TSINGANU 8
8
Vusitsa Vwitsominywa
1Hulishitsi! Vusitsa vulaanjililanga.
Limanya lihulilikhananga ihale wene.
2Vuli khu vikulu ikulu himbi khu muhaanda;
khandi ha masanganjila.
3Vulaanjililanga mu vwinjililu vwi litaala likali
himbi ha vilivwa:
4“Munyi vandu voosi khulilova, ninzi umulaanganga!
Nanjililanga khu mundu wosi uli mwoyo.
5Munyi vayiingwa, mweche khuva nu vucheli;
Muhulishitsi vulahi munyi va muli vayiingwa.
6Muhulishitsi, shichila ndi ni vindu vilahi viu khumuvoolela;
shichila nomolomanga ku vulunji.
7Ka mbolanga ni katoto;
nayambakhana vuvehi.
8Makhuva koosi kambolanga ni ku vulunji;
shindu shivulakhuho shiu vuvehi inoho shiu khukoyanyinya.
9Makhuva kaanje kali havulavu khu mundu uli ni limanya,
ku vulunji khu mundu uli nu vucheli.
10Murovole mivaalo kaanje vukhala vwi ifetsa,
khandi vucheli khuvira itsahabu inyukhu.
11“Ninzi vusitsa, navira machina ku vukuuli vululu,
shindu shivulakhuho shia mwenyanga shinyala khusasanyinywa khwinzi.
12Ninzi vusitsa, khandi ndi limanya,
ndi nu vucheli khandi namanya vulahi kakholanga.
13Khuha Mwami Nyasaye luyali nakhwo khwambakhana vindu vitamanu;
shinayaanza khwilola nu khwichinjilila, miima mitamanu,
nende lilomoloma liu vuvehi tawe.
14Ndi ninganakani indahi nende vusitsa vwatoto;
ndi ni limanya khandi ni tsingulu.
15Khonyanga vami khwamiha,
khandi vamihi khulomba malako katoto.
16Khonyanga shia mwamihi wosi khulilova khwamiha,
khandi vimilili nende vami vamihanga munjila inunji.
17Nayaanza vandu vanyanza,
khandi yavo vakhavanga nu mwoyo kwosi vanyolanga.
18Vuhinda nende luyali ni vianje,
miandu chikhavwetsanga nende vuhinda.
19Ka munyolanga khurula khwinzi ni malahi khuvira itsahabu inyukhu,
khandi murungu kwanje kwavira ifetsa.
20Menyanga limenya liu vulunji,
khandi nondanga injila yatoto.
21Ninzi uhaananga miandu khu vandu vanyanzanga,
nzitsulitsanga vindu mu livishilu liavo.
22“Ninzi wu Mwami Nyasaye yaraanga khuloonga mu viosi,
shindu shiukhuraanga mu mihinzilu chiechie, khurula khale.
23Ninzi walombwa muliraanga,
lukhuraanga lwene, shivala nishishili khuloongwa.
24Nalombwa tsinyanza nitsishili khuvaho,
lwa khwali nu khuvula tsisieveye tsia matsi.
25Ninzi walombwa vikulu nivishili khuloongwa
vikulu vitititi nivishili khuvikhwa mu makono kavio,
26Nyasaye nashili khuloonga lilova nende milimi chialio,
inoho khali nashili khulombakhu malova mati.
27Naliho lwa yavikha likulu mu makono kalio,
lwa yachora ingara ikulu wi inyanza,
28lwa yatinyilitsa malesi mwikulu,
lwa yikula tsisieveye tsi inyanza
29nahaana lilako ndi matsi ki inyanza kavuli khusumeela
khuvira khuli yali navooli.
Naliho lwa yaraanga khwala misinji chi lilova.
30Nali himbi khuye khuli mundu wechela khulomba vindu,
ninzi nali khuli shirula shiu khwikhoya khwekhwe,
nu vuyaanzi shia khase khosi imbeli wewe --
31nindi nu vuyaanzi shichila shivala
khandi ninyanzitswa na vandu.
32“Khulwa yako, vaana vaanje, mumbulishitsi;
vali ni ikhaavi yavo vatsilililanga khukhola ka vavoolelanga vakhole.
33Mulonde mivaalo kaanje khandi muve nu vusitsa;
muvuli khwambakhana khukalonda.
34Ali ni ikhaavi mundu umbulishitsanga,
uheenzelelanga shia litukhu ha muliango kwanje,
nalindililanga mu vwinjililu vu muliango kwanje.
35Mundu unyolanga inzi anyolanga vulamu,
khandi Mwami Nyasaye ayaanzitswangwa naye.
36Navutswa wambakhananga khunyola inzi yisalilitsanga mwene;
vandu voosi vanzambakhananga vayaanza likhutsa.”
Currently Selected:
TSINGANU 8: LLLPRO
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013