patanacanjama.
Currently Selected:
Cantar de los cantares 8: AYOP
Highlight
Share
Copy
Want to have your highlights saved across all your devices? Sign up or sign in
Biblia Aymara ©Sociedad Bíblica Boliviana 1997.